ৰাজ্যখনৰ বিত্ত মন্ত্ৰী তথা বিজেপি নেতা ড০ হিমন্ত হিশ্ব শৰ্মাই মঙলদৈৰ খিলঞ্জীয়া ভোটাৰসকলক তেওঁলোকৰ নতুন প্ৰজন্মৰ ভৱিষ্যতৰ কথা চিন্তা কৰি বিজেপি প্ৰাৰ্থীগৰাকীক ভোট দিবলৈ আহ্বান জনায়।
সোমবাৰে সন্ধিয়া মঙলদৈ লোকসভা সমষ্টিৰ বিজেপি প্ৰাৰ্থী দিলীপ শইকীয়াৰ নিৰ্বাচনী প্ৰচাৰৰ অংশ হিচাপে মঙলদৈ বিদ্যাপীঠ খেলপথাৰত অনুষ্ঠিত এখন বিশাল নিৰ্বাচনী সভাত ভাষণ দি হিমন্তই এইদৰে কয়।
‘’ৰাজ্যখনৰ ১২খন জিলাত খিলঞ্জীয়া লোকসকলৰ ভৱিষ্যত অতি বিপদজনক হৈ পৰিছে। সেয়ে বিজেপিক জিকাবলৈ বা দিলীপ শইকীয়াক জিকাবলৈ নহয়,নতুন প্ৰজন্মৰ ভৱিষ্যতৰ কথা চিন্তা কৰি আমাক ভোট দিয়ক,’’-হিমন্তই কয়।
ইয়াৰ পূৰ্বে বিজেপিৰ ষ্টাৰ কেম্পেইনাৰ নেতাগৰাকীয়ে সন্ধিয়া প্ৰায় ৫ বজাত চপাইত উত্তৰ মঙলদৈ হাইস্কুলৰ খেলপথাৰত হেলিকপ্টাৰৰ পৰা নামি চহৰখনৰ অতি ঘন বসতিপূৰ্ণ ৰাস্তাৰ মাজেৰে বৰুৱাপাৰা, শান্তিপুৰ, এল এন বি ৰোড, টেঙাবাৰী হৈ কৰিমচ’ক আৰু বিদ্যাপীঠ স্কুললৈ এক ৰোড শ্বোৰ নেতৃত্ব দিয়ে।
ৰোড শ্বোৰ নেতৃত্বত যোৱা শৰ্মাক এক বৃহৎ সংখ্যক লোকে বিভিন্ন চাৰিআলি, আৰিমূৰ আৰু তেওঁলোকৰ ঘৰৰ সন্মুখত ফুল, বিহুৱান আদিৰে আদৰণি জনায়।
মঙলদৈ সমষ্টিৰ বিধায়ক গুৰুজ্যোতি দাস আৰু সমষ্টিটোৰ দলীয় প্ৰাৰ্থী দিলীপ শইকীয়াইয়ো এই প্ৰায় পাঁচক কিলোমিটাৰ জোৰা পদযাত্ৰাত শৰ্মাক সংগ দিয়ে।
