শাহজাহানপুৰত বন্দে ভাৰত এক্সপ্ৰেছৰ খুন্দাত এজন ১৬ বছৰীয়া কিশোৰৰ মৃত্যু হোৱাক কেন্দ্ৰ কৰি এক উত্তপ্ত পৰিস্থিতিৰ সৃষ্টি হয়। কিশোৰজনৰ মৃত্যুৰ পিছত চিকিৎসালয়ত পৰিয়ালৰ লোকে চলোৱা তাণ্ডৱৰ বাবে আৰক্ষীয়ে তেওঁলোকৰ বিৰুদ্ধে গোচৰ ৰজু কৰিছে। সোমবাৰে এজন আৰক্ষী বিষয়াই এই তথ্য সদৰী কৰে।
আৰক্ষীৰ সূত্ৰ অনুসৰি, দেওবাৰে ইন্দিৰা নগৰ ৰে’ল ক্ৰছিঙত অংকিত কুমাৰ নামৰ কিশোৰজনক ৰে’লখনে খুন্দা মাৰে। খবৰ পোৱাৰ লগে লগে আৰক্ষীৰ এটা দলে তেওঁক চিকিৎসালয়লৈ লৈ যায় যদিও চিকিৎসকে তেওঁক মৃত ঘোষণা কৰে।
ঘটনাৰ পিছতে কিশোৰজনৰ পৰিয়ালৰ লোকে চিকিৎসালয়খনত ব্যাপক ভাঙোফাল চলায়। পৰিস্থিতি ইমানেই ভয়াবহ হৈ পৰিছিল যে মহিলা চিকিৎসকসকলে নিজৰ প্ৰাণ বচাবলৈ শৌচাগাৰত আশ্ৰয় ল’বলগীয়া হয়। শাহজাহানপুৰৰ আৰক্ষী অধীক্ষক (SP) ৰাজেশ দ্বিবেদীয়ে পিটিআইক (PTI) জনোৱা মতে, সোমবাৰে পৰিয়ালৰ লোকে মৃতদেহটো ৰাজপথত ৰাখি নিগোহী অঞ্চলত পথ অৱৰোধো কৰিছিল। অৱশ্যে আৰক্ষীৰ হস্তক্ষেপত অৱৰোধ মুক্ত কৰা হয়।
চৰকাৰী চিকিৎসা মহাবিদ্যালয়ৰ অধ্যক্ষ ৰাজেশ কুমাৰে জনোৱা মতে, দেওবাৰে অংকিতক জৰুৰীকালীন বিভাগলৈ অনা হৈছিল। চিকিৎসকে পৰীক্ষা কৰি মৃত ঘোষণা কৰাৰ পিছত অধিক নিশ্চিতিৰ বাবে ইচিজি (ECG) কৰা হৈছিল, য’ত হৃদস্পন্দন ধৰা পৰা নাছিল। ইয়াৰ পিছতে মৃতদেহটো মৰ্গলৈ স্থানান্তৰ কৰা হয়।
অধ্যক্ষগৰাকীয়ে আৰু জনায় যে অংকিতৰ পৰিয়ালে চিকিৎসালয়ত উপস্থিত হৈ জৰুৰীকালীন বিভাগটো লণ্ডভণ্ড কৰাৰ লগতে চৰকাৰী নথিপত্ৰ ফালি পেলায় আৰু চিকিৎসকসকলক আক্ৰমণ কৰে। মহিলা চিকিৎসকসকলে শৌচাগাৰত সোমাই আত্মৰক্ষা কৰিবলৈ চেষ্টা কৰিছিল যদিও উন্মত্ত লোকে শৌচাগাৰৰ দৰ্জাখনো ভাঙিবলৈ চেষ্টা চলাইছিল। তেনে সময়তে আৰক্ষী উপস্থিত হৈ পৰিস্থিতি নিয়ন্ত্ৰণ কৰে।
আৰক্ষী অধীক্ষক দ্বিবেদীয়ে জনোৱা মতে, কোতোৱালী আৰক্ষী থানাত পৰিয়ালৰ লোক আৰু অন্যান্য উপদ্ৰৱকাৰীসকলৰ বিৰুদ্ধে ভাৰতীয় ন্যায় সংহিতাৰ ১৩১, ১৩২, ২২১, ৩২৪(৫), ৩৫১(৩) আৰু ৩৫২ ধাৰাৰ অধীনত গোচৰ ৰজু কৰা হৈছে। ইয়াৰ উপৰিও ‘ৰাজহুৱা সম্পত্তিৰ ক্ষতিসাধন প্ৰতিৰোধ আইন’ৰ ধাৰাও গোচৰটোত অন্তৰ্ভুক্ত কৰা হৈছে। সোমবাৰে মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হয়।
