শেহতীয়াকৈ এজন ২৬ বছৰীয়া যুৱকৰ অণ্ডকোষৰ বিষ হোৱাত নতুন দিল্লীৰ এখন চিকিৎসালয়ত ভৰ্তি কৰোৱা হয়। তাতেই তেওঁৰ অণ্ডকোষত ধৰা পৰে এবিধ বিশেষ পৰজীৱি।
শেহতীয়াকৈ সেই চিকিৎসালয়খনৰ চিকিৎসকসকলে “নিউ ইংলেণ্ড জাৰ্নেল অৱ মেডিচিন” নামৰ বৈজ্ঞানিক আলোচনীখনত সমগ্ৰ ঘটনাটো উল্লেখ কৰি গৱেষণা পত্ৰ প্ৰকাশ কৰিছে। গৱেষণা পত্ৰখন প্ৰকাশ পোৱাৰ পিছতেই বিয়পি পৰিছে খবৰটো।
চিকিৎসকে জনোৱা মতে, যেতিয়া যুৱকজন অণ্ডকোষৰ বিষত চিকিৎসালয়লৈ আহিছিল। তেতিয়া যুৱকজনৰ সোঁ অণ্ডকোষ ফুলি যোৱা দেখা গৈছিল। বিষ লগতে জ্বৰো আছিল যুৱকজনৰ।
তেতিয়া চিকিৎসকলে ক্ষন্তেকীয়া আল্ট্ৰাছাউণ্ড টেষ্ট কৰাৰ সিদ্ধান্ত লয়। সেই পৰীক্ষাত দেখা যায় যে শৰীৰৰ তৰল পদাৰ্থ আৰু শ্বেত ৰক্তকণিকা পৰিবহণ কৰা অণ্ডকোষৰ লসিকা নলীত পোক-পৰুৱাৰ দৰে দেখা কিবা ঘূৰি ফুৰিছে।
তাৰপিছত কিছু পৰীক্ষাৰ অন্তত গম পোৱা গ’ল যে যুৱকজন ‘লিম্ফেটিক ফাইলেৰিয়াচিছ’ ৰোগত আক্ৰান্ত। গ্রীষ্মমণ্ডলীয় আৰু বিষুৱীয় অঞ্চলত মহৰ কামোৰৰ দ্বাৰা এই ৰোগ বিয়পে।
কিন্তু সেই বস্তুটো কি আছিল যিটো নাচি থকা পোক-পৰুৱাৰ দৰে দেখা গৈছিল? চিকিৎসকে কয়, ইয়াক ‘ফিলাৰিয়াল ডান্স’ চিন বুলি কোৱা হয়। জীৱিত কৃমি লসিকা তন্ত্ৰৰ জৰিয়তে পেটৰ পৰা শৰীৰৰ বিভিন্ন অংশলৈ বিয়পিব পাৰে। আনকি বিয়পিব পাৰে অণ্ডকোষলৈকো।
চিকিৎসকে কয় যে যুৱকজন বৰ ভাগ্যৱান। কাৰণ তেওঁৰ ৰোগটো অতি কম সময়তে ধৰা পৰিছিল।
সেয়ে ৩ সপ্তাহ এন্টিপেৰাচাইট ঔষধ খোৱাৰ পিছত তেওঁ সুস্থ হৈ উঠিল আৰু পৰৱৰ্তী পৰীক্ষাত তেওঁৰ অণ্ডকোষত আৰু কোনো কৃমি পোৱা নগ’ল।
