তিনিচুকীয়া জিলাৰ ডিগবৈ বন সংমণ্ডলৰ অন্তৰ্গত আপাৰ দিহিং সংৰক্ষিত বনাঞ্চলৰ পৰা খাদ্যৰ সন্ধানত ওলাই অহা বনৰীয়া হস্তীয়ে মাৰ্ঘেৰিটা মহকুমাৰ বিভিন্ন অঞ্চলত সন্ত্ৰাস সৃষ্টি কৰাৰ পৰতে মঙলবাৰে নিশা পেঙেৰীত ব্যাপক তাণ্ডৱ চলায়।
পেঙেৰীৰ অম্বিকাপুৰ গাঁৱৰ ৰাম ছেত্ৰী আৰু হোম ছেত্ৰী নামৰ ব্যক্তি দুজনৰ বাসগৃহ হাতীয়ে ভাঙি লণ্ড ভণ্ড কৰে৷ অৱশ্যে হাতীৰ আক্ৰমণৰ পৰা কথমপি ৰক্ষা পৰে পৰিয়াল দুটাৰ সদস্যসকল।
বনাঞ্চলৰ অবাধ ধ্বংসৰ বাবেই হাতী জনাঞ্চললৈ ওলাই অহা বুলি মন্তব্য কৰিছে অসম জাতীয়তাবাদী যুৱ-ছাত্ৰ পৰিষদৰ তিনিচুকীয়া জিলা সমিতিৰ সাংগঠনিক সম্পাদক দেৱজিৎ সোনাৰে।
পেঙেৰী অঞ্চলত এই পৰ্য্যন্ত ১৫ জনতকৈও অধিক ব্যক্তি বনৰীয়া হস্তীৰ আক্ৰমণত নিহত হৈছে।
ভুক্তভোগী ৰাইজে বনাঞ্চল ধ্বংস বন্ধ কৰাৰ লগতে বন বিভাগৰ কমিছনৰাজ বন্ধ কৰাৰ বাবে দাবী উত্থাপন কৰিছে৷
