দীৰ্ঘ চাৰি বছৰ ধৰি চলি থকা ৰাছিয়া আৰু ইউক্ৰেইনৰ ৰক্তক্ষয়ী যুদ্ধ অৱশেষত শেষ হোৱাৰ দিশে অগ্ৰসৰ হৈছে বুলি ধাৰণা কৰা হৈছে। শেহতীয়াকৈ ৰাছিয়াৰ ৰাষ্ট্ৰপতি ভ্লাদিমিৰ পুটিনে এই সংঘাতৰ অন্ত পেলোৱাৰ এক ডাঙৰ ইংগিত প্ৰদান কৰিছে। সূত্ৰৰ মতে, তেওঁ অতি সোনকালেই ইউক্ৰেইনৰ সৈতে এখন শান্তি চুক্তিত স্বাক্ষৰ কৰিব পাৰে। শনিবাৰে মস্কোত অনুষ্ঠিত ৰাছিয়াৰ বিজয় দিৱসৰ এক কাৰ্যসূচীত অংশগ্ৰহণ কৰি পুটিনে সাংবাদিকৰ আগত কয় যে তেওঁৰ মতে এই দীঘলীয়া সংঘাতৰ এতিয়া অন্ত পৰিবলৈ গৈ আছে।
বছৰ বছৰ ধৰি ইউক্ৰেইনৰ ওপৰত নিজৰ সামৰিক শক্তি প্ৰদৰ্শন কৰি অহাৰ পিছত পুটিনৰ এই নৰম সুৰৰ মন্তব্যই সমগ্ৰ বিশ্বৰ কূটনৈতিক মহলত এক নতুন আশাৰ সঞ্চাৰ কৰিছে। ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিৰ সৈতে হোৱা সাক্ষাৎকাৰৰ বিষয়ে সোধাত পুটিনে স্পষ্ট কৰি দিয়ে যে শান্তি প্ৰতিষ্ঠা কৰিবলৈ যদি দুয়োখন দেশে আপোচ কৰিবলৈ মান্তি হয়, তেন্তে এখন দ্বিপাক্ষিক বৈঠক অনুষ্ঠিত হোৱাটো নিশ্চিতভাৱে সম্ভৱ।
ইফালে, আমেৰিকা যুক্তৰাষ্ট্ৰৰ ৰাষ্ট্ৰপতি ডোনাল্ড ট্ৰাম্পে শুকুৰবাৰে ৰাছিয়া আৰু ইউক্ৰেইনৰ মাজত তিনিদিনীয়া যুদ্ধবিৰতি কাৰ্যকৰী হোৱাৰ কথা ঘোষণা কৰে। নিজৰ ছচিয়েল মিডিয়া প্লেটফৰ্ম ‘ট্ৰুথ ছচিয়েল’ত তেওঁ লিখে যে ৰাছিয়া আৰু ইউক্ৰেইনৰ মাজত চলি থকা যুদ্ধ তিনি দিনৰ বাবে বন্ধ থাকিব বুলি ঘোষণা কৰি তেওঁ অতিশয় আনন্দিত। ইয়াৰ পিছতে জেলেনস্কিয়েও নিজৰ এক্স হেণ্ডেলৰ জৰিয়তে এই কথা নিশ্চিত কৰে। তেওঁ জনায় যে চাৰি বছৰতকৈও অধিক সময় ধৰি চলি অহা এই যুদ্ধ বন্ধ কৰাৰ বাবে আমেৰিকাই কৰা প্ৰচেষ্টাৰ অংশ হিচাপে এই তিনিদিনীয়া অস্থায়ী যুদ্ধবিৰতিৰ ব্যৱস্থা কৰা হৈছে। ইয়াৰ পূৰ্বে ৰাছিয়াই ৯ মে’ৰ বিজয় দিৱস উপলক্ষে দুদিনীয়া একপক্ষীয় যুদ্ধবিৰতিৰ ঘোষণা কৰিছিল, যদিও ইউক্ৰেইনে জনাইছিল যে তেওঁলোকেও আগতে যুদ্ধবিৰতিৰ প্ৰস্তাৱ দিছিল যিটো মস্কোৱে আওকাণ কৰিছিল।
ট্ৰাম্পে উল্লেখ কৰে যে এই বিজয় দিৱস কেৱল ৰাছিয়াৰ বাবেই নহয়, বৰঞ্চ ইউক্ৰেইনৰ বাবেও সমানেই গুৰুত্বপূৰ্ণ, কাৰণ তেওঁলোকো দ্বিতীয় বিশ্বযুদ্ধৰ এক ডাঙৰ অংশ আছিল। এই সাময়িক যুদ্ধবিৰতিৰ সময়ত সকলো ধৰণৰ সামৰিক কাম-কাজ সম্পূৰ্ণৰূপে বন্ধ থাকিব। লগতে এক গুৰুত্বপূৰ্ণ সিদ্ধান্ত মৰ্মে দুয়োখন দেশে নিজৰ নিজৰ এক হাজাৰজনকৈ যুদ্ধবন্দী ইজনে সিজনৰ লগত বিনিময় কৰিব। জেলেনস্কিয়েও এই বন্দী বিনিময়ৰ বিষয়টি নিশ্চিত কৰিছে। সাম্প্ৰতিক এই পৰিস্থিতিত পুটিনে কিয়েভৰ সৈতে শান্তি চুক্তি স্বাক্ষৰ কৰি স্থায়ীভাৱে যুদ্ধ বন্ধ কৰাৰ যি ইতিবাচক ইংগিত দিছে, সেয়া সমগ্ৰ বিশ্ববাসীৰ বাবে এক অতি ডাঙৰ আৰু স্বস্তিদায়ক খবৰ হিচাপে বিবেচিত হৈছে।
