এক গুৰুতৰ সাংবিধানিক সংকটৰ দিশে ধাৱমান হৈছে পশ্চিমবংগ। আজি পশ্চিমবংগৰ ৰাজ্যপাল জগদীপ ধনখৰে ৰাজ্যিক বিধানসভাৰ সকলো কাম-কাজ নিষ্ক্ৰিয় কৰি দিবলৈ প্ৰদান কৰা নিৰ্দেশে মমতা বেনাৰ্জীৰ চৰকাৰৰ প্ৰতিগৰাকী সদস্যকে স্তম্ভিত কৰি তুলিছে।
উল্লেখ্য ৰাজভৱন আৰু পশ্চিম বংগ চৰকাৰৰ মাজত তিক্ত সম্পৰ্ক বাহাল থকাৰ সময়তে ৰাজ্যপাল জগদীপ ধনখৰে শনিবাৰে ১২ ফেব্ৰুৱাৰীৰ পৰা পশ্চিম বংগ বিধান সভা নিষ্ক্ৰিয় কৰি দিয়াৰ কথা ঘোষণা কৰে।
ৰাজ্যপালে তেওঁৰ টুইটাৰত এনেদৰে লিখিছে—’সংবিধানৰ ১৭৪ নং অনুচ্ছেদৰ (২) দফা (২)ৰ দ্বাৰা মোক প্ৰদান কৰা ক্ষমতাৰ ব্যৱহাৰ কৰি, মই, পশ্চিম বংগৰ ৰাজ্যপাল জগদীপ ধনখৰে ইয়াৰ দ্বাৰা ১২ ফেব্ৰুৱাৰী, ২০২২ তাৰিখৰ পৰা পশ্চিম বংগ বিধান সভা নিষ্ক্ৰিয় কৰি দিলো’।
পশ্চিম বংগ বিধানসভাৰ বাজেট অধিৱেশনৰ আগতে আহি পৰা এই বিপৰ্যয়ে এতিয়া চিন্তিত কৰি তুলিছে মমতা বেনাৰ্জীকে ধৰি আন নেতাসকলক।
তৃণমূল কংগ্ৰেছৰ নেতা তথা সংসদীয় পৰিক্ৰমা মন্ত্ৰী পাৰ্থ চেটাৰ্জীয়ে এই প্ৰসংগত কয় যে চৰকাৰে আগন্তুক বিধানসভা অধিৱেশনত ৰাজ্যপালৰ বিৰুদ্ধে এটা প্ৰস্তাৱ অনাৰ কথা বিবেচনা কৰি আছিল।
ৰাজ্যপালৰ নিৰ্দেশক তৃণমূল নেতৃত্বই “অভূতপূৰ্ব” আৰু “ৰাজনৈতিক উদ্দেশ্যপ্ৰণোদিত” বুলি মন্তব্য কৰিছে।
উল্লেখ্য বিধানসভাৰ বাজেট অধিৱেশন ৰাজ্যপালৰ ভাষণেৰে আৰম্ভ হয়। কিন্তু বিধানসভা নিষ্ক্ৰিয় কৰি দিয়াৰ ফলত এতিয়া আৰু বাজেট অধিৱেশন অনুষ্ঠিত কৰিব পৰা নাযাব।
