শীতৰ মিঠা টোপনি কাৰনো প্ৰিয় নহয়? কিন্তু বহু সময়ত দেখা যায় যে পৰ্যাপ্ত সময় শোৱাৰ পিছতো পুৱা সাৰ পালে দেহটো গধুৰ লাগে বা ভাগৰ অনুভৱ হয়। বহুতে আকৌ পুৱাই মূৰৰ বিষ বা শৰীৰৰ বিষত ভোগা দেখা যায়। সাধাৰণতে দিন চুটি হোৱা, সূৰ্যৰ পোহৰ কমকৈ পোৱা আৰু দৈনন্দিন ৰুটিনৰ সালসলনিৰ বাবে এনে হ’ব পাৰে। কিন্তু এই সমস্যা যদি প্ৰতিদিনেই ঘটে, তেন্তে ইয়াক কেৱল ‘শীতৰ এলাহ‘ বুলি আওকাণ কৰা অনুচিত।
পুৱা ভাগৰ লগাৰ অন্তৰালৰ কাৰণসমূহ-
প্ৰতিবেদন অনুসৰি, পুৱাৰ এই ভাগৰুৱা অৱস্থাৰ আঁৰত কেইবাটাও গুৰুত্বপূৰ্ণ কাৰণ থাকিব পাৰে:
নিম্নমানৰ টোপনি: নিশা দেৰিলৈকে ম’বাইল ব্যৱহাৰ কৰা বা মাজে মাজে টোপনি ভাঙি থাকিলে শৰীৰে গভীৰ বিশ্ৰাম নাপায়। ফলত পুৱা সাৰ পালে শৰীৰত সতেজতা নাথাকে।
পানীৰ অভাৱ (Dehydration): শীতকালত পিয়াহ কমকৈ লাগে বাবে আমি পানী খাবলৈ পাহৰি যাওঁ। শৰীৰত পানীৰ মাত্ৰা কমিলে পেশীবোৰ দুৰ্বল হয় আৰু অৱসাদ আহে।
ভিটামিন-D ৰ নাটনি: ঠাণ্ডাৰ দিনত কুঁৱলী বা মেঘাচ্ছন্ন আকাশৰ বাবে ৰ’দ কমকৈ পোৱা যায়। ভিটামিন-D ৰ অভাৱে আমাৰ শক্তিৰ মাত্ৰা (Energy level) হ্ৰাস কৰে।
মানসিক চাপ: অত্যাধিক চিন্তা বা মানসিক চাপত থাকিলে টোপনিৰ অৱস্থাতো মগজু সক্ৰিয় হৈ থাকে, যিয়ে পুৱা ভাগৰৰ সৃষ্টি কৰে।
শাৰীৰিক নিস্ক্ৰিয়তা: ব্যায়ামৰ অভাৱত পেশীবোৰ জঠৰ হৈ পৰে, যাৰ ফলত শৰীৰটো অধিক অৱশ যেন লাগে।
কিদৰে নিজক সক্ৰিয় কৰি ৰাখিব?
শীতৰ দিনত শৰীৰত নতুন শক্তি সঞ্চাৰ কৰিবলৈ বিশেষজ্ঞসকলৰ পৰামৰ্শসমূহ অনুসৰি- অনুশাসনমূলক টোপনি: সদায় এটা নিৰ্দিষ্ট সময়ত শোৱা আৰু পুৱা সোনকালে উঠাৰ অভ্যাস গঢ়ি তোলক।
জলপানৰ গুৰুত্ব: পিয়াহ নালাগিলেও দিনটোত নিৰ্দিষ্ট সময়ৰ অন্তৰালত পৰ্যাপ্ত পানী খাব।
প্ৰাকৃতিক পোহৰ: দিনৰ ভাগত অন্ততঃ ১৫-২০ মিনিট ৰ’দত বহাৰ চেষ্টা কৰক। ই ভিটামিন-D ৰ যোগান ধৰাৰ লগতে মনটোও সতেজ ৰাখিব।
শাৰীৰিক কচৰৎ: পুৱা উঠি পাতল ব্যায়াম বা ১০ মিনিট খোজ কাঢ়িলে ৰক্ত সঞ্চালন বৃদ্ধি পায় আৰু শৰীৰত তৎক্ষণাত শক্তি আহে।
খাদ্যভাস: খাদ্য তালিকাত সুষম আহাৰ অন্তৰ্ভুক্ত কৰক। অতিমাত্ৰা তেল-মচলাযুক্ত খাদ্যই শৰীৰত এলেহুৱা ভাৱৰ সৃষ্টি কৰে।
মনত ৰাখিবলগীয়া বিশেষ দিশ-
পুৱা বিছনাৰ পৰা উঠিয়েই এক গিলাচ কুহুমীয়া গৰম পানী খোৱাৰ অভ্যাস কৰক।
নিশা শুবলৈ যোৱাৰ অন্তত এঘণ্টা আগৰ পৰা ইলেকট্ৰনিক গেজেট ব্যৱহাৰ বন্ধ কৰক।
অত্যাধিক চাহ বা কফি (কেফেইন) সেৱনৰ পৰা বিৰত থাকক, বিশেষকৈ সন্ধিয়াৰ পিছত।
যদিহে জীৱনশৈলীৰ পৰিৱৰ্তনৰ পাছতো আপোনাৰ এই ভাগৰুৱা ভাৱ দূৰ হোৱা নাই, তেন্তে বিলম্ব নকৰি বিশেষজ্ঞ চিকিৎসকৰ পৰামৰ্শ গ্ৰহণ কৰাটো বুদ্ধিমানৰ কাম হ’ব।
