ম্যাদ ওকলাৰ পিছতো আপুনি জিলা পৰিবহণ বিভাগৰ কাৰ্যালয়লৈ নোযোৱাকৈ চালকৰ অনুজ্ঞাপত্ৰ নৱীকৰণ কৰিব পাৰিব।
বৃহস্পতিবাৰে কেন্দ্ৰীয় পথ পৰিবহণ আৰু ঘাইপথ মন্ত্ৰণালয়ে এক জাননী যোগে এই কথা প্ৰকাশ কৰিছে। উক্ত জাননীত কোৱা হৈছে যে আধাৰ কাৰ্ডৰ দ্বাৰা ম্যাদ উকলি যোৱাৰ পিছতো চালকৰ অনুজ্ঞাপত্ৰ নৱীকৰণ কৰিব পাৰিব।
ইয়াৰ বাবে চালকে জিলা পৰিবহণ কাৰ্যালয়লৈ যোৱাৰো প্ৰয়োজন নহ’ব। অৱশ্যে অনুজ্ঞাপত্ৰখনৰ ম্যাদ উকলাৰ দিন এবছৰতকৈ বেছি হ’ব নোৱাৰিব।
কেনেকৈ কৰিব পাৰিব?
অনুজ্ঞাপত্ৰখন অনলাইন যোগে নৱীকৰণ কৰিব পাৰিব।
ইয়াৰ বাবে অনুজ্ঞাপত্ৰৰ গৰাকীয়ে প্ৰথমে পৰিবহণ সেৱাৰ অফিচিয়েল ৱেবচাইটোত প্ৰৱেশ কৰি এই https://parivahan.gov.in/. লিংকটোত ক্লীক কৰিব লাগিব।
ইয়াৰ পিছত চালকৰ অনুজ্ঞাপত্ৰ সম্বন্ধীয় পেজটোত ক্লীক কৰিলে এটা নতুন পেজ পাব আৰু তাতে নিজৰ ৰাজ্যখনক বাচনি কৰিব লাগিব।
আকৌ এটা নতুন পেজ পাব আৰু ইয়াত বিভিন্ন বিকল্প লাভ কৰিব আৰু তাৰে এপ্লাই ফ’ৰ ড্ৰাইভিং লাইচেন্স ৰিনিউৱেল বিকল্পটো বাচনি কৰিব।
ইয়াৰ পিছতে পেজত দেখুওৱাই যোৱা নিৰ্দেশনাৰ মতে নিজৰ তথ্যবোৰ সন্নিৱিষ্ট কৰি যাব।
অনলাইনৰ আবেদনখন পূৰোৱাৰ পিছত পৰৱৰ্তী নিৰ্দেশনাৰ মতে প্ৰয়োজনীয় প্ৰমাণ পত্ৰসমূহৰ লগতে নিজৰ ফ’টো আৰু স্বাক্ষৰো আপল’ড কৰিব।
এইবোৰ আপল’ড কৰাৰ পিছত প্ৰয়োজনীয় মাচুলটো দিব লাগিব আৰু মাচুল দিয়াৰ লগে লগে এখন ৰিচিপ্ট প্ৰদান কৰিব আৰু সেইখন ডাউনল’ড কৰি প্ৰীণ্ট কৰি ল’ব।
