ৰাজ্যৰ বিভিন্ন অঞ্চলত বনৰীয়া হাতীৰ তাণ্ডৱ অব্যাহত থকাৰ সময়তে কালি নিশা গুৱাহাটী মহানগৰীৰ পাঞ্জাবাৰী অঞ্চলত তিনিজনীয়া বনৰীয়া হাতীৰ এটা দলে আক্ৰমণ চলাই চাৰিজন লোকক গুৰুতৰভাৱে আঘাতপ্ৰাপ্ত কৰে।
হাতীৰ আক্ৰমণত গুৰুতৰভাৱে আহত হোৱা চাৰিজন লোকৰ ভিতৰত এগৰাকী মহিলাৰ অৱস্থা অতিকৈ সংকটজনক বুলি জানিব পৰা গৈছে। সংকটজনক অৱস্থাত চিকিৎসালয়ত ভৰ্তী কৰোৱা মহিলাগৰাকীক কাবেৰী শইকীয়া বৰা বুলি চিনাক্ত কৰা হৈছে।
উল্লেখ্য যে খাদ্যৰ সন্ধানত আমচাঙ বনাঞ্চলৰ পৰা ওলাই অহা হাতী তিনিটাৰ এটা হাতী হাবিলৈ যোৱাৰ পথ বিচাৰি নোপোৱাত হাতীটোৱে সমগ্ৰ অঞ্চলটোতে তাণ্ডৱৰ সৃষ্টি কৰে। আনহাতে হাতীটোৱে অঞ্চলটোৰ কেইবাটাও ঘৰ ভাঙি লণ্ড-ভণ্ড কৰাৰ লগতে বহু কেইখন বাহনৰো যথেষ্ট ক্ষতিসাধন কৰে বুলি জানিব পৰা যায়।
এইদৰে ৰাজ্যৰ বিভিন্ন প্ৰান্তত বনৰীয়া হাতীৰ উপদ্ৰৱে ৰাইজৰ নিদ্ৰাহৰণ কৰাৰ বিপৰীতে ৰাইজক আশ্বস্ত কৰিব পৰাকৈ বন বিভাগে এতিয়ালৈ কোনো পদক্ষেপে লোৱা নাই বুলি বহুতো বিশেষজ্ঞই অভিযোগ উত্থাপন কৰিছে। এতিয়া এইদৰে অসমত হাতী-মানুহৰ সংঘাত কেতিয়ালৈ চলি থাকিব সেই লৈ ডাঙৰ প্ৰশ্নৰ উদয় হৈছে ৰাইজ তথা সচেতন লোকৰ মাজত।
