সোণম ৱাংচুকৰ গ্ৰেপ্তাৰৰ পাছতে লেহত নিয়ন্ত্ৰণলৈ আহিছে হিংসা, কেন্দ্ৰীয় চৰকাৰৰ এই মন্তব্যৰ জৰিয়তে লাডাখৰ পৰিস্থিতিক লৈ এক গুৰুত্বপূৰ্ণ তথ্য পোহৰলৈ আহিছে। উচ্চতম ন্যায়ালয়ত চলি থকা এক শুনানিৰ সময়ত কেন্দ্ৰীয় চৰকাৰে স্পষ্ট কৰি দিয়ে যে জলবায়ু কৰ্মী সোণম ৱাংচুকৰ ডিটেইন বা আটক কৰাৰ পাছতে অঞ্চলটোত চলি থকা উত্তেজনা আৰু হিংসাত্মক কাৰ্যকলাপ বহুখিনি শাম কাটিছে। চৰকাৰৰ মতে যোৱা বছৰৰ ২৪ ছেপ্টেম্বৰত লেহত সংঘটিত হোৱা হিংসাৰ আঁৰত ৱাংচুকৰ উচতনি আছিল আৰু তেওঁক আটক কৰাৰ সিদ্ধান্তটো আইনগতভাৱে সম্পূৰ্ণ সঠিক আছিল।
কেন্দ্ৰীয় চৰকাৰৰ হৈ অতিৰিক্ত ছলিচিটৰ জেনেৰেল কে এম নটৰাজে ন্যায়ালয়ত কয় যে যোৱা বছৰৰ সেই হিংসাত্মক ঘটনাত ৪ জন লোকৰ মৃত্যু হৈছিল আৰু ৬০ জন লোক আহত হৈছিল। তেওঁ আদালতক জনায় যে ৱাংচুকৰ আটকৰ নিৰ্দেশনাটো সকলো আইনী প্ৰক্ৰিয়া মানি জাৰি কৰা হৈছিল আৰু ইয়াৰ পাছতে পৰিস্থিতি শান্ত হৈছিল। চৰকাৰৰ মতে ৰাজহুৱা শান্তি বৰ্তাই ৰখাৰ বাবে এনে পদক্ষেপ গ্ৰহণ কৰাটো আৱশ্যকীয় আছিল। সম্প্ৰতি ৰাজস্থানৰ যোধপুৰ জেলত বন্দী হৈ থকা ৱাংচুকৰ স্বাস্থ্যৰ সন্দৰ্ভতো চৰকাৰে আদালতক অৱগত কৰিছে যে তেওঁ সম্পূৰ্ণ সুস্থ আছে আৰু তেওঁক নিয়মিতভাৱে চিকিৎসা পৰীক্ষা কৰা হৈছে।
আনহাতে সোণম ৱাংচুকৰ পত্নী গীতাঞ্জলি আঙমোৱে এই আটকৰ বিৰুদ্ধে এখন আবেদন দাখিল কৰিছে। তেওঁ অভিযোগ কৰিছে যে ৰাষ্ট্ৰীয় সুৰক্ষা আইনৰ অধীনত তেওঁৰ স্বামীক আটক কৰাটো অবৈধ। তেওঁৰ মতে ২৪ ছেপ্টেম্বৰৰ হিংসাৰ বাবে ৱাংচুক কোনোমতে দায়ী নহয়। বৰঞ্চ সেই সময়ত ৱাংচুকে ছচিয়েল মিডিয়াৰ জৰিয়তে শান্তি বজাই ৰাখিবলৈহে আহ্বান জনাইছিল আৰু হিংসাক গৰিহণা দিছিল। তেওঁ কৈছিল যে হিংসাই লাডাখৰ পাঁচ বছৰীয়া শান্তিপূৰ্ণ সংগ্ৰামক ক্ষতিগ্ৰস্ত কৰিব। বৰ্তমান এই সমগ্ৰ বিষয়টো উচ্চতম ন্যায়ালয়ৰ বিচাৰাধীন হৈ আছে আৰু অহা ১৬ ফেব্ৰুৱাৰীত ইয়াৰ পৰৱৰ্তী শুনানি গ্ৰহণ কৰা হ’ব।
