NEET প্ৰশ্ন ফাদিলক লৈ ছ’চিয়েল মিডিয়াত চৰকাৰক তীব্ৰ সমালোচনা কৰে বিশাল দাদলানীয়ে। সূত্ৰ অনুসৰি চৰকাৰক সমালোচনা কৰাৰ বাবেই ইণ্ডিয়ান আইডলৰ বিচাৰকৰ পদৰ পৰা অপসাৰণ কৰা হৈছে বিশাল দাদলানীক। ২০২৬ চনত NEET UG পৰীক্ষা বাতিল কৰা হৈছে। প্ৰশ্নকাকত ফাদিলৰ দায়িত্ব গ্ৰহণ কৰিছে কেন্দ্ৰীয় মন্ত্ৰী ধৰ্মেন্দ্ৰ প্ৰধানে।
বিশাল দাদলানীয়ে পোষ্ট কৰা এটা ভিডিঅ’ৰ পৰাই এই বিতৰ্ক আৰম্ভ হয়। NEET প্ৰশ্নকাকত ফাদিল সন্দৰ্ভত ভিডিঅ’ বাৰ্তাযোগে বিশাল দাদলানীয়ে এইদৰে কয়, ‘অশিক্ষিত লোকক ক্ষমতাত বহিবলৈ নিদিব’। তেওঁ আক্ষেপ কৰে এই দেশৰ কি হৈছে! NEET পৰীক্ষাৰ প্ৰশ্নকাকত ফাদিলৰ বাবে যিসকল ছাত্ৰ-ছাত্ৰীয়ে সমস্যাৰ সন্মুখীন হৈছে তেওঁলোকৰ সমৰ্থনত এই ভিডিঅ’টো বনাইছো। কষ্টৰ অপচয়, সময়ৰ অপচয়, যিয়ে হয়তো বছৰটো হেৰুৱাব। এইটো সঁচা যে প্ৰতিবাৰেই NEET পৰীক্ষা অনুষ্ঠিত হয়, কিন্তু এই ভুলৰ সমৰ্থন কৰিব নোৱাৰি। চৰকাৰী সংস্থা এটাই আয়োজন কৰা এই পৰীক্ষাত ইমান ডাঙৰ কেলেংকাৰিৰ কোনো দায়িত্ব চৰকাৰে লোৱা নাই, এইটো ডাঙৰ ভুল। দায়িত্বত বহি মন্ত্ৰীসকলে কিন্তু কৈছে যে এইটোনো কি ডাঙৰ কথা! মই পদত্যাগ নকৰো।” বিশাল দাদলানীয়ে এই কাণ্ডক পোনপটীয়াকৈ ‘লজ্জাজনক, অপমানজনক’ বুলি অভিহিত কৰে।
বিশালে কয়, দুৰ্ভাগ্যজনকভাৱে এতিয়া শিক্ষাৰ মূল্য নাই, ক্ষমতাত থকা লোকসকল নিৰক্ষৰ। এই কথা কোৱাৰ পাছত বিশালে স্পষ্টকৈ কয়, এই কাৰণেই ভাৰতৰ পৰিস্থিতি দুখজনক৷ মোৰ কথা ভাল পাওক বা নাপাওক, গ্ৰহণ কৰক বা বিৰোধিতা কৰক, এইটোৱেই সত্য।”
বিশালে ভিডিঅ’টোত আবেদন জনাইছে, ভাল মানুহে শিক্ষিত লোকক ভোট দিয়ে। যদি জাতি, ধৰ্ম, বৰ্ণ আদিৰ ওপৰত উঠি নিজৰ ভৱিষ্যত, দেশৰ ভৱিষ্যত ৰক্ষা কৰিব লাগে, তেন্তে আমি ভাল মানুহ নিৰ্বাচন কৰিব লাগিব। মূৰ্খ নিৰক্ষৰ মানুহক ক্ষমতালৈ আনিব নালাগে, তেওঁলোক আপোনাৰ জাতিৰে হওক বা আপোনাৰ পৰিয়ালৰে হওক।”
