অসমৰ পৰিবহণ মন্ত্ৰী কোন? চন্দ্ৰমোহন পাটোৱাৰী নে মুখ্যমন্ত্ৰী ডঃ হিমন্ত বিশ্ব শৰ্মা?
যদি অসমৰ পৰিবহন দপ্তৰৰ মন্ত্ৰী হিচাপে চন্দ্ৰমোহন পাটোৱাৰীৰ নাম মনলৈ আহিছে তেন্তে কেইটামান বিজ্ঞাপন দেখিলে সেই ধাৰণা আপোনাৰ সলনি হ’ব।
কিয়না নিয়মমাফিক হিচাপেহে যেন ৰাজ্যৰ পৰিবহন বিভাগৰ দায়িত্ব লৈ আছে মন্ত্ৰী চন্দ্ৰমোহন পাটোৱাৰীয়ে।
বিজ্ঞাপনত কিয় এলাগী মন্ত্ৰী চন্দ্ৰমোহন পাটোৱাৰী?
এখন ৰাজ্য কেতিয়াও এজন মুখ্যমন্ত্ৰীয়ে চলাব নোৱাৰে। তেওঁৰ সমান্তৰালকৈ বিভিন্ন দপ্তৰ চম্ভালিবলৈ বিভিন্নজনক মন্ত্ৰীৰ দায়িত্ব দিয়া হয়।
কিন্তু ৰাজ্যৰ পৰিবহন বিভাগৰ বিজ্ঞাপনতে নাই মন্ত্ৰী চন্দ্ৰমোহন পাটোৱাৰীৰ নাম তথা ফটো।
ৰাজ্যৰ আগশাৰীৰ বাতৰি কাকতৰ প্ৰথম পৃষ্ঠা সম্পূৰ্ণকৈ জোৰা এটা বিজ্ঞাপন। য’ত পথ সুৰক্ষাৰ বাবে পঞ্চসুত্ৰ পালন কৰিবলৈ পথচাৰী বা চালকসকলক আহ্বান জনোৱা হৈছে।
বিজ্ঞাপনটোত স্পষ্টকৈ উল্লেখ আছে অসম চৰকাৰ পৰিবহন বিভাগ। কিন্তু সেই বিজ্ঞাপনটোত ভালদৰে চকু ফুৰালে আপুনি দেখা নাপাব মন্ত্ৰী চন্দ্ৰমোহন পাটোৱাৰীৰ নাম। বৰঞ্চ ডাঙৰকৈ জিলিকি থাকিল মুখ্যমন্ত্ৰীৰ ফটো।
তদুপৰি মহানগৰীৰ জি. এছ ৰোডৰ পথৰ দাঁতিত লগোৱা এইসমূহ বেনাৰ পোষ্টাৰতো সকলোতে কেৱল মুখ্যমন্ত্ৰীৰ ফটোৱেই দেখিবলৈ পোৱা যাব। এই বেনাৰ পোষ্টাৰতো এলাগী হ’ল পৰিবহন মন্ত্ৰী চন্দ্ৰমোহন পাটোৱাৰী।
ঠিক সেইদৰে মাজ নিশালৈকে কালি মুখ্যমন্ত্ৰী ড০ হিমন্ত বিশ্ব শৰ্মা আৰু পৰিবহন বিভাগৰ মন্ত্ৰী চন্দ্ৰমোহন পাটোৱাৰীয়ে পৃথকে পৃথকে জিলা পৰিবহন বিষয়া আৰু আৰক্ষীৰ সৈতে অভিযানত নমা পৰিলক্ষিত হ’ল। যিটো দায়িত্ব পৰিবহন মন্ত্ৰী হিচাপে চন্দ্ৰমোহন পাটোৱাৰীয়ে অকলেই সম্পাদন কৰিব পাৰিলেহেঁতেন তেনেক্ষেত্ৰত হাইলাইটত আহিল মুখ্যমন্ত্ৰী ড০ হিমন্ত বিশ্ব শৰ্মাৰ নাম।
মহানগৰীৰ চাৰিটাকৈ স্থান ক্ৰমে গণেশগুৰি, চান্দমাৰী, উলুবাৰী আৰু গুৱাহাটী ক্লাৱত ওৰে নিশাটো আৰক্ষীৰ সৈতে অভিযানত নামি পৰিল মুখ্যমন্ত্ৰী ড০ হিমন্ত বিশ্ব শৰ্মা।
প্ৰশ্ন হৈছে; পৰিবহন মন্ত্ৰীৰ কাম-কাজত সন্তুষ্ট নহয় নেকি মুখ্যমন্ত্ৰী?
ক্ষমতাৰ বিকেন্দ্ৰীকৰণ নিবিচাৰে নেকি মুখ্যমন্ত্ৰী ড০ শৰ্মাই?
মুখ্যমন্ত্ৰীতে ক্ষমতা কেন্দ্ৰীভূত হৈছে নেকি অসমত?
নে অখিল গগৈৰ ভাষাৰে মুখ্যমন্ত্ৰীয়ে ৰজা, তেওঁৱেই মন্ত্ৰী বা তেওঁৱেই বিধায়ক বা তেওঁৱেই সৰ্বে-সৰ্বা?
অন্য এক প্ৰসংগও উত্থাপন নোহোৱা নহয়। আভ্যন্তৰীণ সংঘাত হৈছে নেকি বিজেপি চৰকাৰৰ ভিতৰচ’ৰাত? কিয় নিজৰ হাতত গৃহ, লোক নিৰ্মাণ বিভাগকে ধৰি বহুকেইটা গুৰুত্বপূৰ্ণ দপ্তৰ থকাৰ পাছতো বেলেগৰ দপ্তৰত হস্তক্ষেপ কৰিছে মুখ্যমন্ত্ৰী ড০ হিমন্ত বিশ্ব শৰ্মাই? তেওঁৰ লবীৰ বাহিৰৰ মন্ত্ৰীসকলক নিষ্কৰ্মা সজাই একনায়কত্ববাদ প্ৰতিষ্ঠাৰ সূচনা কৰিছে নেকি মুখ্যমন্ত্ৰী ড০ হিমন্ত বিশ্ব শৰ্মাই?