গৰমৰ উত্তাপ তীব্ৰভাৱে বাঢ়িছে। গোলকীয় উষ্ণতা বৃদ্ধিৰ বাবে সকলোতে পৰিস্থিতি অতি বেয়া। আমেৰিকাও ইয়াৰ ব্যতিক্ৰম নহয়। অতিমাত্ৰা উত্তাপত ৱাশ্বিংটন ডি চিৰ প্ৰয়াত আমেৰিকাৰ ৰাষ্ট্ৰপতি আব্ৰাহাম লিংকনৰ প্ৰতিমূৰ্তিৰ মূৰৰ অংশ গলি গ’ল! ছয় ফুটৰ প্ৰতিমূৰ্তিৰ এনে অৱস্থা দেখি সকলোৱে স্তম্ভিত হৈ পৰে। আনকি মূৰ্তিটো বহাই ৰখা চকীখনো গলিবলৈ আৰম্ভ কৰিছে। পৰিস্থিতি বুজি ইতিমধ্যে তাৰ পৰা মূৰটো আঁতৰাই নিয়া হৈছে।
বিবিচিৰ সূত্ৰ অনুসৰি ৱাশ্বিংটনৰ তাপমাত্ৰা ১০০ ডিগ্ৰী ফাৰেনহাইট বা ৩৭.৭ ডিগ্ৰী চেলছিয়াছ হৈছেগৈ। আৰু তাৰ বাবেই মমৰ মূৰ্তিটোৰ এনেকুৱা অৱস্থা। যোৱা ফেব্ৰুৱাৰী মাহত ৱাশ্বিংটনৰ এখন বিদ্যালয়ত আব্ৰাহাম লিংকনৰ প্ৰতিমূৰ্তি স্থাপন কৰা হৈছিল। তাত দেখা গৈছে যে তেওঁ ভৰি দুখন আগলৈ মেলি বহি আছে। প্ৰায় ৩ হাজাৰ পাউণ্ডৰ এই প্ৰতিমূৰ্তিটো নিৰ্মাণ কৰিছিল কালচাৰেল ডিচি নামৰ এটা অলাভজনক সংস্থাই। কিন্তু কেইমাহমানৰ পাছতে ঘটিল এই ঘটনা!
কৰ্তৃপক্ষই জনোৱা মতে, এই মূৰ্তিটো এটা মমবাতিৰ দৰেই নিৰ্মাণ কৰা হৈছে। অতিমাত্ৰা উষ্ণতাই ইয়াৰ আকৃতি সলনি হ’ব পাৰে। কিন্তু তাপমাত্ৰা যদিৰে বাঢ়িছে তাৰ ফলত প্ৰতিমূৰ্তিটো গলিবলৈ ধৰিলে। অৱস্থাটো দেখাৰ পিছত মূৰটো আঁতৰাই দিয়া হয়। নহ’লে সেইটো ভাঙি দুটুকুৰা হৈ পৰিলহেঁতেন।
লগতে পঢ়কঃ পৰমাণু বোমাৰ ধাৰণাৰ জন্ম পোৱা আইনষ্টাইনৰ চিঠিখন; আকাশলংঘী দামত বিক্ৰী হ’ব নিলামত
অৱশ্যে সংস্থাটোৱে জনাইছে যে লিংকনৰ মূৰ্তিটোৰ মূৰটো নতুনকৈ স্থাপন কৰা হ’ব। কিন্তু তেওঁলোকে এতিয়াই তেনে কৰিবলৈ ইচ্ছুক নহয়। গৰমত যিদৰে অসহ্যকৰ অৱস্থা হৈছে, অনাগত দিনত পৰিস্থিতি আৰু বেয়া হ’ব পাৰে। সেইবাবেই প্ৰতিমূৰ্তি সুৰক্ষাৰ বাবে ছেপ্টেম্বৰৰ পূৰ্বে নতুনকৈ মূৰটো স্থাপন কৰিবলৈ তেওঁলোক ইচ্ছুক নহয়।
