ৰাজ্যত আজিৰ দিনটোত সদৌ অসম ছাত্ৰ সন্থা আৰু অসম জাতীয়তাবাদী যুৱ ছাত্ৰ পৰিষদৰ ঔৰসত ভুমিষ্ঠ হ’ল ‘অসম জাতীয় পৰিষদ’ নামৰ নতুন আঞ্চলিক ৰাজনৈতিক দলটো।
নতুন আঞ্চলিক দলটোলৈ নিমন্ত্ৰণ জনালে বিজেপিৰ দক্ষ মন্ত্ৰী ড০ হিমন্ত বিশ্ব শৰ্মা গ’লহেঁতেন নেকি? এই প্ৰশ্ন উত্থাপন কৰাৰ সুযোগ দিছে মন্ত্ৰীগৰাকীয়ে নিজে।
কিয়নো নতুন দল গঠনক কেন্দ্ৰ কৰি মন্ত্ৰীগৰাকীৰ প্ৰতিক্ৰিয়া বিচাৰিছিল সাংবাদিকগৰাকীয়ে।
মন্ত্ৰীগৰাকীয়ে পোনচাতেই সংবাদ মাধ্যমৰ আগত ‘নিমন্ত্ৰণ’ৰ প্ৰসংগ উত্থাপন কৰে।
মন্ত্ৰীগৰাকীয়ে কয় ‘এই দলটোৰ বিষয়ে বেছি পঢ়াও নাই আৰু খুব বেছি চোৱাও নাই। মোৰ ইমানখিনি আগ্ৰহ নাই। কাৰণ সেইটো দলত মই নিজে যোগদান নকৰো। কাৰোবাৰ বিয়া মই নিমন্ত্ৰিত নহয় গতিকে মই তাৰ বিষয়ে ইমান অস্ত্ৰোপ্ৰচাৰ কৰি কি পাম?’
অগপৰ আমবাৰী মুখ্য কাৰ্যালয়টো ‘বিবাহ ভৱন’ আখ্যা দিয়া হিমন্তই নতুন ৰাজনৈতিক দল গঠনক কেন্দ্ৰ কৰি ‘বিবাহ’ৰ সৈতে তুলনা কৰি এক বিশেষ ইংগিত দিছে।
ইপিনে, নতুন দল খোলাটো স্বাভাৱিক ঘটনা বুলি উল্লেখ কৰি মন্ত্ৰীগৰাকীয়ে দলটোৰ পৰা প্ৰাৰ্থীত্ব প্ৰত্যাশীসকলৰো ভৱিষ্যৎ বাণী কৰে।
তেওঁ কয় ‘প্ৰতিটো সমষ্টিতে তেওঁলোকে ৭০০-১৫০০ ভোট লাভ কৰিব। এইটো ফিক্স ইয়াতকৈ নাবাঢ়ে। পিছত আকৌ নক’ব মই বেলট বাকচত মেজিক কৰিছো বুলি।’
আনহাতে, কৃষক মুক্তি সংগ্ৰাম সমিতিৰ কৃষকৰ লগত কি সম্পৰ্ক আছে বুলিও কটাক্ষ কৰে মন্ত্ৰীগৰাকীয়ে।
তাৎপৰ্যপূৰ্ণভাৱে, অসমৰ ৰাইজৰ পৰা চান্দা বিচাৰি হাৰাশাস্তি নকৰিবলৈ মন্ত্ৰীগৰাকীয়ে নতুন ৰাজনৈতিক দলটোক আহ্বান জনায়।
‘দল হওঁক সকলো হওঁক, কোনেও যাতে মানুহক চান্দা খুজি হাৰাশাস্তি নকৰে। দলৰ ভয়ত যাতে দোকানীয়ে দোকানৰ চাতাৰ মাৰিবলগীয়া হয়। ৰাজনীতিত নতুন মানুহ আহিলে ভালেই পাওঁ।‘
হিমন্তই লগতে কয় ‘নিৰ্বাচনৰ বতৰ হ’লে এনে দল, নেতা, সমাজ সেৱক ওলায়েই। একো ডাঙৰ কথা নহয়।’
