তিনিচুকীয়া জিলাৰ দিগবৈ বন সংমণ্ডলৰ অন্তৰ্গত তিৰাপ সংৰক্ষিত বনাঞ্চলত লাইকাৰ বানপীড়িত পৰিয়ালক সংস্থাপন কৰাৰ চৰকাৰী পৰিকল্পনাক লৈ স্থানীয় ৰাইজৰ মাজত তীব্ৰ উত্তেজনাৰ সৃষ্টি হৈছে। লেখাপানী ৰেঞ্জৰ অধীনত থকা এই বনাঞ্চলত প্ৰায় ৩০০ টা বানপীড়িত পৰিয়ালক পুনৰ সংস্থাপন কৰাৰ যি প্ৰস্তাৱিত আঁচনি লোৱা হৈছে, তাক লৈ ফেনেং কেনিয়া আৰু বালিজান গাঁৱৰ ৰাইজে তীব্ৰ বিৰোধিতা কৰিছে। এই পৰিকল্পনা কাৰ্যকৰী হ’লে পৰিৱেশৰ ক্ষতি হোৱাৰ লগতে বন্যপ্ৰাণীৰ সুৰক্ষা বিঘ্নিত হোৱা আৰু অঞ্চলটোত হাতী-মানুহৰ সংঘাত অধিক বৃদ্ধি পোৱাৰ আশংকা কৰিছে ৰাইজে।
যোৱা ১ মে’ত ফেনেং গাঁৱৰ নামঘৰ প্ৰাংগণত এই সন্দৰ্ভত এখন বিশাল ৰাজহুৱা সভা অনুষ্ঠিত হয়। এই সভাত ৫০০ ৰো অধিক স্থানীয় লোকে অংশগ্ৰহণ কৰি চৰকাৰী পদক্ষপৰ বিৰুদ্ধে প্ৰতিবাদ সাব্যস্ত কৰে। চৰকাৰৰ এই কাৰ্যৰ বিৰোধিতা কৰিবলৈ সভাতে ৪১ জনীয়া সদস্যৰে গঠিত ফেনেং কেনিয়া-বালিজান গাঁও ভূমি সুৰক্ষা সমিতি নামৰ এখন শক্তিশালী কমিটী গঠন কৰা হয়। এই সমিতিখনৰ সভাপতি হিচাপে শিখৰ ফুকন আৰু কাৰ্যকৰী সভাপতি হিচাপে ইন্দ্ৰেশ্বৰ কোঁৱৰক দায়িত্ব অৰ্পণ কৰা হৈছে। ইয়াৰ উপৰিও প্ৰভাত গগৈ আৰু জয়ন্ত গোহাঁইক যুটীয়া সম্পাদক তথা বিপুল গগৈক সাংগঠনিক সম্পাদক হিচাপে নিৰ্বাচিত কৰা হয়।
সমিতিয়ে এক সিদ্ধান্ত গ্ৰহণ কৰি ঘোষণা কৰিছে যে কোনো কাৰণতে তিৰাপ সংৰক্ষিত বনাঞ্চলত লাইকাৰ বানপীড়িত লোকক সংস্থাপন কৰিবলৈ দিয়া নহ’ব। গাঁওবাসীৰ মতে, এই বন অঞ্চলটো বহুতো মূল্যবান গছ-গছনি আৰু বন্যপ্ৰাণীৰ এক গুৰুত্বপূৰ্ণ বাসস্থান। অঞ্চলটোত ইতিমধ্যে হাতী-মানুহৰ তীব্ৰ সংঘাত চলি আছে আৰু পূৰ্বতে এনে সংঘাতৰ ফলত কেইবাজনো লোকে প্ৰাণো হেৰুৱাইছে। তেনেস্থলত বনাঞ্চলৰ ভিতৰত নতুনকৈ জনবসতি স্থাপন কৰিলে পৰিৱেশৰ ওপৰত অধিক চাপ পৰিব আৰু ইয়াৰ ফলত বনৰীয়া জন্তুৰ আক্ৰমণ বৃদ্ধি পাই জনসাধাৰণৰ জীৱন অধিক বিপন্ন হ’ব পাৰে বুলি তেওঁলোকে অভিযোগ কৰিছে।
আগন্তুক এসপ্তাহৰ ভিতৰত এই নতুন সমিতিয়ে তিনিচুকীয়াৰ জিলা উপায়ুক্ত, দিগবৈৰ বন সংমণ্ডল বিষয়া, মাৰ্ঘেৰিটাৰ মহকুমাধিপতি, চক্ৰ বিষয়া আৰু স্থানীয় আৰক্ষী কৰ্তৃপক্ষক স্মাৰক পত্ৰ প্ৰদান কৰি এই সংস্থাপনৰ পৰিকল্পনা বন্ধ কৰিবলৈ দাবী জনাব। স্থানীয় ৰাইজে চৰকাৰক সকীয়াই দিছে যে যদিহে চৰকাৰে তেওঁলোকৰ এই দাবী মানি নলয় আৰু এই সিদ্ধান্তৰ ওপৰত পুনৰ বিবেচনা নকৰে, তেন্তে অনাগত দিনত হাজাৰ হাজাৰ লোক ৰাজপথলৈ ওলাই আহিব। তেওঁলোকে চৰকাৰৰ বিৰুদ্ধে এক বৃহৎ গণতান্ত্ৰিক আন্দোলন গঢ়ি তুলিব বুলিও হুংকাৰ প্ৰদান কৰিছে।
