পৰিৱৰ্তনকামী চৰকাৰে দেশ আধুনিকীকৰণৰ বাবে বিভিন্ন কাৰ্য পন্থা হাতত লোৱা পৰিলক্ষিত হৈছে। কিন্তু তাৰ ভিতৰত বিদ্যুৎ বিভাগটো কিমান আধুনিকীকৰণ হৈছে তাৰেই বাস্তৱ নিদৰ্শন দাঙি ধৰিছে বঙাইগাঁৱৰ দেউটাৰীৰ ৰাইজে।
বঙাইগাঁও জিলাৰ ৩৪ নং অভয়াপুৰী উত্তৰ বিধান সভা সমষ্টিৰ অন্তৰ্গত তথা বিজনী বিদ্যুৎ উপসংমণ্ডলৰ এলেকাধীন দেউটাৰীত আজি স্থানীয় ৰাইজে এক উত্তাল প্ৰতিবাদ সাব্যস্ত কৰে । শক্তি মন্ত্ৰী তপন গগৈৰ পুত্তলিকা দাহ কৰি স্থানীয়লোকে এই প্ৰতিবাদ সাব্যস্ত কৰা দেখা যায়।
উল্লেখ্য যে গাঁওখনৰ প্ৰায় দুশ টা পৰিয়ালে মাত্ৰ ১৬ KV ট্ৰান্সফৰমাৰৰ পৰা বিদ্যুৎ সংযোগ লৈ আছে। এই ট্ৰান্সফৰমাৰটোৰ পৰা ৰাইজৰ কোনো উপকাৰ নহয় বুলি জানিব পৰা গৈছে। ১৬ KV ট্ৰান্সফৰমাৰে যি পোহৰৰ যোগান ধৰে সেই পোহৰেৰে ৰাতি ছাত্ৰ-ছাত্ৰী সকলে পঢ়িব নোৱাৰে। পঢ়া-শুনাৰ লগতে অন্যান্য কাম-কাজ কৰিবলৈ অঞ্চলবাসীয়ে চাকি ব্যৱহাৰ কৰিব লাগে বুলি মন্তব্য কৰে।
ইফালে উক্ত সমস্যাৰ উপৰি অঞ্চলটোত কৰবাত যদি বিদ্যুতৰ তাঁৰ হাতেৰে চুব পৰা অৱস্থাত আছে, কৰবাত আকৌ গছত ওলোমাই থৈছে। কোনো কোনো ঠাইত তাৰসমূহ ছিঙি যোৱাত মাজে মাজে বিপদসংকুলভাৱে সংযোগ দিয়া হৈছে। ইয়াৰ পাছতো আজিলৈ বিজনী বিদ্যুৎ উপসংমণ্ডলে কোনো ধৰণৰ ব্যৱস্থা লোৱা নাই বুলি স্থানীয় ৰাইজে অভিযোগ উত্থাপন কৰে।
উল্লেখযোগ্য যে প্ৰাক্তন বিধায়ক ভূপেন ৰায় তথা বৰ্তমানৰ বিধায়ক আব্দুল হাই নাগৰীকে গাঁওখনত ট্ৰান্সফৰমাৰৰ সমস্যা সমাধানৰ বাবে বিভাগটোক বহুবাৰ অনুনয় বিনয় কৰিছিল যদিও আজিলৈ বিজনী বিদ্যুৎ উপসংমণ্ডল বিষয়াই কোনো গুৰুত্ব প্ৰদান কৰা নাই।
সেয়ে আজি পুৱাই স্থানীয় পুৰুষ-মহিলাই হাতে হাতে চাকি, লেম্প আদি লৈ এক অভিনৱ প্ৰতিবাদ সাব্যস্ত কৰে। প্ৰতিবাদস্থলীত অসম চৰকাৰ হায় হায়, শক্তি মন্ত্ৰী হায় হায়, তপন গগৈ মুৰ্দাবাদ, বিজনী বিদ্যুৎ উপসংমণ্ডলৰ মইমতালি নচলিব, আমাক নিয়মীয়া বিদ্যুতৰ ব্যৱস্থা কৰক আদি শ্লোগানেৰে কঁপাই তোলে দেউৰটাৰী।
আনহাতে চৰকাৰ বিৰোধী শ্লোগান আৰু বিদ্যুৎ বিভাগ বিৰোধী শ্লগান দিয়াৰ লগতে প্ৰতিবাদকাৰী সকলে শক্তি মন্ত্ৰী তপন গগৈৰ পুত্তলিকা দাহ কৰে। প্ৰতিবাদস্থলৰ পৰাই প্ৰতিবাদকাৰী সকলে চৰকাৰ বা বিদ্যুৎ বিভাগে শীঘ্ৰে ৬৫বা ১শ কেভিৰ ট্ৰান্সফৰমাৰ ব্যৱস্থা নকৰিলে কাৰ্য্যালয় ঘেৰাও কৰিব বুলি সকিয়াই দিয়ে।