যোৱা ৪ জানুৱাৰিত সমাপ্ত হোৱা দ্বিতীয় চৰাইদেউ মহোৎসৱৰ অন্তিম নিশা সংগীতানুষ্ঠানৰ মাজতে জনপ্ৰিয় শিল্পী জুবিন গাৰ্গে অসম পৰ্য্যটনৰ ব্ৰেণ্ড এম্বেছাডৰ প্ৰিয়ংকা চোপ্ৰাৰ নাম সাঙুৰি পৰ্য্যটন বিভাগক কৰা ক্ষুৰধাৰ সমালোচনাৰ ভিডিঅ’টো ছ’চিয়েল মিডিয়াত ভাইৰেল হৈ পৰিছে। হাজাৰ হাজাৰ য়ুজাৰে বিভিন্ন উৎসত থকা এই ভিডিঅ’টো শ্বেয়াৰ কৰি জুবিনলৈ সমৰ্থন আগ বঢ়াইছে।
“জুবিনে যি কৈছে, তাত সত্যতা আছে”, এজন য়ুজাৰে তেওঁৰ কমেণ্টত কয়। আন এজনে লিখিছে “এশ শতাংশই সত্য কথাই কৈছে”।
“আজিৰ দিনত অসমত উচিত কথা কোৱা এজনেই মানুহ আছে,তেওঁ হৈছে জুবিন।” আন এজনৰ মন্তব্য।
উল্লেখযোগ্য যে ৪ জানুৱাৰিৰ ৰাতি চৰাইদেউৰ সংগীতানুষ্ঠানটোৰ সময়ত জনপ্ৰিয় শিল্পীজনে বিশেষকৈ অসম পৰ্য্যটনে নিৰ্মাণ কৰা ইয়াৰ অছ’ম আছাম (Awesome Assam) শীৰ্ষক বিজ্ঞাপনটো সন্দৰ্ভত বিভিন্ন প্ৰশ্ন উত্থাপন কৰে। তেওঁ বিজ্ঞাপনটোত অসমৰ বাঘ, হাতী, গঁড়, গিবন আদিৰ পৰিৱৰ্তে প্ৰিয়ংকা চোপ্ৰাহে থকা বুলি কয়। “অছ’ম আছাম মানে প্ৰিয়ংকা চোপ্ৰা নেকি?” প্ৰশ্ন শিল্পীজনৰ।
তেওঁ আন কিছুমান ৰাজ্যৰ পৰ্য্যটন বিভাগৰ কামৰ উদাহৰণ দাঙি ধৰি কৈছিল, “মণিপুৰ চৰকাৰৰ ইমান ধুনীয়া, কেৰালাৰ ইমান ধুনীয়া। আমাৰ অকল প্ৰিয়ংকা চোপ্ৰা।”
নিজৰ স্বাভৱসুলভ বাকভংগিৰে শিল্পীজনে কয়, “মই যি কওঁ সঁচা কওঁ, চিধা কওঁ। এই অছ’ম আছাম যে প্ৰিয়ংকা চোপ্ৰা কিয় ওলাল কিয় তাত? প্ৰিয়ংকা চোপ্ৰা ক’ৰ পৰা সোমালহি? তেখেত গঁড়ো নহয়, বাঘো নহয়।”
“প্ৰিয়ংকা চোপ্ৰা থাকক, একো নাই। কিন্তু কেৱল তেওঁ ওলাই থাকিলেই নহ’ব নহয়। আমাৰ গঁড়টো ওলাব লাগিব, বাঘটো ওলাব লাগিব, ধনেশ পক্ষীটো ওলাব লাগিব, গিবনটো ওলাব লাগিব।” জুবিনে কয়।
গিবনকেইটাই হাতত কমলা খায়। মই জানো। মই জংঘলৰ লগততো। এইবোৰ প্ৰিয়ংকা চোপ্ৰাই নাজানে, যিকেইটাই বনাইছে সেইকেইটায়ো নাজানো।”
“ঠিক আছে, লওক বাৰু। লৈছে বেয়া পোৱা নাই। কিন্তু অকল তেওঁকে দেখুৱাই থাকিলে। বাকী একো নেদেখুৱালে। অছ’ম আছাম মানে প্ৰিয়ংকা চোপ্ৰা নেকি?” জুবিনৰ প্ৰশ্ন।
তাৰ পিছতে তেওঁ কয়, “টুৰিজম ডিপাৰ্টমেণ্টক কওঁ, যিটো বনাইছে, সেইটো ঘেণ্টা, ঘেণ্টা বনাইছে।”, “মই গঁড় পোহা মানুহ”।
“এইবোৰ বিভাগ আমাৰ দৰে মানুহক চম্ভালিবলৈ দিব লাগে।” বুলি কৈ পুনৰ স্পষ্ট কৰে, “কেতিয়াও মই ৰাজনীতিত নাহো। কিন্তু এইবোৰ কৰাৰ বাবে আমি যোগ্য মানুহ।”
আনহাতে অসম সাহিত্য সভাৰ সভাপতি পৰমানন্দ ৰাজবংশীকো সমালোচনা কৰে শিল্পীজনে। “পৰমানন্দ ৰাজবংশীয়ে লেকচাৰ দিলে বহুত দেৰি আৰু মোক বহুৱাই থ’লে ডেৰ ঘণ্টা।” জুবিনৰ অভিযোগ।
“তেওঁ এবাৰ গুৱাহাটী সাহিত্য সভাত মোক মাতি লৈ গ’ল। ‘জুবিন আমাৰ পইচা-পাতি নাই। সাহিত্য সভা।’ মোক ক’লে। মই ক’লো, ‘ঠিক আছে, পইচা নালাগে বাৰু।‘
মই এঘণ্টা এনেয়ে গান গালো। তাৰ পাছত এটা মস্ত পেকেট দিছে। মই কিতাপ দিছে বুলি ভাবিছো। ঘৰলৈ লৈ গ’লো। পুৱা সেইটো খুলি দেখিছো, মুলতানী মিত্তি, ফেশ্ব ৱাছ।”
“মোৰ খং উঠাৰ কাৰণ আছে। মই আজিহে পৰমানন্দ ৰাজবংশীক ডাইৰেকটলি গালি পাৰিছো। মই ডাইৰেকটলি গালি পাৰো চবকে।” জুবিনে কয়।
আনহাতে ‘জাতি-মাটি-ভেটি শ্ল’গান’কো উপলুঙা কৰে শিল্পীজনে। জাতি-মাটি-ভেটিৰ পিছত এইটো থাকিবগৈ বুলি তেওঁ নিজৰ টিকাটো দেখুৱায় শিল্পীজনে।
উল্লেখযোগ্য যে অসমৰ পৰ্য্যটন বিভাগে বনোৱা অছ’ম আছাম (Awesome Assam) শীৰ্ষক বিজ্ঞাপনটোক লৈ পূৰ্বেও বহুজনে সমালোচনা কৰিছিল। বিজ্ঞাপনটোত অসমৰ পৰ্য্যটন ক্ষেত্ৰৰ বিভিন্ন ঐশ্বৰ্য্যবোৰ দেখুওৱাৰ ঠাইত প্ৰিয়ংকা চোপ্ৰাৰ বিভিন্ন মুহূৰ্তবোৰহে দেখুওৱা হৈছে বেছিকৈ।
