কেৰালাৰ নতুন মুখ্যমন্ত্রী হিচাপে অহা ১৮ মে’ত শপত গ্রহণ কৰিব ভি ডি সতীশনে। শপত গ্রহণ অনুষ্ঠানৰ পূৰ্বে সতীশনে দলৰ শীৰ্ষ নেতাসকলক সাক্ষাৎ কৰা পৰিলক্ষিত হৈছে। মুখ্যমন্ত্রী পদৰ বাবে সতীশনৰ নাম ঘোষণা কৰাৰ পিছৰে পৰা কংগ্ৰেছ দলৰ সাধাৰণ সম্পাদক তথা কেৰালাৰ সাংসদ কে চি বেণুগোপাল আৰু দলৰ জ্যেষ্ঠ নেতা ৰমেশ চেন্নিথলা অসন্তুষ্ট হৈ থকা বুলি চৰ্চা চলিছিল। কাৰণ মুখ্যমন্ত্রী পদৰ দৌৰত এই দুয়োগৰাকী নেতাৰ নামো সমুখত আছিল, কিন্তু দলৰ হাই কমাণ্ডে অৱশেষত ভি ডি সতীশনৰ নামতহে চূড়ান্ত মোহৰ মাৰে।
শপত গ্রহণ অনুষ্ঠানৰ দুদিন পূৰ্বে ভি ডি সতীশনে কে চি বেণুগোপাল আৰু ৰমেশ চেন্নিথলাৰ বাসগৃহলৈ গৈ তেওঁলোকক সাক্ষাৎ কৰে। এই সাক্ষাতৰ সময়ত দুয়োগৰাকী নেতাই সতীশনক অতি উষ্ম আদৰণি জনায় আৰু ইয়াৰ এটা ভিডিঅ’ বৰ্তমান সামাজিক মাধ্যমত অতি সোনকালে ভাইৰেল হৈ পৰিছে। উল্লেখ্য যে কে চি বেণুগোপাল কংগ্ৰেছ হাইকমাণ্ডৰ অতি ঘনিষ্ঠ আৰু মুখ্যমন্ত্রী পদৰ দৌৰত তেওঁৰ নাম সকলোতকৈ আগত আছিল। কিন্তু কেইবাদিনো ধৰি চলা দীঘলীয়া আলোচনা আৰু কেৰালাৰ নেতাসকলৰ সৈতে হোৱা কেইবাটাও পৰ্যায়ৰ বৈঠকৰ পিছতহে দলৰ শীৰ্ষ নেতৃত্বই সতীশনৰ নামটো নিৰ্বাচিত কৰে।
সতীশনৰ নাম ঘোষণা কৰাৰ পিছত দলৰ সাধাৰণ সম্পাদক কে চি বেণুগোপালে কয় যে এই সিদ্ধান্ত কংগ্ৰেছ হাইকমাণ্ডে লৈছে আৰু তেওঁ এই সিদ্ধান্তৰ সৈতে সম্পূৰ্ণৰূপে থিয় দিছে। ইয়াৰ উপৰিও তেওঁ দলৰ এই পদক্ষেপক আদৰণি জনায়। উল্লেখ্য যে কেৰালা বিধানসভা নিৰ্বাচনত কংগ্ৰেছ আটাইতকৈ ডাঙৰ দল হিচাপে আত্মপ্ৰকাশ কৰিছে আৰু দলটোৱে অকলশৰে ৬৩ খন আসন লাভ কৰিবলৈ সক্ষম হৈছে। আনহাতে কংগ্ৰেছৰ নেতৃত্বাধীন ইউ ডি এফ জোঁটে মুঠ ১০২ খন আসন লাভ কৰিছে, য’ত ইণ্ডিয়ান ইউনিয়ন মুছলিম লীগে ২২ খন আসন লাভ কৰি বিজয়ী হৈছে।
আনহাতে এই শপত গ্রহণ অনুষ্ঠানত উপস্থিত নাথাকিব জ্যেষ্ঠ কংগ্ৰেছ নেতা শশী থাৰুৰ। শপত গ্রহণৰ দুদিন পূৰ্বে সামাজিক মাধ্যম এক্সৰ জৰিয়তে শশী থাৰুৰে এই অনুষ্ঠানত উপস্থিত থাকিব নোৱাৰাৰ বাবে দুঃখ প্ৰকাশ কৰে। তেওঁ উল্লেখ কৰে যে তেওঁৰ নিজৰ কলেজৰ এটা পূৰ্বনিৰ্ধাৰিত অনুষ্ঠানৰ বাবে তেওঁ আমেৰিকাত থাকিব লাগিব, যাৰ বাবে তেওঁ কেৰালাৰ নতুন মুখ্যমন্ত্রীৰ শপত গ্রহণ অনুষ্ঠানত অংশ ল’ব নোৱাৰিব। উল্লেখ্য যে বিভিন্ন সময়ত থাৰুৰৰ কংগ্ৰেছ দলৰ প্ৰতি থকা অসন্তুষ্টিৰ কথাও সংবাদ মাধ্যমত চৰ্চালৈ আহি থাকে।
