দেশৰ ঔদ্যোগিক ক্ষেত্ৰত আকৌ এবাৰ এক ডাঙৰ বিপৰ্যয় সংঘটিত হৈছে। অন্ধ্ৰপ্ৰদেশৰ পাব্লিক ছেক্টৰ আণ্ডাৰটেকিং ৰাষ্ট্ৰীয় ইস্পাত নিগম লিমিটেড চমুকৈ আৰ আই এন এলৰ দ্বাৰা পৰিচালিত বিখ্যাত বিশাখাপত্তনম বা ভাইজাগ ষ্টীল প্লাণ্টত সোমবাৰে বিয়লি এক ভয়াবহ বিস্ফোৰণ আৰু অগ্নিকাণ্ডৰ ঘটনা ঘটে। কাৰখানাৰ ভিতৰত থকা প্ৰায় ১৬০০ ডিগ্ৰী চেলচিয়াছ তাপমাত্ৰাৰ উতলা তৰল লোহাভৰ্তি এক বিশাল পাত্ৰ বা লেডল ভাঙি পৰাৰ ফলত জীৱন্তে অগ্নিদগ্ধ হৈ অন্ততঃ ৮ জন শ্ৰমিকৰ কৰুণ মৃত্যু হয়।
এই ঘটনাত আন বহু শ্ৰমিক কাৰখানাৰ ভিতৰত আৱদ্ধ হৈ পৰে আৰু অন্ততঃ ৬ জন শ্ৰমিকৰ শৰীৰ এশ শতাংশই অগ্নিদগ্ধ হয়। বৰ্তমান তেওঁলোকে হাস্পতালত মৃত্যুৰ সৈতে যুঁজি আছে। কাৰখানা আৰু আৰক্ষী সূত্ৰই জনোৱা মতে সোমবাৰে বিয়লি ঠিক ৪ বাজি ৪০ মিনিটত প্লাণ্টৰ ষ্টীল মেল্টিং শ্বপ আৰু কন্টিনিউয়াছ কাষ্টিং বিভাগৰ ভিতৰত যেতিয়া পূৰ্ণ গতিত উৎপাদন প্ৰক্ৰিয়া চলি আছিল, তেতিয়াই এই ভয়ংকৰ ট্ৰেজেডীটো সংঘটিত হয়।
প্ৰত্যক্ষদৰ্শী আৰু শ্ৰমিক ইউনিয়নৰ একাংশ নেতাই জনোৱা মতে এটা ক্ৰেনৰ সহায়ত বহু টন ওজনৰ উতলা তৰল লোহাভৰ্তি বিশাল কন্টেইনাৰটো ওপৰলৈ তুলি থকা হৈছিল। ঠিক সেই সময়তে হঠাত পাত্ৰটোত যান্ত্ৰিক বিজুতি ঘটে আৰু ই বিকট শব্দ কৰি ফাটি তলত পৰি যায়। মুহূৰ্তৰ ভিতৰতে পাত্ৰটোৰ ভিতৰত থকা ১৬০০ ডিগ্ৰী চেলচিয়াছৰ উতলা তীখা আগ্নেয়গিৰিৰ লাভাৰ দৰে চাৰিওফালৰ মজিয়াত আৰু কৰ্মৰত শ্ৰমিকসকলৰ ওপৰত ছিটিকি পৰে। গলিত লোহাৰ তীব্ৰ উত্তাপ আৰু জুইৰ ফলত গোটেই ঠাইটুকুৰা নৰক সদৃশ হৈ পৰে আৰু তাত থকা শ্ৰমিকসকলে পলাই সাৰিবলৈ অকণো সুযোগ নাপালে। ধোঁৱা আৰু জুইৰ লেলিহান শিখাই গোটেই ফ্ল’ৰটো গ্ৰাস কৰাৰ বাবে বহু লোক ভিতৰত আৱদ্ধ হৈ পৰে। কাৰখানাৰ সুৰক্ষা কৰ্মী আৰু অগ্নিনিৰ্বাপক বাহিনীৰ এক ডজনতকৈও অধিক গাড়ীয়ে যুদ্ধকালীন তৎপৰতাৰে কাম কৰি নিশালৈ জুই নিয়ন্ত্ৰণ কৰে আৰু আৱদ্ধ শ্ৰমিকসকলক উদ্ধাৰ কৰে।
