অসমৰ ৰাজধানী হিচাপে দিছপুৰ সমষ্টিটোৰ গুৰুত্ব সৰ্বাধিক। দিছপুৰত থাকিয়েই কোনে দখল কৰিব দিছপুৰ সমষ্টি? এই প্ৰশ্নই বিশেষ চৰ্চা লাভ কৰে নিৰ্বাচনৰ পূৰ্বে।
দিছপুৰ সমষ্টিটো বৰ্তমান শাসনাধিষ্ঠ বিজেপিৰ বিধায়ক অতুল বৰাৰ হাতত আছে। সমষ্টিটোত যোৱাবাৰ নিৰ্বাচনত ২,৭৮,৮৬৯ গৰাকীয়ে ভোটাধিকাৰ সাব্যস্ত কৰিছিল। তাৰে বিধায়ক অতুল বৰাই লাভ কৰিছিল ১,৯৮,৩৭৮ টা ভোট। তাৰ বিপৰীতে কংগ্ৰেছৰ প্ৰাক্তন মন্ত্ৰী অকণ বৰাই লাভ কৰিছিল ৬৮,১৮১ টা ভোট।
বিজেপিৰ প্ৰাৰ্থীগৰাকীয়ে কংগ্ৰেছৰ প্ৰাৰ্থী অকণ বৰাক ১,৩০,১৯৭ টা ভোটৰ ব্যৱধানত পৰাজিত কৰিছিল।
খোৱা পানীৰ সমস্যা, মাটিৰ পট্টাৰ সমস্যা, ৰাস্তা-ঘাটৰ নিৰ্মাণৰ ক্ষেত্ৰত বিজেপি চৰকাৰে ২১ হাজাৰ কিল’মিটাৰ পথ পকীকৰণ কৰা বুলি দাবী কৰিলেও একমাত্ৰ বিধায়কৰ হেমাহিৰ বাবেই ৰাস্তা-ঘাট পকী হোৱাৰ পৰা বঞ্চিত হ’বলগীয়া হ’ল বুলি সমষ্টিবাসীয়ে অভিযোগ কৰিছে।
সেয়েহে এইবাৰ অতুল বৰাই সমষ্টিটোত প্ৰাৰ্থী হিচাপে বিজেপিয়ে তেওঁকেই থিয় কৰাব বুলি দাবী কৰিলেও বিজেপিৰ শীৰ্ষ নেতৃত্বই সভাপতি ৰঞ্জিত দাসে দিয়া ৰিপৰ্ট কাৰ্ডৰ ভিত্তিত বিধায়কগৰাকীক প্ৰাৰ্থীত্বৰ পৰা বঞ্চিত কৰাৰ সম্ভাৱনা প্ৰকট।
এনে সময়তে বিজেপিৰে আন দুগৰাকী প্ৰাৰ্থীত্ব প্ৰত্যাশীৰ নাম চৰ্চালৈ আহিছে। তেওঁলোক দুগৰাকী ক্ৰমে বিজেপিৰ উপ সভাপতি জয়ন্ত দাস আৰু বিজেপিৰ ৰাজ্যিক কাৰ্য্যনিৰ্বাহক তথা যুৱ মৰ্চাৰ প্ৰাক্তন সভাপতি মৃগাংক বৰ্মণৰ নাম।
ইতিমধ্যে, বহু সময়ত জয়ন্ত দাসক বৰ্তমানৰ বিধায়কগৰাকীৰ বিৰুদ্ধে সৰৱ হৈ পৰা দেখিবলৈ পোৱা গৈছে। তেওঁ সংবাদ মাধ্যমৰ আগত অভিযোগ কৰা মতে অন্য সমষ্টিৰ তুলনাত বিজেপি শাসিত দিছপুৰ সমষ্টিত উন্নয়ন বহু কম পৰিমাণে হৈছে।
ইপিনে, অসম গণ পৰিষদেও বিজেপিৰ পৰা বিচাৰিছে দিছপুৰ সমষ্টি। অসম গণ পৰিষদে দিছপুৰ সমষ্টিৰ পৰা অগপৰ যুৱ নেতা ড০ তপন দাসক থিয় কৰোৱাৰ পূৰ্ণ সম্ভাৱনা থকা বুলি জানিব পৰা গৈছে। ইতিমধ্যে, তপন দাসে সমষ্টিটোৰ বিভিন্ন প্ৰান্তত গৈ প্ৰচাৰ চলোৱা লগতে নিজৰ পোষ্টাৰ-হৰ্ডিং লগোৱা আৰম্ভ কৰিছে।
