কোভিডে ক্ৰমাৎ কালান্তক ৰূপ ধাৰণ কৰা ৰাজ্যৰ বহু বিদ্যালয়ত এতিয়া পাঠদান সম্পূৰ্ণ ভাবে অথবা আংশিক ভাবে বন্ধ হৈ পৰিছে।
এনে পৰিস্থিতিত চলিত বৰ্ষৰ মে’ মাহত অনুষ্ঠিত হ’বলগীয়া হাইস্কুল শিক্ষান্ত পৰীক্ষা আৰু উচ্চতৰ মাধ্যমিকৰ চূড়ান্ত বৰ্ষৰ পৰীক্ষা অনুষ্ঠিত হ’ব নে নহয় তাকেলৈ ছাত্ৰ-ছাত্ৰী সকলৰ লগতে অভিভাৱক সকলো উদ্বিগ্ন হৈ পৰিছে।
পৰীক্ষা স্থগিত কৰাৰ প্ৰসংগত মন্তব্য কৰি আজি অসমৰ শিক্ষামন্ত্ৰী হিমন্ত বিশ্ব শৰ্মাই কয় যে ৰাজ্যৰ কোভিড পৰিস্থিতিৰ ওপৰত ভিত্তি কৰি এই বিষয়ত সিদ্ধান্ত লোৱা হ’ব।
ইয়াৰ বাবে চৰকাৰে ২ মে’ পৰ্যন্ত ৰাজ্যৰ কোভিড পৰিস্থিতি অধ্যয়ন কৰিব আৰু যদি পৰিস্থিতি উন্নত হোৱাৰ সলনি অধিক বেয়াৰ পিনেহে যায় তেন্তে চৰকাৰে পৰীক্ষা অনুষ্ঠিত কৰাৰ বিষয়টো নতুনকৈ ভাবিবলৈ বাধ্য হ’ব।
অৰ্থাৎ ২ মে’ৰ পিছতহে পৰীক্ষা স্থগিত ৰখাৰ বিষয়টো স্পষ্ট হ’ব।
মন্ত্ৰীগৰাকীয়ে লগতে কয় যে যদি গুৱাহাটী মেট্ট্ৰ’ত দৈনিক কোভিড ৰোগীৰ সংখ্যা ১০০০ বা তাতোকৈ ওপৰত যায় তেন্তে গুৱাহাটী মহানগৰীৰ শিক্ষানুষ্ঠান আৰু ছাত্ৰাবাস-ছাত্ৰী নিবাস আদি বন্ধ কৰাৰ বিষয়ত জিলা উপায়ুক্তই নিৰ্দেশ দিব পাৰিব।
উল্লেখ্য ইতিমধ্যে কোভিডৰ বাবেই মণিপুৰত উচ্চতৰ মাধ্যমিক আৰু উচ্চ মাধ্যমিকৰ পৰীক্ষা বাতিল কৰা হৈছে। বাতিল হৈছে জেইইৰ মূল পৰীক্ষা।
একেদৰে মে’ মাহত অনুষ্ঠিত হ’বলগীয়া CBSE ৰ দশম আৰু দ্বাদশ শ্ৰেণীৰ পৰীক্ষাৰ ক্ষেত্ৰত কেন্দ্ৰীয় চৰকাৰেও দুটা বৃহৎ সিদ্ধান্ত গ্ৰহণ কৰিছে।
সেই মৰ্মে CBSE ৰ দশম শ্ৰেণীৰ পৰীক্ষা ক’ৰ’ণাতংকৰ বাবে বাতিল কৰা হৈছে আৰু দ্বাদশ শ্ৰেণাৰ পৰীক্ষা অনিৰ্দিষ্ট কাললৈ স্থগিত ৰখাৰ সিদ্ধান্ত লোৱা হৈছে।
অলপতে প্ৰধানমন্ত্ৰী নৰেন্দ্ৰ মোদীৰ নেতৃত্বত অনুষ্ঠিত বিশেষ বৈঠকত এই সিদ্ধান্ত গ্ৰহণ কৰা হয়।
বৈঠকত গ্ৰহণ কৰা সিদ্ধান্ত অনুসৰি CBSE য়ে প্ৰস্তুত কৰা অৱজেক্টটিভ ক্ৰাইটেৰিয়াৰ ওপৰত ভিত্তি কৰি দশম শ্ৰেণীৰ ফলাফল ঘোষণা কৰা হ’ব।
যিসকল শিক্ষাৰ্থীয়ে সেই ফলাফলত সন্তুষ্ট নহ’ব তেওঁলোকে পৰৱৰ্তী সময়ত অনুষ্ঠিত কৰা বিশেষ পৰীক্ষাত বহিব পাৰিব।
একেদৰে দেশৰ ক’ৰ’ণা পৰিস্থিতিৰ ওপৰত ভিত্তি কৰি দ্বাদশ শ্ৰেণীৰ পৰীক্ষা অনুষ্ঠিত কৰাৰ সময় পুনৰ নিৰ্দ্ধাৰণ কৰা হ’ব আৰু আপাততঃ দ্বাদশ শ্ৰেণীৰ পৰীক্ষা স্থগিত ৰখাৰ সিদ্ধান্ত লোৱা হৈছে।
উল্লেখ্য অহা ৪ মে’ৰ পৰা CBSE ৰ দশম আৰু দ্বাদশ শ্ৰেণীৰ পৰীক্ষা অনুষ্ঠিত হোৱাৰ কথা আছিল।
ক’ৰ’ণাৰ সংহাৰৰ মাজতে পৰীক্ষা অনুষ্ঠিত কৰাৰ বিৰোধিতা কৰি দেশৰ ১ লাখ ছাত্ৰ-ছাত্ৰীয়ে চলিত বৰ্ষৰ মে’ মাহত অনুষ্ঠিত হ’বলগীয়া দশম আৰু দ্বাদশ শ্ৰেণীৰ পৰীক্ষা বাতিল কৰিবলৈ দাবী জনাই এখন পত্ৰত স্বাক্ষৰ কৰিছিল।