জে. পি নড্ডাৰ পিছত কোন হ’ব বিজেপিৰ ৰাষ্ট্ৰীয় সভাপতি? প্ৰধানমন্ত্ৰী নৰেন্দ্ৰ মোদীৰ সৈতে বিজেপিৰ শীৰ্ষ নেতৃত্বৰ বৈঠক। দেশৰ কমেও ৫০ শতাংশ ৰাজ্য আৰু কেন্দ্ৰীয় শাসিত অঞ্চলত ৰাজ্যিক সভাপতি নিৰ্বাচন সম্পন্ন হোৱাৰ পিছতে আনুষ্ঠানিকভাৱে আৰম্ভ হ’ব কেন্দ্ৰীয় সভাপতি নিৰ্বাচনৰ প্ৰক্ৰিয়া। সূত্ৰ অনুসৰি দলৰ ৰাষ্ট্ৰীয় সভাপতি নিৰ্বাচন চূড়ান্ত কৰাৰ লগতে বিভিন্ন ৰাজ্যৰ সভাপতিৰ নাম নিৰ্ধাৰণ আৰু কেবিনেট সম্প্ৰসাৰণৰ বিষয়ে আলোচনা কৰে এই বৈঠকত।
বিগত দুদিন ধৰি বিজেপিৰ বৰ্তমান সভাপতি জে পি নড্ডাই দলৰ শীৰ্ষ নেতৃত্বৰ সৈতে বৈঠকত তেওঁৰ উত্তৰাধিকাৰীৰ সন্ধান কৰিছিল। প্ৰধানমন্ত্ৰী নৰেন্দ্ৰ মোদীৰ বাসগৃহত নড্ডা, শ্বাহ, ৰাজনাথ সিং আৰু সৰ্বভাৰতীয় সাধাৰণ সম্পাদক বি এল সন্তোষৰ উপস্থিতিত এক বৈঠকত সভাপতি নিৰ্বাচনৰ বিষয়ত সকলো সহমতত উপনিত হৈছে। বৈঠকত হাৰিয়ানাৰ পূৰ্বৱৰ্তী মুখ্যমন্ত্ৰী মনোহৰ লাল খট্টৰ, মধ্যপ্ৰদেশৰ পূৰ্বৱৰ্তী মুখ্যমন্ত্ৰী শিৱৰাজ সিং চৌহান, ধৰ্মেন্দ্ৰ প্ৰধান আৰু ভূপেন্দ্ৰ যাদৱক সম্ভাৱ্য সভাপতি হিচাপে বিবেচনা কৰা হৈছে বুলি জানিব পৰা গৈছে।
এনডিএ নতুন যোগদান কৰা এআইএডিএমকে (অজিত পাৱাৰৰ পক্ষৰ এনসিপি) নেতা প্ৰফুল্ল পেটেলৰ মন্ত্ৰী পদৰ সম্ভাৱনা প্ৰকাশ পাইছে। ১৪ ৰাজ্য আৰু কেন্দ্ৰীয় শাসিত অঞ্চলত ৰাজ্যিক সভাপতি নিৰ্বাচন ইতিমধ্যে সম্পূৰ্ণ হৈছে, কিন্তু উত্তৰ প্ৰদেশ, মধ্যপ্ৰদেশ, কৰ্ণাটকৰ দৰে বৃহৎ ৰাজ্যসমূহৰ সভাপতি নিৰ্বাচন ক্ষিপ্ৰতাৰে সম্পন্ন কৰাৰ প্রস্তুতি চলি আছে। পশ্চিম বংগত, বিধানসভা নিৰ্বাচনৰ আগত সভাপতি সালসলনি নকৰি বৰ্তমানৰ সভাপতি সুকান্ত মজুমদাৰক আগন্তুক বছৰৰ বাবে কাৰ্য নিৰ্বাহ কৰিবলৈ থিৰাং কৰিছে।
