কেৰালাত প্ৰাকৃতিক দুৰ্যোগত মৃত্যু হোৱা লোকৰ সংখ্যাই ইতিমধ্যে ৩৫০ জন অতিক্ৰম কৰিছে। লগতে বহু লোক আহত হৈছে। স্বাভাৱিকতে প্ৰশ্ন উত্থাপন হৈছে – প্ৰকৃতি ধ্বংস কৰি পৰ্যটনৰ বিকাশৰ লক্ষ্যৰে ইখনৰ পিছত সিখন ৰিজৰ্ট নিৰ্মাণৰ বাবেই প্ৰকৃতিৰ ওপৰত প্ৰভাৱ পৰিছে নেকি? লগতে প্ৰশ্ন উত্থাপন হৈছে যে বাৰে বাৰে সকীয়নি লাভ কৰাৰ পিছতো কিয় প্ৰাকৃতিক দুৰ্যোগ ৰোধ কৰিব পৰা নাই?
২০২২ চনৰ জুলাই মাহত সংসদত অনুষ্ঠিত হোৱা প্ৰশ্নোত্তৰ অধিৱেশনৰ সময়ত কেন্দ্ৰই প্ৰদান কৰা পৰিসংখ্যা অনুসৰি ২০১৫ চনৰ পৰা ২০২২ চনৰ ভিতৰত ভাৰতত মুঠ ৩,৭৮২ টা ভূমিস্খলন সংঘটিত হৈছে। ইয়াৰে ৬০ শতাংশ কেৱল কেৰালাত সংঘটিত হৈছে।
ইয়াৰ পূৰ্বে ২০১৮ চনৰ বানত ৱানাডাত ৪০০ লোকৰ মৃত্যু হৈছিল।
বিশেষজ্ঞসকলে কয় যে প্ৰকৃতি ধ্বংসৰ বিৰুদ্ধে তেতিয়াই ততালিকে কঠোৰ ব্যৱস্থা গ্ৰহণ কৰা হ’লে আজিৰ পুনৰ দুনাই একে ঘটনা সংঘটিত নহ’লহেতেঁন।
বিশেষজ্ঞসকলে কয় যে তেওঁলোকে বছৰ বছৰ ধৰি এই দুৰ্যোগ দেখি আহিছে, আৰু বিগত ১৩ বছৰৰ কেইবাটাও চৰকাৰী প্ৰতিবেদনত সকীয়াই দিয়া হৈছে যে পৰিৱেশ সংবেদনশীল অঞ্চলসমূহৰ অতিমাত্ৰা উন্নয়নে প্ৰাকৃতিক পানীৰ প্ৰবাহ বন্ধ কৰি অন্যান্য পৰিৱেশ দুৰ্যোগ যেনে ভূমিস্খলন আৰু বানপানীৰ আশংকা বৃদ্ধি কৰিব। কিন্তু সেই সতৰ্কবাণীবোৰৰ প্ৰতি কোনো গুৰুত্ব দিয়া নহ’ল।
ৱায়ানাদৰ স্থানীয় পৰিৱেশ সুৰক্ষা এন জি অ’ প্ৰকৃতি সংৰক্ষনা সমিতিৰ মুৰব্বী এন বডুছাই সংবাদ মাধ্যমৰ আগত কয়, ” কোৱা হয় যে প্ৰচণ্ড বৰষুণৰ ফলত ভূমিস্খলন হৈছে, সেয়া সঁচা নহয়। ৱায়ানাডত এনেকৈয়ে প্ৰচণ্ড বৰষুণ হয়। আচলতে প্ৰকৃতি ধ্বংস কৰাৰ বাবে ইয়াৰ পৰিণাম ভুগিছে।”
চৰকাৰী ৰেকৰ্ডত দেখা গৈছে যে যোৱা বছৰ ১০ লাখতকৈ অধিক দেশী-বিদেশী পৰ্যটকে ৱায়নাড ভ্ৰমণ কৰিছিল। যিটো ২০১১ চনৰ সংখ্যাতকৈ প্ৰায় তিনিগুণ বেছি।
জানিব পৰা মতে সংস্থাটোৱে কেৰেলাৰ মুখ্যমন্ত্ৰী পিনাৰায়ী বিজয়নৰ কাৰ্যালয় আৰু কেন্দ্ৰীয় পৰিৱেশ মন্ত্ৰালয়ৰ সৈতে যোগাযোগ কৰা হৈছিল যদিও তেওঁলোকে কোনো সঁহাৰি নিদিলে।