শ্ৰমিক সংগঠনৰ নেতাসকলে দাবী কৰা মতে দুৰ্ঘটনাস্থলীৰ পৰা ইতিমধ্যে ৮ ৰ পৰা ৯ টা অগ্নিদগ্ধ মৃতদেহ উদ্ধাৰ কৰা হৈছে। অৱশ্যে ষ্টীল প্লাণ্ট কৰ্তৃপক্ষই এতিয়ালৈকে কোনো আনুষ্ঠানিক বিবৃতি বা মৃতকৰ সঠিক সংখ্যা প্ৰকাশ কৰা নাই। ৰাজ্যিক স্বাস্থ্য বিষয়াৰ প্ৰাথমিক তথ্য অনুসৰি ৪ টা মৃতদেহ প্লাণ্টৰ জেনেৰেল হাস্পতাললৈ আৰু বাকীসকলক মৰণোত্তৰ পৰীক্ষাৰ বাবে কিং জৰ্জ হাস্পতাললৈ প্ৰেৰণ কৰা হৈছে। এই ঘটনাত আৰ মল্লিকাৰ্জুন ৰাও, পি শ্ৰীনিবাস ৰাও, এ আপ্পা ৰাও, বি সত্যানন্দ, সুৰি বাবু আৰু পাইদিৰাজু নামৰ ৬ জন শ্ৰমিক গুৰুতৰভাৱে আহত হৈছে। তেওঁলোকৰ অৱস্থা অতি সংকটজনক হোৱাৰ বাবে বিশাখাপত্তনমৰ ডাঙৰ কৰ্পোৰেট হাস্পতালত ভৰ্তি কৰোৱা হৈছে। কাৰখানাৰ শ্ৰমিক সংগঠন চিটুৱে এই ঘটনাৰ উচ্চ পৰ্যায়ৰ তদন্তৰ দাবী তুলি মৃতকৰ পৰিয়ালক ৫ কোটি টকাকৈ ক্ষতিপূৰণ দিবলৈ দাবী জনাইছে।
এই ভয়াবহ দুৰ্ঘটনাৰ খবৰ পাই প্ৰধানমন্ত্ৰী নৰেন্দ্ৰ মোডীয়ে গভীৰ শোক প্ৰকাশ কৰিছে। তেওঁ নিজৰ অফিচিয়েল এক্স হেণ্ডেলৰ জৰিয়তে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰাৰ লগতে আহতসকলৰ দ্ৰুত আৰোগ্য কামনা কৰে। ইয়াৰ উপৰিও প্ৰধানমন্ত্ৰীৰ ৰাষ্ট্ৰীয় সাহায্য পুঁজিৰ পৰা মৃতকৰ পৰিয়াললৈ ২ লাখ টকা আৰু আহতসকলৰ চিকিৎসাৰ বাবে ৫০ হাজাৰ টকাকৈ আৰ্থিক সাহায্য ঘোষণা কৰা হৈছে। আনহাতে অন্ধறপ্ৰদেশৰ মুখ্যমন্ত্ৰী এন চন্দ্ৰবাবু নাইডুৱে জিলা উপায়ুক্ত আৰু আৰক্ষী আয়ুক্তক পোনপটীয়াকৈ উদ্ধাৰকাৰ্য তদাৰক কৰিবলৈ নিৰ্দেশ দিয়ে। ৰাজ্যৰ গৃহমন্ত্ৰী বনগালাপুড়ি অনিতায়ো নিজৰ ভ্ৰমণসূচী চুটি কৰি দুৰ্ঘটনাস্থলীত উপস্থিত হয়। ইফালে প্ৰাক্তন মুখ্যমন্ত্ৰী ৱাই এছ জগন মোহন ৰেড্ডীয়েও এই ঘটনাত শোক প্ৰকাশ কৰি প্লাণ্টৰ সুৰক্ষা অডিট আৰু দোষীৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে। উল্লেখনীয় যে এই দুৰ্ ঘটনাই ২০১২ চনৰ জুন মাহত এই প্লাণ্টৰে অক্সিজেন প্লাণ্টত হোৱা এক বিধ্বংসী বিস্ফোৰণৰ ক’লা স্মৃতি মনত পেলাই দিছে, য’ত ১৬ জন শ্ৰমিকৰ কৰুণ মৃত্যু হৈছিল।
