অৰুণাচলৰ সমস্যা অসমীয়াক লৈ নহয়, অসমত থকা বহিৰাগতক লৈহে : নিচি এলিট ছ’চাইটি
নিচি এলিট ছ’চাইটিৰ দ্বাদশ সাধাৰণ সন্মিলনত আজি আমন্ত্ৰিত অতিথি হিচাপে অংশগ্ৰহণ কৰে অসম সাহিত্য সভাৰ সভাপতি পৰমানন্দ ৰাজবংশীয়ে।
পূব কামেং জিলাৰ ছেপা ৰাজহ চক্ৰৰ অন্তৰ্গত ৱেছাঙত অনুষ্ঠিত সাধাৰণ অধিৱেশনত উপস্থিত থাকি ৰাজবংশীয়ে দুয়োখন ৰাজ্যৰ মাজত আন্তঃৰাজ্যিক পাৰপত্ৰক কেন্দ্ৰ কৰি থকা সন্দেহ-সংশয় দূৰ কৰা উচিত বুলি মন্তব্য কৰে।
“আমি হৃদয়ত মৰম লৈহে শান্তি বজাই ৰাখিম, হাতত অস্ত্ৰ লৈ নহয়” ৰাজবংশীয়ে কয়।
সভাৰ সভাপতিজনে জনগোষ্ঠীটোৰ সংস্কৃতি, খাদ্যাভ্যাস, পৰম্পৰা, ভাষা, সাজপাৰক প্ৰশংসা কৰাৰ লগতে নিচি এলিট ছ’চাইটিক অসম সাহিত্য সভাৰ এটা অংশ বুলি কয়।
নিচি এলিট ছ’চাইটিৰ সভাপতি বেনজিয়া টলুমেও অসম আৰু অৰুণাচলৰ আন্তৰিকতাপূৰ্ণ সম্পৰ্কৰ বিষয়ে ভাষণত উল্লেখ কৰে।
সাহিত্য সভাৰ সভাপতি ৰাজবংশীৰ শংকা দূৰ কৰি টলুমে কয়, “আমি যুগ যুগ ধৰি ককাই-ভাইৰ দৰে আছো। সদৌ নিচি ছাত্ৰ সন্থাই ইনাৰ লাইন পাৰ্মিট (আন্তঃৰাজ্যিক পাৰপত্ৰ) বিচৰা অভিযানক লৈ ভুল বুজাবুজি সৃষ্টি হ’ব নালাগে।”
উল্লেখযোগ্য যে অলপতে সদৌ নিচি ছাত্ৰ সন্থাই ইনাৰ লাইন পাৰ্মিট বিচৰাৰ নামত অসমৰ পৰা গৈ তাত বাস কৰি থকা একাংশক হাৰাশাস্তি কৰা বুলি অভিযোগ উঠিছিল।
এই সন্দৰ্ভত অসমৰ কিছু সংখ্যক সংবাদ মাধ্যমে ভুল বুজাবুজিৰ সৃষ্টি কৰা বুলি অভিযোগ কৰি তেওঁ কয়, “অৰুণাচলৰ অসমীয়া মানুহক লৈ সমস্যা নাই। সমস্যা আছে অসমত থকা অনা অসমীয়াক লৈহে।”
আনহাতে তেওঁ অসমৰ লেখকসকলক তেওঁলোকৰ ৰচনাত নিচিসকলক “ডফলা” শব্দেৰে নুবুজাবলৈ বা উল্লেখ নকৰিবলৈ অনুৰোধ কৰে।
“শব্দটো অপমানজনক আৰু এই শব্দটো বহু বছৰৰ আগতেই সাংবিধানিক প্ৰক্ৰিয়াৰ মাজেৰে বাদ দিয়া হৈছে”, টলুমে কয়।
নিচি এলিট ছ’চাইটি জনগোষ্ঠীটোৰ অন্যতম শীৰ্ষ সংস্থা। সন্মিলনখনত নিচি বসতিপ্ৰধান ৮খন জিলাৰ পৰা অহা প্ৰায় ৩০০০ প্ৰতিনিধি উপস্থিত থাকে।
উপস্থিত থকা ৰাজ্যখনৰ গৃহ মন্ত্ৰী বামাং ফেলিক্সে অসমৰ প্ৰতিনিধিসকলক কয় যে ইনাৰ লাইন পাৰ্মিট অভিযানটো চলি থাকিব, কিয়নো ইয়াক ৰাজ্যখনৰ আইনৰ দ্বাৰা বান্ধি লোৱা হৈছে। “ৰাজ্যখনৰ অপৰাধৰ ৯০ শতাংশই ৰাজ্যখনত অবৈধভাৱে প্ৰৱেশ কৰা লোকৰ দ্বাৰা সংঘটিত হৈছে”, গৃহ মন্ত্ৰীজনে কয়।