অধিনায়কৰ চাপ মূৰত লৈ ভাল প্ৰদৰ্শন আগবঢ়োৱাটো ইমান সহজ কথা নহয়। বিশ্বৰ বহু দুৰ্দান্ত ক্ৰিকেটাৰেই এই ভূমিকাত ব্যৰ্থ হোৱাৰ উদাহৰণ আছে।
এইক্ষেত্ৰত বিৰাট কোহলি অৱশ্যেই অনন্য। অধিনায়ক হিচাপে এটাৰ পাছত আন এটা ছিৰিজ জয়ৰ অভিলেখ গঢ়ি যোৱাৰ সমান্তৰালকৈ হাতত বেট লৈও চমক দেখুৱাইছে বিৰাটে।
দলৰ নেতৃত্ব আৰু বেটিঙৰ মাজত সুষম সন্তুলনৰ বাবেই নৱবৰ্ষৰ আৰম্ভণিতেই কোহলি অধিকাৰী হ’ল এটি নতুন অভিলেখৰ।
আইচিচিৰ বৰ্ষশ্ৰেষ্ঠ এদিনীয়া তথা টেষ্ট দলৰ অধিনায়ক হিচাপে নিৰ্বাচিত হৈছে কোহলি।
দেওবাৰে অষ্ট্ৰেলিয়াৰ বিৰুদ্ধে ছিৰিজ জয়ৰ পাছতে অধিনায়ক কোহলিৰ প্ৰশংসা পঞ্চমুখ হৈ পৰিছে পাকিস্তানৰ প্ৰাক্তন ফাষ্ট বলাৰ ছোয়েব আখতাৰ।
আখতাৰে কয়,’’তেওঁ অসাধাৰণ নেতা আৰু মানসিকভাৱে অত্যন্ত দৃঢ়। কিদৰে উভতি ধৰিব লাগে সেয়া ভালকৈয়ে জানে। পাছ পৰিলেও হাৰ নামানে। কাৰো সৈতে যদি ৰোহিত শৰ্মা, শিখৰ ধাৱান, শ্ৰেয়াস তথা কে এল ৰাহুলৰ দৰে প্ৰতিভা থাকে তেতিয়াতো কথাই নাই। বেংগালুৰুৰ দৰে খেলপথাৰত ৩০০ ৰাণত সীমিত ৰাখিব পাৰিলে সেয়া অতিক্ৰম কৰিবলৈ চিন্তাই কৰিব নালাগে।‘’
দলৰ সাফল্যৰ লগে লগে দেওবাৰে কোহলিয়ে ব্যক্তিগত অভিলেখো গঢ়িলে।
ভাৰতীয় অধিনায়কগৰাকীয়ে ৯১ টা বলত ৮৯ৰাণৰ এক অনবদ্য ইনিংছ খেলে। কোহলিয়ে অধিনায়ক হিচাপে সকলো ফৰমেট মিলি সৰ্বোচ্চ ৰাণৰ অধিকাৰী হয়।
কোহলিয়ে মুঠতে কৰিছে ১১হাজাৰ ২০৮ৰাণ। টীম ইণ্ডিয়াৰ কোনো অধিনায়কৰ এইটোৱে সৰ্বোচ্চ ৰাণ।
ইমানদিনে ৩৩০ টা ইনিংছ খেলি ১১ হাজাৰ ২০৭ৰাণ কৰি তালিকাৰ শীৰ্ষত আছিল প্ৰাক্তন অধিনায়ক মহেন্দ্ৰ সিং ধোনী। কোহলিয়ে ১৯৯ টা ইনিংছতে অতিক্ৰম কৰিলে ধোনীক।
এই তালিকাৰ তৃতীয় আৰু চতুৰ্থ স্থানত আছে ক্ৰমে মহম্মদ আজাহাৰুদ্দিন (৮০৯৫) আৰু সৌৰভ গাংগুলী (৭৬৪৩)।
অধিনায়ক হিচাপে কোহলিৰ এই অভিলেখৰ উপৰি বেটছমেন হিচাপে কোহলিৰ অভিলেখ আৰু অধিক ঈৰ্ষণীয়।
কোহলিয়ে এদিনীয়াত ইতিমধ্যে ১১,৭৯২ৰাণ কৰিছে। টেষ্ট আৰু টী-২০ত কোহলিৰ সংগ্ৰহ হ’ল ক্ৰমে ৭২০২ আৰু ২৬৮৯ ৰাণ। বিৰাটৰ আছে মুছ ৭০টা শতৰাণৰ অভিলেখো।
বিশ্ব ক্ৰিকেটত বিৰাট কোহলিৰ এই অপ্ৰতিৰোধ্য অশ্বমেধৰ ঘোঁৰা সহজতে থমকি ৰোৱাৰ সম্ভাৱনা তেনেই ক্ষীণ।
