দীৰ্ঘদিন ধৰি শাৰীৰিক অসুস্থতা, জীৱন সংগ্ৰামৰ অন্তত জনপ্ৰিয় কণ্ঠশিল্পী অৰুণ দাসে চিৰবিদায় মাগিলে। দেওবাৰে পুৱা ৪-৪৫ বজাত শেষ নিশ্বাস ত্যাগ কৰে জনপ্ৰিয় শিল্পীগৰাকীয়ে। আৱেগ গধূৰ গীতৰ জৰিয়তে শ্ৰোতাৰ মন উদ্বেলিত কৰি তুলিছিল দৰদী কণ্ঠশিল্পীগৰাকীয়ে।
হাতত গীটাৰখন লৈ মঞ্চত উঠি দৰ্শকৰ মন কাঢ়ি লোৱা ৰোমান্টিক গানৰ অদ্বিতীয় শিল্পী আছিল অৰুণ দাস।
নব্বৈৰ দশকত তেওঁৰ জনপ্ৰিয় গানসমূহ সংগীতপ্ৰেমীসকলৰ বাবে আজিও এক নষ্টালজিক ভাৱনা। ‘তুমি জানো জানা সোণ কিমান মৰম তোমালৈ সাঁচিছিলো গোপনে গোপনে’, ‘ভুল নুবুজিবা’, ‘নালাগে মৰম’, ‘অকলে অকলে মই কিমান কান্দিম’, ‘মনৰ যাতনা তুমি নুবুজা’ আদি গীতেৰে তেওঁ শ্ৰোতাৰ মন জয় কৰি থৈছে।
তেওঁৰ গীতবোৰ আজিও জনপ্ৰিয় যদিও অসমীয়া সংগীতৰ নতুন ধাৰাৰ ধামখুমীয়াৰ মাজত যেন হেৰাই যোৱাৰ উপক্ৰম হৈছিল তেওঁৰ সেই দৰদী কণ্ঠ। মহানগৰীৰ এটা ভাড়াঘৰতে জীৱনৰ শেষ সময়খিনি পাৰ কৰিছিল। অসুস্থ, জীৱন সংগ্ৰামত প্ৰায় ক্লান্ত মানুহজনক তেওঁৰ কিছুমান অনুৰাগীয়ে সহায় কৰিছিল।
অসমীয়া সংগীতত প্ৰেম-বিৰহৰ আবেগ গধূৰ ৰোমান্টিক গানৰ অতুলনীয় স্ৰষ্টা শিল্পীগৰাকীৰ বিয়োগত সংগীতপ্ৰেমী, অনুৰাগীসকলৰ মাজত শোকৰ ছাঁ পৰিছে।
