এদিনীয়া ক্ৰিকেটৰ ৰেংকিঙত নৱম স্থানত থকা দলটোৱে দ্বিতীয় স্থানৰ দলটোক দিশহাৰা কৰি তুলিলে দেওবাৰে চেন্নাইত।
টী-২০’ত দুৰ্ধৰ্ষ হিচাপে পৰিচিত দলটোৱে এদিনীয়াটো যে তেওঁলোক এতিয়া এক সজীৱ প্ৰতিদ্বন্দ্বী সেয়া প্ৰমাণ কৰি দিলে।
এখনৰ পাছত আন এখন ছিৰিজত বিজয় সাৱ্যস্ত কৰি মনোবল তুংগত থকা বিৰাট কোহলিৰ টীম ইণ্ডিয়াক পৰাজিত কৰি ৱেষ্টইণ্ডিজে দমনীয় প্ৰদৰ্শনৰ পৰিভাষা বুজাই দিলে।
হোপ আৰু হেটমেয়াৰৰ দুৰ্দান্ত শতকীয় ইনিংছৰ সহায়ত একপ্ৰকাৰ অসাধ্য সাধন কৰে কেৰিবিয়ান দলটোৱে। সেইদৰে পোলাৰ্ডৰ নেতৃত্বত দলটোৱে ছিৰিজত ১-০ৰ অগ্ৰগতিও লাভ কৰে।
ভাৰতৰ হৈ আন্তৰ্জাতিক এদিনীয়াত প্ৰথমটো অৰ্দ্ধ শতক অৰ্জন কৰে ঋষভ পন্টে।চাৰি নম্বৰত বেটিং কৰা শ্ৰেয়াস আয়াৰেও ভাল প্ৰদৰ্শনে দাঙি ধৰে। কিন্তু দিনটোৰ শেষত তেওঁলোকৰ সেই প্ৰদৰ্শনো হৈ পৰে ম্লান।
ভাৰতৰ অভিজ্ঞসকলেও আশাকৰা মতে প্ৰদৰ্শন দাঙি ধৰাত সফল নহ’ল। মহম্দ ছামীৰ পৰা আৰম্ভ কৰি কুলদীপ যাদব, ৰোহিত শৰ্মাৰ পৰা বিৰাট কোহলিলৈকে সকলো ব্যৰ্থ হ’ল।
ভাৰতৰ টপ অৰ্ডাৰত আঘাত হানি আৰম্ভণিতেই কৰ্টনৰ দলে বুজাই দিলে যুদ্ধ সহজ নহয়।
মিডল অৰ্ডাৰে যুঁজ দিলে ঠিকেই কিন্তু ৮ উইকেটৰ বিনময়ত ২৮৭ ৰাণৰ লক্ষ্য বান্ধি দি এদিনীয়াত জয়ৰ আশা কৰাটো জানো সহজ? মাত্ৰ কেইদিনমান পূৰ্বে টী-২০’ত আঢ়ৈশ ৰাণ কৰা দলটোৱে তিনিশ ৰাণো স্পৰ্শো কৰিব নোৱাৰিলে।
ভাৰতৰ হৈ শ্ৰেয়াস আয়াৰে ৭০ৰাণ আৰু ঋষভ পন্টে ৭১ ৰাণৰ অৰিহনা যোগায়।
ৱেষ্টইণ্ডিজে সহজতেই জয়ী হ’ল মেচখনত। অপেনাৰ হোপ আৰু হেটমেয়াৰৰ দমনীয় প্ৰদৰ্শনৰ আগত সকলো নিষ্প্ৰভ হৈ পৰিল।
হেটমেয়াৰে ১৩৯ ৰাণ কৰাৰ বিপৰীতে হোপে ১০২ ৰাণ কৰি অপৰাজিত হৈ থাকে।
মহম্মদ ছামী, ৰবীন্দ্ৰ জাডেজা, দীপক চহৰ কোনোজন বলাৰকে ৰেহাই নিদিলে দুৰ্দান্ত যুটীটোৱে। তদুপৰি, ভাৰতৰ সোপাঢিলা ফিল্ডিঙৰ অৰিহনাও আছে।
বেটিং, বলিং, ফিল্ডিং, তিনিওটা বিভাগেই যেতিয়া প্ৰদৰ্শনত ব্যৰ্থ হয়, তাত জয়ৰ আশা নকৰাই ভাল। দেওবাৰে টীম ইণ্ডিয়াৰ অৱস্থাও সেয়াই হ’ল।
ইয়াৰ বিপৰীতে দমনীয় প্ৰদৰ্শনেৰে যোগ্যভাৱেই ভাৰতৰ পৰা মেচখন কাঢ়ি নিলে কেৰিবিয়ান দলটোৱে।