পঞ্জাৱৰ জলন্ধৰ চহৰত সংঘটিত হৈছে এগৰাকী মহিলা চিকিৎসকৰ ৰহস্যজনক মৃত্যুৰ ঘটনা। আত্মহত্যা নে হত্যা এতিয়াও স্পষ্ট হোৱা নাই। যদিও যুৱতীগৰাকীৰ পৰিয়ালে তেওঁৰ স্বামীক অবৈধ সম্পৰ্কত জড়িত বুলি অভিযোগ উত্থাপন কৰিছে। ইয়াৰ ফলত অশান্তিৰ সৃষ্টি হৈছিল। লগতে চিকিৎসকগৰাকীৰ ওপৰত মানসিক আৰু শাৰীৰিক নিৰ্যাতন চলোৱাৰ অভিযোগ উত্থাপন হৈছে।
মৃত চিকিৎসকগৰাকীৰ নাম মীনাক্ষী। স্বামী পিয়ুষো এগৰাকী চিকিৎসক। তেওঁ জলন্ধৰৰ ৰাষ্ট্ৰীয় চকু চিকিৎসালয়ৰ মুৰব্বী। বুজাবুজি হোৱা নাছিল বাবে মীনাক্ষীয়ে পৃথকে থাকিবলৈ লৈছিল।
বুধবাৰে যুৱতীগৰাকীৰ মৃতদেহ ঘৰত ওলমি থকা অৱস্থাত উদ্ধাৰ হয়। আৰক্ষীয়ে জনোৱা মতে, ঘৰৰ সকলো দুৱাৰ-খিৰিকী বন্ধ হৈ আছে। অৱশেষত আৰক্ষী জোৱানসকলে এটা কোঠাৰ কাঁচৰ খিৰিকী ভাঙি ভিতৰলৈ সোমাই যায়।
তদন্তৰ সূত্ৰ অনুসৰি ২০১৮ চনৰ অক্টোবৰ মাহত পিয়ুষ আৰু মীনাক্ষীৰ বিবাহ হৈছিল। যুৱতীগৰাকীৰ পৰিয়ালে অভিযোগ উত্থাপন কৰিছে যে পিয়ুষৰ চিকিৎসালয়খনৰ এগৰাকী নাৰ্ছৰ সৈতে প্ৰেমৰ সম্পৰ্ক আছিল। মীনাক্ষীয়ে এই অন্তৰংগ সম্পৰ্কৰ চিচিটিভি ফুটেজ দেখিছিল। এই সন্দৰ্ভত সোধা-পোছা কৰিলে পীয়ুষে পত্নীক মাৰপিট কৰিছিল। মীনাক্ষীৰ পিতৃ-মাতৃৰ আগতো তেওঁ এই কথা স্বীকাৰ কৰে। ইয়াৰ ফলত তেওঁলোকৰ সম্পৰ্কৰ অৱনতি ঘটে।
২০২৫ চনৰ জুলাই মাহৰ পৰা পৃথকে থাকিবলৈ আৰম্ভ কৰিছিল মীনাক্ষীয়ে। আইনী বিচ্ছেদৰ বিষয়তো সক্ৰিয় আছিল মীনাক্ষী। যদিও তেওঁ দেউতাকৰ কথাত অলপ দেৰি কৰি আছিল।
ইয়াৰ মাজতে ডাঃ মীনাক্ষীয়ে নিজৰ বাবে ঘৰ কিনিবলৈ চেষ্টা কৰি আছিল। পৰিয়ালৰ লোকে জনোৱা মতে, বেংকলৈ গৈ চিকিৎসকগৰাকী আচৰিত হৈ পৰিল। তেওঁ দেখিলে যে তেওঁৰ নামত ইতিমধ্যে ২.৫ কোটি টকাৰ ঋণ আছে। এখন গাড়ী আৰু স্বামীৰ চিকিৎসালয়ৰ বাবে। যদিও অভিযোগ কৰা হৈছে যে মীনাক্ষীৰ স্বাক্ষৰ অবিহনে এই কাম কৰা হৈছিল।
মীনাক্ষীৰ মাতৃয়ে কয়, “আমি এতিয়াও নাজানো এয়া আত্মহত্যা নে হত্যা। মৰণোত্তৰ পৰীক্ষাৰ প্ৰতিবেদন পোৱাৰ পিছতহে বিষয়টো স্পষ্ট হ’ব।” মীনাক্ষীৰ পৰিয়ালৰ অভিযোগৰ ভিত্তিত আৰক্ষীয়ে গোচৰ ৰুজু কৰি তদন্ত আৰম্ভ কৰিছে।
