সকলো ঠিকে ঠাকে থাকিলে অহা সপ্তাহত লোকসভা নিৰ্বাচনৰ সূচী ঘোষণা কৰাৰ কথা আছিল। ইয়াৰ পূৰ্বে শনিবাৰে অৰুণ গোৱেলে নিৰ্বাচন আয়ুক্ত পদৰ পৰা পদত্যাগ কৰি বৃহৎ অনিশ্চয়তাৰ সৃষ্টি কৰিলে।
ৰাষ্ট্ৰীয় নিৰ্বাচন আয়োগৰ তিনিজন নিৰ্বাচন আয়ুক্ত। মুখ্য নিৰ্বাচন আয়ুক্ত আৰু আন দুজন আয়ুক্ত। আগৰে পৰা এজন আয়ুক্তৰ পদ খালী আছে। তাতেই অৰুণ গোৱেলে নিৰ্বাচনৰ দিন ঘোষণাৰ পূৰ্বে পদত্যাগ কৰিলে। প্ৰশ্ন হৈছে ইমান ডাঙৰ দেশখনত একমাত্ৰ মুখ্য নিৰ্বাচন আয়ুক্তৰ নেতৃত্বত নিৰ্বাচন ঘোষণা কৰা সম্ভৱনে?
প্ৰাক্তন মুখ্য নিৰ্বাচন আয়ুক্ত এন গোপালস্বামীৰ মতে বৰ্তমানৰ মুখ্য নিৰ্বাচন আয়ুক্ত ৰাজীৱ কুমাৰে ইচ্ছা কৰিলে অকলে লোকসভা নিৰ্বাচন অনুষ্ঠিত কৰিব পাৰে। অৱশ্যে সেই পথত চলিব নে নাই সেয়া তেওঁৰ সিদ্ধান্ত। ইয়াত আইনৰ কোনো বাধা নাই। আয়োগ ৩ জন সদস্যৰে গঠিত হ’লেও মাত্ৰ এজন সদস্য থাকিলেই তাক কাৰ্যকৰী বুলি গণ্য কৰা হয়।
লগতে পঢ়কঃ নিৰ্বাচনৰ প্ৰাকক্ষণত আকস্মিক পদত্যাগ নিৰ্বাচন আয়ুক্ত অৰুণ গোৱেলৰ
নিৰ্বাচনী ব্যৱস্থাত নিৰপেক্ষতা বজাই ৰখাৰ স্বাৰ্থত তিনিজন নিৰ্বাচন আয়ুক্ত নিযুক্তিৰ ব্যৱস্থা কৰা হৈছে। যাতে কোনো বিষয়ত সামূহিক বা সংখ্যাগৰিষ্ঠতাৰে সিদ্ধান্ত ল’ব পৰা যায়। ফলত ২৪ ৰ নিৰ্বাচনৰ পূৰ্বে যে নতুন সংকটৰ সৃষ্টি হৈছে তাত কোনো সন্দেহ নাই।
ইতিমধ্যে কেন্দ্ৰৰ নৰেন্দ্ৰ মোডী চৰকাৰে নিৰ্বাচন আয়ুক্ত নিযুক্তি সন্দৰ্ভত আইন সলনি কৰিছে। ইয়াৰ পূৰ্বে নিয়ম আছিল যে নিৰ্বাচন আয়ুক্তক প্ৰধানমন্ত্ৰী, উচ্চতম ন্যায়ালয়ৰ মুখ্য ন্যায়াধীশ আৰু লোকসভাত বিৰোধী দলৰ নেতাই নিৰ্বাচন কৰিব। কিন্তু চৰকাৰে এই আইনখন সংশোধন কৰি কেবিনেট সচিবৰ নেতৃত্বত বাছনি সমিতি গঠন কৰি নিৰ্বাচন আয়ুক্তক নিযুক্তি দিছে।
সেই কমিটীয়ে পৰামৰ্শ দিয়া নামৰ মাজৰ পৰা এখন সমিতিয়ে নিৰ্বাচন আয়ুক্ত নিৰ্বাচন কৰিব। সেই সমিতিৰ অধ্যক্ষ হ’ব প্ৰধানমন্ত্ৰী। আৰু সদস্য হ’ব এজন চৰকাৰৰ মন্ত্ৰী আৰু বিৰোধী দলৰ নেতা। তেনেস্থলত চৰকাৰৰ মতেই যে প্ৰাধান্য পাব তাত কোনো সন্দেহ নাই।
লগতে পঢ়কঃ INDIAত সকাহঃ তামিলনাডুত আসন বুজাবুজিৰ দিশে কংগ্ৰেছ-ডিএমকে
শনিবাৰে অৰুণ গোৱালে পদত্যাগ কৰাৰ পিছত বিৰোধীয়ে এই প্ৰশ্ন উত্থাপন কৰিবলৈ আৰম্ভ কৰিছে যে বিজেপিয়ে তেওঁলোকৰ পোহনীয়া বিষয়াক নিৰ্বাচন আয়োগত নিযুক্তি দিব নেকি? সেই ভোট কিমান নিৰপেক্ষ হ’ব?
কেৱল সেয়াই নহয়, তাতোকৈ চিন্তনীয় কথাটো হ’ল চৰকাৰে কিমান সোনকালে কমিটীৰ বৈঠক আহ্বান কৰি নতুন নিৰ্বাচনী আয়ুক্ত বাছি ল’ব পাৰিব। নিৰ্বাচন পিছুৱাই নাযায়তো!
