২২ গজৰ যুঁজক্ষেত্ৰ। হাতত বেট লৈ বীৰদৰ্পে ‘যুঁজাৰু’ মহানায়ক; কান্ধত দেশবাসীৰ অযুত বিশ্বাসৰ বোজা; চকুত অদম্য আত্মবিশ্বাস, যেন হাতৰ মুঠিতে আছে সম্ভৱপৰ সকলো! ক্ৰিকেট বিশ্বৰো যে দৃষ্টি নিবদ্ধ এই মহানায়কগৰাকীৰ ওপৰতে!
অবিস্মৰণীয় গতিৰে তেওঁ ক্ৰিকেট বিশ্বত আনষ্টপেবল; বিশেষজ্ঞ আৰু অনুৰাগীৰ চকুত ৰাণ মেচিন। হাতত বেট লৈ এই মহানায়কগৰাকীয়ে ৰচিছে আধুনিক ক্ৰিকেটৰ স্ব-সংজ্ঞা। অভিলেখৰ ন ন পৃষ্ঠাত লিপিবদ্ধ কৰিছে স্ব-নাম। হৈ পৰিছে ‘মডাৰ্ণ মাষ্টাৰ’।
এই মডাৰ্ণ মাষ্টৰৰে অবিশ্বাস্য, অবিস্মৰণীয় গতিয়ে পিছ পেলাই গৈছে ক্ৰিকেটৰ ভগৱানক, মাষ্টাৰ ব্লাষ্টাৰ শচীন টেণ্ডুলকাৰক। অদম্য প্ৰদৰ্শনৰ দুৰন্ত চমকেৰে আজি মুম্বাইৰ ৱাংখাড়েত ক্ৰিকেটৰ ভগৱানৰ চক্ষুৰ সমুখতে কোহলীয়ে আজি স্থাপন কৰে ন-অভিলেখ।
বিশ্বাভিলেখ সৃষ্টিৰে আজি ৰাণ মেচিন কোহলীয়ে এদিনীয়া কেৰিয়াৰত সম্পূৰ্ণ কৰে শতকৰ অৰ্ধশতক। নিজৰ ক্ৰিকেট কেৰিয়াৰৰ আদৰ্শ শচীনৰ নামত থকা সৰ্বাধিক এদিনীয়া শতকৰ অভিলেখ ভংগ কৰি ৫০ টা শতকেৰে কোহলীয়ে ৰচে ইতিহাস।
কেৰিয়াৰৰ ২৭৯ তম ইনিংছতে কোহলীয়ে এদিনীয়া কেৰিয়াৰত ৫০ শতকৰ কৃতিত্ব অৰ্জন কৰি ক্ৰিকেট বিশ্বত নিজৰ অবিস্মৰণীয় গতিৰ আন এক চাপ চিৰকাললৈ এৰি যায়। শতক সম্পূৰ্ণ কৰাৰ পিছতে খেলপথাৰতে বহি পৰি ক্ৰিকেটৰ ভগৱানক জনায় নমন।
এই ঈৰ্ষণীয় অভিলেখৰ সমান্তৰালভাৱে তাৰকাগৰাকীয়ে বিশ্বকাপৰ ইতিহাসত আন দুই অভিলেখ নিজৰ নামত সংযোজন কৰে। চলিত বিশ্বকাপত দুৰন্ত গতি অব্যাহত ৰাখি কোহলীয়ে আজিৰ শতকীয় ইনিংছটোৰে ৰাণৰ সংখ্যা ৭১১লৈ বৃদ্ধি কৰে।
লগে লগে কোহলী বিশ্বকাপ ক্ৰিকেটৰ এটা সংস্কৰণত সৰ্বাধিক ৰাণ সংগ্ৰহকাৰী ৰূপে পৰিগণিত হয়। এই ক্ষেত্ৰতো কোহলীয়ে অতিক্ৰম কৰে শচীন টেণ্ডুলকাৰক। শচীনে ২০০৩ৰ বিশ্বকাপত ৬৭৩ ৰাণ সংগ্ৰহ কৰি এই অভিলেখ দীৰ্ঘদিনে নিজৰ নামত ৰাখিছিল।
লগতে বিশ্বকাপৰ এটা সংস্কৰণত সৰ্বাধিকবাৰ ৫০ তকৈ অধিক ৰাণ সংগ্ৰহকাৰী বেটাৰ ৰূপেও স্বীকৃত হয় কোহলী। চলিত বিশ্বকাপত পাঁচটা অৰ্ধশতক আৰু ৩ টা শতকেৰে ৮ বাৰকৈ পঞ্চাধোধিক ইনিংছেৰে কোহলীয়ে শচীন আৰু ছাকিব আল হাছানক অতিক্ৰম কৰে।
