পিতৃ মাতৃয়ে কেতিয়াও নিজৰ সন্তানৰ অমঙ্গল নিবিচাৰে আৰু এই কথাষাৰ সম্পূৰ্ণ সঁচা। কিন্তু বহু সময়ত দেখা যায় যে পিতৃ মাতৃয়ে গম নোপোৱাকৈয়ে সন্তানৰ ব্যক্তিগত জীৱনৰ আটাইতকৈ ডাঙৰ সমস্যাৰ কাৰণ হৈ পৰে। মাক দেউতাকৰ অতিমাত্ৰা হস্তক্ষেপৰ বাবেই বহুতো সুন্দৰ পৰিয়াল ভাঙি যোৱা দেখা যায়। আটাইতকৈ দুখৰ কথাটো হ’ল এটা সময়লৈকে ল’ৰা ছোৱালীবোৰে বুজি নাপায় যে আচলতে সমস্যাটো ক’ত হৈছে। যেতিয়ালৈকে তেওঁলোকে এই কথা উপলব্ধি কৰে, তেতিয়ালৈকে বহুত পলম হৈ যায় আৰু পৰিস্থিতি নিয়ন্ত্ৰণৰ বাহিৰলৈ গুচি যায়। সেইবাবে সময় থাকোতেই কিছুমান কথাৰ ওপৰত গুৰুত্ব দিয়াটো অতি প্ৰয়োজনীয়।
সন্তানৰ বিয়া হোৱাৰ পিছতো বহু পিতৃ মাতৃয়ে এইটো বুজিব নিবিচাৰে যে তেওঁলোকৰ সন্তান এতিয়া ডাঙৰ হ’ল। তেওঁলোকৰ এটা নিজস্ব ব্যক্তিগত জীৱন আছে য’ত প্ৰতিটো সৰু বৰ কথা মাক দেউতাকে জনাৰ প্ৰয়োজন নাই। বহু অভিভাৱকে অভ্যাসত পৰিণত কৰি সন্তানৰ ব্যক্তিগত জীৱনত প্ৰৱেশ কৰে আৰু বিভিন্ন মন্তব্য বা পৰামৰ্শ দিয়ে। ইয়াৰ ফলত স্বামী স্ত্ৰীৰ মাজত বিভাজনৰ সৃষ্টি হয়। বিবাহিত জীৱনত সৰু সুৰা মতানৈক্য হোৱাটো নিচেই স্বাভাৱিক কথা। কিন্তু এই কথাবোৰত যেতিয়াই পিতৃ মাতৃ জড়িত হৈ পৰে, তেতিয়াই সমস্যাটোৱে চৰম ৰূপ ধাৰণ কৰে। পিতৃ মাতৃয়ে বুজিব লাগে যে নিজৰ সন্তানৰ সৰু সৰু কাজিয়াত সংগীৰ বিৰুদ্ধে থিয় দিয়াটো আচলতে সহায় নহয় বৰঞ্চ অপকাৰহে। পৰিস্থিতি হাতৰ পৰা ওলাই নগলে এনেবোৰ কথাত অভিভাৱক দূৰত থকাই মংগল।
সৰুতে ল’ৰা ছোৱালীয়ে মাক দেউতাকৰ কথা মানি চলে আৰু এয়া স্বাভাৱিক। কিন্তু বিয়াৰ পিছত পৰিস্থিতি সলনি হয় কাৰণ তেওঁলোকৰ ওপৰত আন এজন ব্যক্তিৰ দায়িত্ব আহি পৰে। আনজনক সুখী কৰি ৰখাটো তেতিয়া অগ্ৰাধিকাৰ হৈ পৰে। ইয়াৰ মাজতে যদি পিতৃ মাতৃয়ে সৰুকালৰ দৰে নিজৰ মতামত সন্তানৰ ওপৰত জাপি দিবলৈ চেষ্টা কৰে তেন্তে সংঘাত অনিবাৰ্য। তদুপৰি বহু সময়ত দেখা যায় যে পিতৃ মাতৃয়ে নিজৰ বোৱাৰী বা জোঁৱাইৰ বিৰুদ্ধে বিভিন্ন অভিযোগ কৰে আৰু ৰাজহুৱাকৈ আপত্তিজনক মন্তব্য দিয়ে। এনে আচৰণে সন্তানৰ বিবাহিত জীৱনত বিষ ঢালি দিয়ে। ইয়াৰ উপৰিও সন্তানক তেওঁলোকৰ সংগীৰ সৈতে সময় কটাবলৈ দিব লাগে। তেওঁলোকক একেলগে ফুৰিবলৈ যোৱা বা ব্যক্তিগত সময় কটোৱাত বাধা দিয়াটো অনুচিত। বহু পিতৃ মাতৃয়ে এই ব্যক্তিগত সময়তো অনুপ্ৰৱেশ কৰিবলৈ চেষ্টা কৰে যিটো বিবাহৰ বাবে অত্যন্ত ক্ষতিকাৰক। যদি আপুনি অনুভৱ কৰিছে যে আপোনাৰ জীৱনতো এনে ঘটিছে, তেন্তে এতিয়াই সাৱধান হোৱাটো দৰকাৰ।
