প্ৰবীণ চলচ্চিত্ৰ প্ৰযোজক তথা কেন্দ্ৰীয় চলচ্চিত্ৰ প্ৰমাণীকৰণ ব’ৰ্ডৰ(CBFC) প্ৰাক্তন অধ্যক্ষ পহলাজ নিহালানীৰ দেহাৱসান ঘটিছে। মৃত্যুৰ সময়ত তেওঁৰ বয়স আছিল ৭৬ বছৰ। তেওঁৰ মৃত্যুত বলীউডত শোকৰ ছাঁ পৰিছে।
দীৰ্ঘদিন ধৰি লিভাৰ চিৰ’ছিছ ৰোগত আক্ৰান্ত হৈ যোৱা চাৰিমাহ ধৰি চিকিৎসাধীন হৈ আছিল। তেওঁ মুম্বাইৰ নানাৱতী হাস্পতালত চিকিৎসাধীন হৈ আছিল। বৃহস্পতিবাৰে (৪ জুন) তেওঁ শেষ নিশ্বাস ত্যাগ কৰে।
হিন্দী চলচ্চিত্ৰ জগতৰ চিনাকি মুখ পহলাজ নিহালানী কেৱল এজন সফল প্ৰযোজকেই নহয়, ভাৰতীয় চিনেমা চেন্সৰশ্বিপ ব্যৱস্থাৰ অন্যতম বিতৰ্কিত আৰু চৰ্চিত ব্যক্তি হিচাপেও তেওঁ পৰিচিত আছিল। ২০১৫ চনৰ পৰা ২০১৭ চনলৈকে চিবিএফচিৰ অধ্যক্ষ হিচাপে কাৰ্যনিৰ্বাহ কৰা তেওঁৰ কাৰ্যকালত কেইবাখনো ছবিৰ চেঞ্চৰশ্বিপক লৈ বিতৰ্কৰ সৃষ্টি হৈছিল।
প্ৰযোজক হিচাপে তেওঁৰ কেৰিয়াৰ দীঘলীয়া আৰু সফল আছিল। ‘ইলজাম’, ‘আখেঁ’, ‘আন্দাজ’, ‘তালাচ’কে ধৰি কেইবাখনো ব্যৱসায়িক ছবিৰ সৈতে তেওঁ যুক্ত আছিল। বলীউডত গোবিন্দৰ কেৰিয়াৰ গঢ়ি তোলাতো তেওঁ গুৰুত্বপূৰ্ণ ভূমিকা পালন কৰিছিল বুলি ধাৰণা কৰা হয়। পিছলৈ দুয়োৰে মাজত সম্পৰ্ক অৱনতি ঘটিলেও এসময়ত দুয়োৰে যুটি অতি সফল হৈছিল।
মাত্ৰ কেইসপ্তাহমানৰ আগতে পহলাজ নিহালানীয়ে চলচ্চিত্ৰ জগতৰ বিভিন্ন বিষয়ত নিজৰ মতামত ৰাজহুৱাভাৱে প্ৰকাশ কৰা দেখা গৈছিল। অভিনেতাৰ বৰ্ধিত খৰচ আৰু উদ্যোগটোৰ পৰিৱৰ্তিত সংস্কৃতিৰ বিষয়ে তেওঁ সৰৱ হৈছিল। তেওঁৰ মৃত্যুত চলচ্চিত্ৰ জগতৰ বহু সদস্যই শোক প্ৰকাশ কৰিছে। বৃহস্পতিবাৰে বিয়লি ৩ বজাত মুম্বাইত তেওঁৰ শেষকৃত্য সম্পন্ন কৰা হ’ব।
