পশ্চিমবংগৰ প্ৰথমখন বিজেপি চৰকাৰৰ নতুন ৩৫ জন মন্ত্ৰীয়ে কোনটো দপ্তৰৰ দায়িত্ব লাভ কৰিব তাক লৈ চলি থকা জল্পনা-কল্পনাৰ অৱসান ঘটিল। বুধবাৰে এই মন্ত্ৰীসকলৰ দপ্তৰ বিতৰণৰ সম্পূৰ্ণ তালিকা প্ৰকাশ কৰা হয়।
যোৱা ১ জুন সোমবাৰে লোক ভৱনত ৰাজ্যপাল আৰ এন ৰবিৰ উপস্থিতিত এক আড়ম্বৰপূৰ্ণ অনুষ্ঠানত শুভেন্দু অধিকাৰীৰ মন্ত্ৰীসভাৰ বাকী ৩৫ জন সদস্যই শপত গ্ৰহণ কৰিছিল। বন্দে মাতৰম আৰু ৰাষ্ট্ৰীয় সংগীতেৰে আৰম্ভ হোৱা এই অনুষ্ঠানত মুখ্যমন্ত্ৰীগৰাকী নিজে উপস্থিত আছিল আৰু মুখ্য সচিব মনোজ আগৰৱালাই মন্ত্ৰীসকলৰ নাম ঘোষণা কৰিছিল। এই সম্প্ৰসাৰণৰ পাছত ৰাজ্যখনৰ বিজেপি চৰকাৰৰ মুঠ মন্ত্ৰীসভাৰ সদস্যৰ সংখ্যা ৪১ জনলৈ বৃদ্ধি পালে।
যোৱা ১ জুনত শপত লোৱা এই ৩৫ জন সদস্যৰ দপ্তৰ আজি বিতৰণ কৰা হৈছে। ইয়াৰে ১৩ জন বিধায়কে পূৰ্ণমন্ত্ৰী হিচাপে দায়িত্ব লাভ কৰিছে। তেওঁলোকৰ ভিতৰত আছে মাণিকতলাৰ তাপস ৰায়, কুমাৰগ্ৰামৰ মনোজ ওৰাং, নোৱাপাৰাৰ অৰ্জুন সিং, মুৰ্ছিদাবাদৰ গৌৰীশংকৰ ঘোষ, ফালাকাটাৰ দীপক বৰ্মন আৰু বিধাননগৰৰ শাৰদ্বত মুখোপাধ্যায়। ইয়াৰ উপৰিও পূৰ্ণমন্ত্ৰীৰ দায়িত্ব পোৱা আন সদস্যসকল হৈছে কাঁথি দক্ষিণৰ অৰূপকুমাৰ দাস, ৰাসবিহাৰীৰ স্বপন দাশগুপ্ত, চিউৰিৰ জগন্নাথ চট্টোপাধ্যায়, খড়দহৰ কল্যাণ চক্ৰৱৰ্তী, শিলিগুৰিৰ শংকৰ ঘোষ, কুলটিৰ অজয় পোদ্দাৰ আৰু ময়ূৰেশ্বৰৰ দুধকুমাৰ মণ্ডল।
আনহাতে, তিনিগৰাকী বিধায়কে স্বতন্ত্ৰ দায়িত্বপ্ৰাপ্ত ৰাজ্যিক মন্ত্ৰী হিচাপে দায়িত্ব লাভ কৰিছে। তেওঁলোক হ’ল তুফানগঞ্জৰ মালতী ৰাভা ৰায়, গোপীবল্লভপুৰৰ ৰাজেশ মাহাতো আৰু বেহালা পশ্চিমৰ ইন্দ্ৰনীল খাঁ। ইয়াৰ লগতে আন ১৯ জন বিধায়কক ৰাজ্যিক মন্ত্ৰীৰ দায়িত্ব অৰ্পণ কৰা হৈছে। এই ১৯ গৰাকী মন্ত্ৰীৰ ভিতৰত আছে ময়নাৰ অশোক দিন্দা, ৰায়গঞ্জৰ কৌশিক চৌধুৰী, হবিবপুৰৰ জুৱেল মুৰ্মু, তমলুকৰ হৰেকৃষ্ণ বেৰা, ভগৱানপুৰৰ শান্তনু প্ৰামাণিক আৰু বৰ্ধমান দক্ষিণৰ মৌমিতা বিশ্বাস মিশ্ৰ।
ৰাজ্যিক মন্ত্ৰীৰ দায়িত্ব লাভ কৰা আন বিধায়কসকল হৈছে হাওৰা উত্তৰৰ উমেশ ৰায়, শ্যামপুকূৰৰ পূৰ্ণিমা চক্ৰৱৰ্তী, শ্ৰীৰামপুৰৰ ভাস্কৰ ভট্টাচাৰ্য, সোনামুখীৰ দিবাকৰ ঘৰামী, পাৰাৰ নদীয়াৰচাঁদ বাউৰী আৰু কান্দিৰ গাৰ্গী দাস ঘোষ। ৰাজ্যিক মন্ত্ৰীৰ তালিকাত অন্তৰ্ভুক্ত আন সদস্যসকল হৈছে নয়াগ্ৰামৰ অমিয় কিস্কু, আউশগ্ৰামৰ কলিতা মাঝি, কৰণদিঘিৰ বিৰাজ বিশ্বাস, বলাগড়ৰ সুমনা চৰকাৰ, মাটিগাড়া-নকশালবাৰীৰ আনন্দময় বৰ্মন, কালচিনিৰ বিশাল লামা আৰু কাকদ্বীপৰ দীপংকৰ জানা।
