চীনৰ বিৰুদ্ধে ক্ৰমশঃ কঠোৰ হৈ গৈ আছে মাৰ্কিন যুক্তৰাষ্ট্ৰৰ ড’নাল্ড ট্ৰাম্প প্ৰশাসন।
চীনৰ বিপক্ষে ইটোৰ পিছত সিটো কঠোৰ সিদ্ধান্ত গ্ৰহণ কৰি থকা ড’নাল্ড ট্ৰাম্প প্ৰশাসনে এইবাৰ ১ হাজাৰ গৰাকী চীনা গেৱেষকৰ ভিছা বাতিল কৰিছে।
এই গৱেষক তথা শিক্ষাৰ্থীসকল আমেৰিকাৰ নিৰাপত্তাৰ বাবে অতিশয় বিপজ্জনক বুলি অভিহিত কৰি ভিছা বাতিল কৰিছে ট্ৰাম্প প্ৰশাসনে।
মাৰ্কিন চৰকাৰৰ এগৰাকী মুখপাত্ৰই জনাইছে যে ২৯ মে’ত ৰাষ্ট্ৰপতি ট্ৰাম্পে কৰা চৰকাৰী ঘোষণাৰ আধাৰতেই এই সিদ্ধান্ত লোৱা হৈছে।
ইফালে মাৰ্কিন হোমলেণ্ড চিকিউৰিটি ডিপাৰ্টমেন্টে দাবী কৰিছে যে গৱেষণাৰ অচিলাৰে এইসকল গৱেষক শিক্ষাৰ্থীয়ে আমেৰিকাৰ সংবেদনশীল তথ্য কৌশলগতভাৱে সংগ্ৰহ কৰি চীনা সৈন্য বাহিনীৰ হাতত অৰ্পণ কৰাতো বন্ধ কৰাৰ বাবেই এই সিদ্ধান্ত লোৱা হৈছে।
ডিপাৰ্টমেন্টৰ প্ৰধান চাড উল্ফে দাবী কৰে যে চীনৰ শিক্ষাৰ্থীসকলে ভিছাৰ অপব্যৱহাৰ কৰি ক’ৰ’ণা ভাইৰাছ আৰু শিল্প আৰু বাণিজ্য ক্ষেত্ৰৰ তথ্য চুৰিৰ দৰে গুপ্তচৰ বৃত্তি চলাই আহিছে।
তদুপৰি চীনে জিনজিয়াং অঞ্চলৰ ইছলাম ধৰ্মাৱলম্বী লোকৰ ওপৰত অমানৱীয় অত্যাচাৰ চলোৱাৰ অভিযোগ তুলিছে আমেৰিকাই। ইয়াৰ প্ৰতিবাদ হিচাপেও আমেৰিকাই এই পদক্ষেপ গ্ৰহণ কৰা বুলি জানিবলৈ দিছে।
“চীনে দাস প্ৰথাৰ মাধ্যমেৰে যিবোৰ পণ্য উৎপাদন কৰি আহিছে, সেই সকলোবোৰ পণ্যৰ ওপৰত আমেৰিকাই নিষেধাজ্ঞা আৰোপ কৰিব, চীনে মানুহক সন্মান দিবলৈ শিকে।” উল্ফ-এ কয়।
হংকঙৰ গণতান্ত্ৰিক অধিকাৰ চীনে কাঢ়ি নিছে বুলিও অভিযোগ কৰিছে মাৰ্কিন প্ৰশাসনে।