কিন্তু বিজেপিয়ে নিজৰ দখলত থকা সমষ্টিটো অসম গণ পৰিষদৰ এখন নতুন মুখত এৰি নিদিয়াটো একপ্ৰকাৰ নিশ্চিত বুলিয়েই উল্লেখ কৰিব পাৰি। যাৰ বাবে এক বিসম্বাদ বা চিপৰাং ৰাজনীতিৰ সৃষ্টি হোৱাৰ সম্ভাৱনা প্ৰকট।
আনহাতে, কংগ্ৰেছৰ পৰাও সমষ্টিটোত প্ৰাক্তন মন্ত্ৰী অকন বৰা, বলীন বৰদলৈ আৰু বন্তি হাজৰিকা প্ৰাৰ্থীত্ব প্ৰত্যাশী। তেওঁলোক তিনিওগৰাকীয়ে ইতিমধ্যে প্ৰাৰ্থীত্ব বিচাৰি আবেদন কৰা বুলি জানিব পৰা গৈছে।
তাৰ বিপৰীতে আঞ্চলিক গণ মৰ্চাই দিছপুৰ সমষ্টিটোত তেওঁলোকৰ প্ৰাৰ্থী প্ৰক্ষেপ কৰিব বিচাৰিছে। আঞ্চলিক গণ মৰ্চাই মনজিৎ মহন্তক সমষ্টিটোত মহাজোঁটৰ প্ৰাৰ্থী হিচাপে প্ৰক্ষেপ কৰিবলৈ ইচ্ছুক বুলি স্পষ্ট কৰি দিছে।
সমষ্টিটোৰ বিভিন্ন প্ৰান্তত মনজিৎ মহন্তৰ বেনাৰ পোষ্টাৰ লগোৱা দেখিবলৈ পোৱা গৈছে।
কিন্তু মনজিৎ মহন্তক কংগ্ৰেছে এৰি দিব নে এনে এটা গুৰুত্বপূৰ্ণ সমষ্টি? এই প্ৰশ্নও বহু চৰ্চিত হৈছে।
মুঠৰ ওপৰত কোনোধৰণৰ অংক নিমিলা হৈছে কংগ্ৰেছৰ মহাজোঁট আৰু বিজেপিৰ মিত্ৰজোঁটৰ মাজত।
দুয়োটা দলৰে শীৰ্ষ নেতৃত্ব এতিয়া চিন্তাত পৰিছে, তেওঁলোকে কাক এৰিব কাক ধৰিব বা কাক টিকট দি সন্তুষ্ট কৰিব? মুঠৰ ওপৰত মিত্ৰজোঁট, মহাজোঁটত এতিয়া মহা আউল লগা পৰিলক্ষিত হৈছে।
তাৰ মাজতে আমাৰ হাতলৈ অহা খবৰ অনুসৰি দিছপুৰ সমষ্টিৰ পৰা বৰ্তমানলৈকে কোনো এগৰাকীয়েও অসম জাতীয় পৰিষদ আৰু ৰাইজৰ দলৰ পৰা প্ৰাৰ্থীত্ব বিচাৰি আবেদন কৰা নাই।
সমষ্টিটোৰ পৰা অসম জাতীয় পৰিষদৰ সঞ্জীৱ বৰাই প্ৰতিদ্বন্দ্বিতা কৰাৰ চৰ্চা চলিছিল যদিও তেওঁক এই সন্দৰ্ভত সোধাত তেওঁ এই কথা নাকচ কৰে।
ৰাইজৰ দলৰ পৰা ৰাজ্যিক কাৰ্য্যনিৰ্বাহক প্ৰদীপ বৰুৱা বৰ্তমানলৈকে একমাত্ৰ প্ৰাৰ্থীত্ব প্ৰত্যাশী বুলি এক সুত্ৰত প্ৰকাশ পাইছে যদিও তেওঁ বৰ্তমানলৈকে টিকট বিচাৰি আবেদন কৰা নাই।
অৱশ্যে, ৰাইজৰ দলৰ হৈ প্ৰদীপ বৰুৱাই সমষ্টিটোত ঘৰে ঘৰে গৈ নিজাববীয়াকৈ প্ৰচাৰ চলাই থকা বুলি জানিব পৰা গৈছে।
