ইংলেণ্ডৰ বিৰুদ্ধে আহমেদাবাদৰ অন্তিমখন টী-২০ মেচত অপেনিং বেটছমেন হিচাপে এক বিস্ফোৰক ইনিংছ খেলি দলৰ বিজয়ত মুখ্য ভূমিকা পালন কৰা বিৰাট কোহলিয়ে এইবাৰ আগন্তুক আইপিএল আৰু বিশ্বকাপতো অপেনিং কৰাৰ বাবে মন মেলিছে।
শনিবাৰে আহমেদাবাদত ইংলেণ্ডৰ বিৰুদ্ধে পঞ্চমখন টী-২০ মেচৰ অন্তত বঁটা বিতৰণী অনুষ্ঠানত কোহলিয়ে কয়,’’মই আইপিএলতো অপেনিং কৰিম। পূৰ্বে মই বিভিন্ন স্থানত বেটিং কৰিছো। মোৰ ধাৰণা, এতিয়া আমাৰ হাতত শক্তিশালী মিডল অৰ্ডাৰ আছে।‘’
ইংলেণ্ডৰ বিৰুদ্ধে টী-২০ ছিৰিজৰ সিদ্ধান্তকাৰী মেচখনত ৰোহিত শৰ্মাৰ সৈতে কোহলিয়ে অপেনিং কৰিছিল।
কে এল ৰাহুলৰ স্থানত এগৰাকী অতিৰিক্ত বলাৰ খেলোৱাৰ সিদ্ধান্ত লৈ নিজেই অপেনিং কৰিবলৈ নামে। কোহলি ইয়াত ‘বিৰাট’ সফলো হয়। ৰোহিতৰ বিস্ফোৰক ইনিংছৰ লগতে বিৰাটৰ ৫২টা বলত কৰা অপৰাজিত ৮০ ৰাণ আছিল মেচখনৰ নিৰ্ণায়ক ইনিংছ।
এতিয়া এনে অভিজ্ঞতাৰে ভৱিষ্যতেও আগবাঢ়িব বিচাৰে। টী-২০ বিশ্বকাপতো ভাৰতৰ হৈ ইনিংছ আৰম্ভ কৰাৰ সম্ভাৱনা স্পষ্ট হৈ পৰিছে।
টীম ইণ্ডিয়াৰ অধিনায়কগৰাকীয়ে কয়,’’এতিয়া কথাটো হ’ল যে দলৰ দুগৰাকী শ্ৰেষ্ঠ খেলুৱৈয়ে টী-২০ত সৰ্বাধিক সংখ্যক বল খেলিব পাৰিব। মই টপ অৰ্ডাৰ ৰোহিতৰ সৈতে মেচত নামিব বিচাৰো। আমাৰ মাজত যুটী গঢ়ি উঠে, আৰু আমি দুজনেই ক্ৰীজত খুটি পুতি ৰ’ব পাৰো, তেতিয়াহ’লে এজনে হ’লেও বিপক্ষ দলক প্ৰহাৰ কৰিব পাৰিম।‘’
বিৰাটে কয়,’’এনেধৰণেই (বিৰাট-ৰেহিত যুটী) চলাই যাব বিচাৰো। আশা কৰো বিশ্বকাপলৈ আমি এই ফৰ্ম আগবঢ়াই লৈ যাব পাৰিম।‘’
