জুবিন আৰু গৰিমা গাৰ্গক লক্ষ্য কৰি ফেইচবুকত অতি অশ্লীল পোষ্ট দিয়া আৰু জুবিনক সন্মুখত পালেই হত্যাৰ ভাবুকি দিয়া ঘটনাটোৰ ৰহস্য প্ৰায় ভেদ হোৱাৰ পথত। সংগীত-চিনেমাৰ জগতখনৰ কৰ্মী লুইত কুমাৰ বৰ্মনক বদনামী কৰিবলৈকে যে উক্ত বিতৰ্কিত পোষ্টটো তেওঁ দিয়া বুলি প্ৰচাৰ কৰা হৈছিল সেইটো প্ৰায় স্পষ্ট হৈ পৰিছে।
আৰক্ষীয়ে ইতিমধ্যে এই সন্দৰ্ভত নিজকে জুবিনৰ ডাই হাৰ্ড ফেন বুলি চিনাকি দিয়া চাও জিতুমণি গগৈ নামৰ এজন যুৱকক হোজাইৰ পৰা আটক কৰি মহানগৰৰ পল্টন বজাৰ থানাত জেৰা চলাই আছে।
উল্লেখযোগ্য যে ৮ অক্তোবৰত সংগীত-চিনেমাৰ জগতখনৰ কৰ্মী লুইত কুমাৰ বৰ্মন নামৰ ব্যক্তিজনে ফেইচবুকত জুবিন আৰু গৰিমা গাৰ্গক লক্ষ্য কৰি অশ্লীল পোষ্ট দিয়া বুলি এটা স্ক্ৰীন শ্বট ৰাজহুৱা কৰিছিল চাও জিতুমণি গগৈ নামৰ এজন জুবিন অনুৰাগীয়ে। অতি অশ্লীল ভাষা ব্যৱহাৰ কৰা পোষ্টটোত জুবিনক অবৈধ সন্তান বুলি কোৱা হৈছিল আৰু লগতে জুবিন-গৰিমাৰ সন্তানহীনতাৰ বিষয়েও অতি অশ্লীল কথা কোৱা হৈছিল। ইয়াৰ উপৰি জুবিনক সন্মুখত পালেই হত্যা কৰা হ’ব বুলিও ভাবুকি দিছিল।
পোষ্টটোক লৈ তীব্ৰ বিতৰ্ক সৃষ্টি হোৱাৰ পিছতে গৰিমা গাৰ্গে পিছদিনা দিচপুৰ থানাত এখন এজাহাৰ দিছিল। আনহাতে তেওঁৰ বিৰুদ্ধে এয়া এটা ষড়যন্ত্ৰ বুলি লুইত কুমাৰ বৰ্মনেও থানাত এজাহাৰ দিছিল।
তাৎপৰ্য্যপূৰ্ণভাৱে থানাত এজাহাৰ পৰাৰ পিছতে চাও জিতুমণি গগৈয়ে নিজৰ ৱালৰ পৰা এই পোষ্টটো নোহোৱা কৰিছিল। তেতিয়াই সন্দেহৰ সৃষ্টি কৰিছিল। জানিব পৰামতে, জিতুমণি গগৈৰ ঘৰ হোজাইত আৰু তেওঁ হোজাই জুবিন ফেন ক্লাবৰ নেতৃত্বত আছে।
আনহাতে, আজি নিজৰ ৱালত এটা পোষ্টত লুইত কুমাৰ বৰ্মনে কয়, “সকলো বন্ধু বান্ধৱীক মোৰ অন্তৰৰ পৰা ধন্যবাদ দিছোঁ৷ বিপদৰ সময়ত লগত থাকা হে আচল বন্ধু৷ প্ৰথম দিনাৰ পৰাই যি কৈ আছিলোঁ সেইয়াই প্ৰমান হ’ল৷ মোৰ বন্ধু-বান্ধৱী অন্ধ নহয়, মোৰ ভুলক ভুল বুলি কয় আৰু সচাক সচা৷ এনে বন্ধুহে আচল বন্ধু৷”
লগতে লুইত কুমাৰ বৰ্মনে আক্ষেপ কৰি কয়, “তিনি দিন ধৰি মোক মেডিয়াই ভিলেইনে বনাই দিলে৷ দুটা মান মেডিয়াই বাৰু মোক কথা কবলৈ সুবিধা দিছে৷”
আনহাতে আৰক্ষীয়ে আটক কৰাৰ পিছত জিতুমণি গগৈয়ে স্বীকাৰ কৰিছে যে তেওঁ সেই স্ক্ৰীনশ্বটটো জুবিন ফেন ক্লাবৰ ৱাটছএপ গ্ৰুপতহে পাইছিল, লুইত কুমাৰ বৰ্মনৰ ৱালত নহয়৷ এই কথাৰ পৰা অনুমান হয় যে লুইত কুমাৰ বৰ্মনৰ বিৰুদ্ধে হোৱা এই চক্ৰান্তত কেৱল এজনেই নহয়, জুবিন ফেন ক্লাবৰ আৰু সদস্য জড়িত থাকিব পাৰে।
ফলত এয়া যে লুইত কুমাৰ বৰ্মনৰ প্ৰতি বিদ্বেষ পুহি ৰখা জুবিন ফেন ক্লাবৰ সদস্যৰে কাণ্ড, সেয়া অনুমেয় হৈ পৰিছে। ঘটনা সন্দৰ্ভত আৰক্ষীয়ে অধিক তদন্ত অব্যাহত ৰাখিছে বুলি জানিব পৰা গৈছে।
