আজি প্ৰকাশিত তৃতীয় বৰ্গৰ বিভাগ বিতৰণ আৰু স্নাতক- স্নাতকত্তোৰ শিক্ষক নিযুক্তিৰ চূড়ান্ত প্ৰাৰ্থী তালিকাই প্ৰমাণ কৰিছে ভয়াবহ অ’ভাৰলেপিঙৰ সমস্যা। ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে আশংকা কৰা ধৰণেই হৈছে অ’ভাৰলেপিং। তৃতীয় বৰ্গৰ পদৰ বিভাগসমূহ নিৰ্দিষ্ট কৰাৰ পাছত দেখা গৈছে একেজন প্ৰাৰ্থীয়ে দুটাৰ পৰা চাৰিটা পদলৈ নিৰ্বাচিত হৈছে। একেদৰে নিশা প্ৰকাশ কৰা হাইস্কুল আৰু উচ্চতৰ মাধ্যমিক বিদ্যালয়ৰ শিক্ষকৰ ক্ষেত্ৰতো দেখা গৈছে অ’ভাৰলেপিং। একেজন প্ৰাৰ্থীয়ে চৰকাৰী উচ্চ মাধ্যমিক বিদ্যালয়, প্ৰাদেশিকীকৃত উচ্চ মাধ্যমিক বিদ্যালয়, চৰকাৰী উচ্চতৰ মাধ্যমিক বিদ্যালয় আৰু প্ৰাদেশিকীকৃত উচ্চতৰ মাধ্যমিক বিদ্যালয়ৰ শিক্ষক পদৰ বাবে বাচনিকৃত হৈছে। এই দুয়োটা বিভাগৰ ফলাফলে প্ৰমাণ কৰিছে যে চৰকাৰে গণি গণি ৫১ হাজাৰ প্ৰাৰ্থীক নিযুক্তি দিয়াৰ ঘোষণা ফুটুকাৰ ফেনত পৰিণত হ’বগৈ। অ’ভাৰলেপিঙৰ ফলত ৫১ হাজাৰৰ ঠাইত প্ৰকৃততে ২০/২৫ প্ৰাৰ্থীৰহে নিযুক্তি হ’ব।
ডি ৱাই এফ আইয়ে যোৱা এপ্ৰিল মাহ অৰ্থাৎ ফলাফল ঘোষণাৰ আগৰে পৰাই বিষয়টোক লৈ চৰকাৰৰ দৃষ্টি আকৰ্ষণ কৰি সমাধানৰ ৰাষ্টা মুকলি কৰিবলৈ দাবী জনাইছিল। অ’ভাৰলেপিঙৰ সমস্যা সমাধানৰ বাবে ডি ৱাই এফ আইৰ স্পষ্ট প্ৰস্তাৱ আছিল- এটা ৱেব প’ৰ্টেল মুকলি কৰি পচন্দৰ পদত অগ্ৰাধিকাৰ দিয়াৰ ব্যৱস্থা কৰা আৰু এক অপেক্ষাৰ তালিকা (Waiting list) প্ৰস্তুত কৰা। কিন্তু চৰকাৰে বিষয়টো উৰুৱাই দি অ’ভাৰলেপিঙৰ কোনো সমস্যাই নহয় বুলি ঘোষণা কৰে। আজিৰ তাৰিখত হাজাৰ হাজাৰ নিবনুৱা যুৱক-যুৱতীয়ে চৰকাৰৰ এই আন্তৰিকতাহীন আৰু চমক সৃষ্টিকাৰী নীতিৰ বাবে আশাহত হৈ পৰিছে। অকল অভাৰলেপিঙে নহয় গোটেই নিযুক্তি প্ৰক্ৰিয়াটোৰ স্বচ্ছতা আৰু নিৰপেক্ষাতকলৈও প্ৰশ্ন উদয় হৈছে। ফলাফল ঘোষণা হ’ল যদিও আজিলৈ সকলো উত্তীৰ্ণৰ এখন তালিকা, তেঁওলোকৰ প্ৰাপ্ত নম্বৰ বা কাট-অফ নম্বৰ ঘোষণা নকৰিলে। এনেবোৰ কথাই বাচনিৰ ক্ষেত্ৰত স্বজন-তোষণ হোৱাৰো গুৰুতৰ অভিযোগ উত্থাপন হৈছে।
ডি ৱাই এফ আইয়ে অসম চৰকাৰৰ ওচৰত পুনৰ দাবী উত্থাপন কৰিছে- নিযুক্তি পত্ৰ বিতৰণৰ পূৰ্বে অ’ভাৰলেপিঙৰ সমস্যা সমাধন কৰক। প্ৰাপ্ত নম্বৰসহ প্ৰাৰ্থী তালিকা প্ৰকাশ কৰি ৱেটিং লিষ্টৰ ব্যৱস্থা কৰক।অসমৰ বিজেপি চৰকাৰে নিবনুৱাৰ এই মৰ্ম বেদনা উপলদ্ধি কৰিব নোৱাৰিলে আগন্তুক সময়ত প্ৰতিৰোধ আন্দোলন গঢ়ি তুলিবলৈ আগবাঢ়ি আহিব আৰু প্ৰতাৰক চৰকাৰখনক গাদীচ্যুত হ’বলৈ বাধ্য কৰিব
