উত্তৰ-পূবৰ ৰাজ্যসমূহৰ পৰা লাহে লাহে আফস্পা আইন প্ৰত্যাহাৰ কৰা হ‘ব বুলি পূৰ্বেই জানিবলৈ দিছিল কেন্দ্ৰীয় গৃহমন্ত্ৰী অমিত শ্বাহে। ইতিমধ্যে বেছিভাগ ঠাইৰ পৰাই এই আইন আঁতৰোৱা হৈছে যদিও এতিয়াও কিছুমান অঞ্চলত ই বাহাল আছে। এনে অৱস্থাত উত্তৰ-পূৰ্বাঞ্চলৰ পৰা কেতিয়া এই আইন সম্পূৰ্ণৰূপে প্ৰত্যাহাৰ কৰা হ‘ব সেই বিষয়ে স্পষ্ট কৰি দিছে গৃহমন্ত্ৰীগৰাকীয়ে। তেওঁ জানিবলৈ দিয়া মতে, অহা বছৰৰ ভিতৰতে উত্তৰ-পূবৰ ৰাজ্যসমূহৰ পৰা আফস্পা সম্পূৰ্ণৰূপে তুলি লোৱা হ‘ব।
যোৱা বৃহস্পতিবাৰে দিল্লীত কেন্দ্ৰ, নাগালেণ্ড আৰু অসম চৰকাৰৰ মাজত খাৰুৱা তেল আৰু প্ৰাকৃতিক গেছৰ এখন চুক্তি স্বাক্ষৰিত হয়। সেই উপলক্ষে আয়োজিত অনুষ্ঠানত ভাষণ দি গৃহমন্ত্ৰীগৰাকীয়ে কয় যে উত্তৰ-পূবৰ নিৰাপত্তা পৰিস্থিতি ক্ৰমান্বয়ে উন্নত হৈছে। যাৰ ফলত ইতিমধ্যে উত্তৰ-পূবৰ ৮০ শতাংশ এলেকাৰ পৰা আফস্পা প্ৰত্যাহাৰ কৰা হৈছে। বাকী থকা অঞ্চলসমূহৰ পৰাও অহা বছৰৰ ভিতৰত এই আইন প্ৰত্যাহাৰ কৰা হ‘ব। গৃহমন্ত্ৰীয়ে লগতে কয় যে যোৱা কেইবছৰমানত উত্তৰ-পূবৰ ৰাজ্যসমূহত হিংসাত্মক ঘটনা বহু পৰিমাণে হ্ৰাস পাইছে। যিবোৰ অঞ্চলত এতিয়াও আফস্পা বাহাল আছে, সেই অঞ্চলসমূহৰ নিৰাপত্তা ব্যৱস্থাৰ বিতং পৰ্যালোচনা চলি আছে। চৰকাৰৰ মূল লক্ষ্য হৈছে অহা বছৰৰ ভিতৰত সমগ্ৰ উত্তৰ-পূৰ্বাঞ্চলৰ পৰা আফস্পা সম্পূৰ্ণৰূপে প্ৰত্যাহাৰ কৰা।
উল্লেখ্য যে উত্তৰ-পূব ভাৰতৰ পৰা সেনাৰ এই বিশেষ ক্ষমতা বা আফস্পা প্ৰত্যাহাৰৰ দাবী আজিৰ নহয়, ই বহু পুৰণি। সাধাৰণ নাগৰিকৰ নিৰাপত্তাৰ নামত সেনাই তেওঁলোকৰ ওপৰত অকথ্য নিৰ্যাতন চলোৱা বুলি প্ৰায়েই অভিযোগ উত্থাপন হয়। নব্বৈৰ দশকৰ পৰা অসম, নাগালেণ্ডকে ধৰি উত্তৰ-পূব ভাৰতৰ প্ৰায়বোৰ ৰাজ্যকে সন্ত্ৰাসজৰ্জৰ এলেকা হিচাপে চিহ্নিত কৰি তাত সেনাৰ বিশেষ ক্ষমতা প্ৰয়োগ কৰাৰ অধিকাৰ কেন্দ্ৰই দিছিল। অৱশ্যে সেনাৰ বিৰুদ্ধে অত্যাচাৰৰ অভিযোগ তুলি আফস্পা প্ৰত্যাহাৰৰ দাবীত দীৰ্ঘদিন ধৰি আন্দোলন কৰিছিল সমাজকৰ্মী ইৰম শৰ্মিলা চানুৱে। এই ইতিহাস কাৰোৰে অজানা নহয়।
বৰ্তমান মণিপুৰৰ অৱস্থা অতি শোচনীয়। যোৱা তিনি বছৰ ধৰি জাতিগত সংঘৰ্ষত জুই জ্বলি আছে এই ৰাজ্যখনত। যোৱা কেইদিনমানত মণিপুৰৰ কেইবাটাও অঞ্চলত আক্ৰমণৰ ঘটনাও পোহৰলৈ আহিছে। বহিৰাগত শক্তি আৰু সন্ত্ৰাসবাদী সংগঠনৰ সহযোগত সেই অঞ্চলত নতুনকৈ অশান্তি সৃষ্টিৰ ষড়যন্ত্ৰ চলোৱা বুলিও অভিযোগ উঠিছে। এনে এক জটিল পৰিস্থিতিৰ মাজতেই আফস্পা প্ৰত্যাহাৰৰ সন্দৰ্ভত গুৰুত্বপূৰ্ণ মন্তব্য প্ৰকাশ কৰিছে কেন্দ্ৰীয় গৃহমন্ত্ৰী অমিত শ্বাহে।
