অসমৰ তিনিচুকীয়া জিলাৰ পেংগ্ৰী অঞ্চলত শুকুৰবাৰে নিশা এক অতি শোকাবহ ঘটনা সংঘটিত হয়। ডুমডুমা বন সংমণ্ডলৰ অন্তৰ্গত ব্ৰহ্মজান চাহ বাগিচাত এটা বনৰীয়া হাতীৰ জাকে আক্ৰমণ চলাই একেটা পৰিয়ালৰে মাতৃ আৰু পুত্ৰক কৰুণভাৱে মৃত্যুমুখলৈ ঠেলি দিয়ে। এই ঘটনাই সমগ্ৰ অঞ্চলটোতে গভীৰ শোকৰ ছাঁ পেলাইছে।
প্ৰাপ্ত তথ্য অনুসৰি যোৱা ৬ মাৰ্চৰ মাজনিশা ব্ৰহ্মজান চাহ বাগিচাৰ শ্ৰমিক লাইনত বনৰীয়া হাতীৰ জাকটোৱে প্ৰৱেশ কৰি আতংকৰ সৃষ্টি কৰিছিল। খাদ্যৰ সন্ধানত অহা হাতীৰ জাকটোৱে হঠাতে চাহ বাগিচাৰ শ্ৰমিক বুধন ৰাউতিয়া আৰু তেওঁৰ বৃদ্ধ মাতৃ অনিতা ৰাউতিয়াৰ বাসগৃহত আক্ৰমণ চলায়। হাতীয়ে ঘৰটো ভাঙি লণ্ডভণ্ড কৰাৰ লগতে ভিতৰত থকা ৫০ বছৰীয়া বুধন ৰাউতিয়া আৰু ৭০ বছৰীয়া অনিতা ৰাউতিয়াক ভৰিৰে মোহাৰি পেলায়। হাতীৰ গছকনত দুয়োৰে থিতাতে মৃত্যু হয়।
নিশাৰ আন্ধাৰত হাতীৰ জাকটোৱে শ্ৰমিক লাইনৰ মাজেৰে চলাচল কৰিবলৈ আৰম্ভ কৰাত অঞ্চলটোত এক হাহাকাৰ পৰিৱেশৰ সৃষ্টি হৈছিল। হাতীৰ তাণ্ডৱত কেইবাটাও বাসগৃহৰ লগতে সা-সম্পত্তিৰো বিস্তৰ ক্ষতিসাধন হয়। প্ৰাণৰ মমতাত বহু পৰিয়ালে মাজনিশাই ঘৰৰ পৰা ওলাই আহি সুৰক্ষিত স্থানত আশ্ৰয় ল’বলগীয়া হয়। স্থানীয় ৰাইজে জনোৱা মতে যোৱা কেইবাদিনো ধৰি এই হাতীৰ জাকটোৱে অঞ্চলটোত বিচৰণ কৰি আছিল।
স্থানীয় গাঁওবাসী আৰু চাহ বাগিচাৰ কৰ্মীসকলে এই ঘটনাক লৈ তীব্ৰ ক্ষোভ প্ৰকাশ কৰিছে। তেওঁলোকে অভিযোগ কৰা মতে অঞ্চলটোত হাতীৰ উপদ্ৰৱ বৃদ্ধি পোৱাৰ সন্দৰ্ভত বন বিভাগক আগতীয়াকৈ অৱগত কৰা হৈছিল। কিন্তু বন বিভাগে কোনো ধৰণৰ ফলপ্ৰসূ ব্যৱস্থা গ্ৰহণ নকৰাৰ বাবেই আজি এইদৰে দুগৰাকী নিৰীহ লোকে প্ৰাণ হেৰুৱাবলগীয়া হ’ল বুলি ৰাইজে মত প্ৰকাশ কৰিছে। বৰ্তমান এই ঘটনাক লৈ সমগ্ৰ পেংগ্ৰী অঞ্চলতে এক উত্তপ্ত তথা আতংকময় পৰিৱেশ বিৰাজ কৰিছে।
