সমগ্ৰ দেশৰ লগত সংগতি ৰাখি আজি কলিয়াবৰতো কলিয়াবৰ মহকুমা প্ৰশাসনে কুঁৱৰীলস্থিত গান্ধী খেলপথাৰত ৭০ সংখ্যক গণৰাজ্য দিৱস উদযাপন কৰে। গণৰাজ্য দিৱসৰ পতাকা উত্তোলন কৰে কলিয়াবৰ মহকুমাৰ মহকুমাধিপতি বিতোপন নেওগে।
পুৱা ৯ বজাত গান্ধী খেলপথাৰত ৰাষ্ট্ৰীয় গণৰাজ্য দিৱসৰ পেৰেডৰ কাৰ্যসূচীত অসম চৰকাৰৰ সামৰিক বাহিনীৰ দলৰ লগতে কলিয়াবৰ মহাবিদ্যালয়ৰ এন চি চি দল, কলিয়াবৰৰ কেইবাখনো বিদ্যালয়-মহাবিদ্যালয়ৰ কেইবাটাও কুচকাৱাজৰ দলে পেৰেডত অংশ গ্ৰহণ কৰি মহকুমাধিপতিক উদ্দেশ্যে কৰি অভিবাদন জ্ঞাপন কৰে।
মহকুমাধিপতিগৰাকীয়ে তেওঁৰ ভাষণ প্ৰসংগত মহাত্মা গান্ধী, ভগৎ সিং, কনকলতা আদি বীৰ চহিদ সকলৰ আদৰ্শৰে উপস্থিত জোৱানসকলক আগবাঢ়ি জোৱাৰ বাবে কয়।
আনহাতে কলিয়াবৰ মুক্তিযুদ্ধাকে প্ৰমুখ্য কৰি কলিয়াবৰ মহকুমাৰ বিভিন্ন বিদ্যালয়সমূহৰ লগতে মহকুমাৰ বিভিন্ন ক্ষেত্ৰৰ চৰকাৰী-বেচৰকাৰী প্ৰতিষ্ঠান সমূহত সেৱা আগবঢ়াই অহা দক্ষ বিষয়াসকলক নিৰ্বাচন কৰি কলিয়াবৰ মহকুমা প্ৰশাসনৰ তৰফৰ পৰা সম্বৰ্ধনা জ্ঞাপন কৰে।
গণৰাজ্য দিৱসৰ লগত সংগতি ৰাখি কলিয়াবৰ মহকুমাপ্ৰশাসন, কলিয়াবৰ জনস্বাস্থ্য কাৰিকৰী বিভাগ আৰু কলিয়াবৰ গড়কাপ্তানী বিভাগে কাৰিকৰী ব্যৱস্থাৰে ঢলা শদিয়া দলং, বগীবিল দলং, ইটা ভাতাৰ শিশু শ্রমিকৰ শিক্ষা গ্ৰহণ, নিৰ্বাচন আয়োগৰ ই ভি এম শিক্ষাৰে উলিওৱা ৰেলীৰে দৰ্শক ৰাইজক অধিক মনোৰঞ্জন দিয়া পৰিলক্ষিত হয়। লগতে সাংস্কৃতিক বাৰেৰহনীয়া অনুষ্ঠানত কলিয়াবৰ বাগৰিস্থিত আৰক্ষীৰ ছাউনী সেনাৰ জোৱানে কৰা ভাংৰা নৃত্য আৰু ভূপেন দাৰ গীতৰ তালে তালে সৃষ্টি শিল নৃত্যকে ধৰি আৰু বিভিন্ন ধৰণৰ নৃত্য প্ৰদৰ্শন কৰে।
কলিয়াবৰ মহকুমা প্ৰশাসনে কলিয়াবৰৰ উলুৱনী, জখলাবন্ধা চিকিৎসালয় আৰু চিমনাস্থিত খণ্ড প্ৰাথমিক স্বাস্থ্য কেন্দ্ৰত থকা ৰোগী সকলৰ মাজত ফলমূল বিতৰণ কৰে। বিয়লি কলিয়াবৰ মহকুমা প্ৰশাসন বনাম কলিয়াবৰ প্ৰেছ একাদশৰ মাজত প্ৰীতি ক্ৰিকেট খেল অনুষ্ঠিত হয় আৰু কলিয়াবৰ প্ৰেছ একাদশ জয়ী হয়।
