যোৱা ২৮ ফেব্ৰুৱাৰীত ইজৰাইল আৰু আমেৰিকাৰ যুটীয়া আক্ৰমণত ইৰানৰ শীৰ্ষ নেতা আয়াতোল্লা আলী খামেনেইৰ মৃত্যু হৈছিল। তেওঁৰ মৃত্যুৰ পিছত ইতিমধ্যে ১০০ দিনতকৈও অধিক সময় পাৰ হৈ গৈছে যদিও এতিয়ালৈকে তেওঁৰ মৃতদেহ কবৰ দিয়া হোৱা নাই। খামেনেইৰ মৃত্যুৰ পিছত তেওঁৰ পুত্ৰ মোজতবা খামেনেই ইৰানৰ নতুন শীৰ্ষ নেতা হৈছে। কিন্তু ইমান দীঘলীয়া সময় পাৰ হৈ যোৱাৰ পিছতো পূৰ্বৰ নেতাগৰাকীৰ শেষকৃত্য সম্পন্ন কৰিব নোৱাৰাটোৱে এতিয়া ডাঙৰ প্ৰশ্নৰ সৃষ্টি কৰিছে।
ইৰানৰ তৰফৰ পৰা জনোৱা হৈছিল যে মাশ্বহাদ চহৰত খামেনেইৰ মৃতদেহ সমাহিত কৰা হ’ব। কিন্তু তাৰ পূৰ্বে তেওঁৰ নশ্বৰ দেহ ইৰানৰ বিভিন্ন চহৰলৈ লৈ গৈ ডাঙৰ শোক সমদল উলিওৱাৰ পৰিকল্পনা কৰা হৈছিল। এতিয়া জানিব পৰা গৈছে যে নিৰাপত্তাজনিত ডাঙৰ উদ্বেগৰ বাবেই আচলতে এই শেষকৃত্য সম্পন্ন কৰিব পৰা হোৱা নাই। ইৰান কৰ্তৃপক্ষই ভাবিছে যে বৰ্তমানৰ পৰিস্থিতিত ডাঙৰ সমাৱেশ পতাটো অতি বিপদজ্জনক হ’ব পাৰে। কাৰণ তেনে জমায়ত হ’লে তাত ইজৰাইল বা আমেৰিকাই পুনৰ আক্ৰমণ কৰাৰ সম্ভাৱনা আছে আৰু ইয়াৰ ফলত বহু লোকৰ প্ৰাণহানি হ’ব পাৰে। অৱশ্যে খামেনেইৰ মৃতদেহ বৰ্তমান ক’ত ৰখা হৈছে সেই বিষয়ে ইৰানে একো প্ৰকাশ কৰা নাই বাবে মৃতদেহটোৰ অৱস্থাক লৈ বিভিন্ন জল্পনা-কল্পনা চলিছে।
ইৰানৰ এটা সংবাদ মাধ্যমৰ খবৰ অনুসৰি দেউতাকৰ অন্ত্যেষ্টিক্ৰিয়াত পুত্ৰ মোজতবা উপস্থিত থকাটো প্ৰয়োজনীয়। কিন্তু নিৰাপত্তাৰ অভাৱৰ বাবে বৰ্তমান তেনে পৰিৱেশ নাই। ইৰানৰ নতুন নেতা হোৱাৰ পিছৰে পৰা মোজতবাই এবাৰো ৰাইজৰ সন্মুখলৈ অহা নাই কাৰণ তেওঁৰো প্ৰাণনাখৰ গভীৰ আশংকা আছে। বিভিন্ন প্ৰতিবেদনত দাবী কৰা হৈছে যে যোৱা ২৮ ফেব্ৰুৱাৰীৰ সেই আক্ৰমণত মোজতবা কোনোমতে বাচি গৈছিল যদিও তেওঁ গুৰুতৰভাৱে জখম হৈছিল। তেওঁৰ মুখ আৰু ভৰিত গভীৰ আঘাত লাগিছিল আৰু আনকি তেওঁৰো মৃত্যু হোৱা বুলি চৰ্চা চলিছিল। এই নিৰাপত্তাৰ অভাৱ আৰু জটিল পৰিস্থিতিৰ বাবেই খামেনেইৰ শেষকৃত্য বৰ্তমানলৈকে সম্পন্ন কৰিব পৰা হোৱা নাই।
