মহিলাগৰাকীক ডিঙিত লোহাৰ শিকলিৰে ঘৰৰ ভিতৰৰ খুঁটা এটাত বান্ধি থোৱা হৈছিল। অভিযোগ অনুসৰি, তেওঁৰ স্বামীয়ে ৰঙা গৰম লোহাৰ ৰড ব্যৱহাৰ কৰি তেওঁৰ শৰীৰত সেক দিছিল, বাৰে বাৰে প্ৰহাৰ কৰিছিল আৰু আৰক্ষীৰ ওচৰলৈ নাযাবলৈ সকীয়াই দিছিল।
শুকুৰবাৰে নিশা সেই মহিলাগৰাকীয়ে ক্লান্ত, ক্ষতবিক্ষত শৰীৰ আৰু ৰক্তাক্ত ভৰিৰে উপস্থিত হয় মধ্যপ্ৰদেশৰ ৰাজগড় জিলাৰ এখন থানাত। অৱশ্যে মহিলাগৰাকীৰ ডিঙিত তেতিয়াও ওলমি আছিল লোহাৰ শিকলি। স্বামীয়ে তেওঁক এই শিকলিৰে বন্দী কৰি ৰাখিছিল।
অৱশেষত আৰক্ষীয়ে গ্ৰেপ্তাৰ কৰে স্বামী চৰ্দাৰ সিং তনৱাৰক। কিন্তু কেনেকৈ আৰক্ষীৰ ওচৰলৈ গ’ল ভুক্তভোগী মহিলা?
মংগীবাই তনৱাৰ নামৰ যুৱতীগৰাকীয়ে আৰক্ষীক জনোৱা মতে, ১০ জুনৰ সন্ধিয়া স্বামী মদ্যপান কৰি ঘৰলৈ উভতি অহাৰ পিছতে নিৰ্যাতন আৰম্ভ হৈছিল।
ৰাতিৰ আহাৰ খোৱাৰ পিছত স্বামীয়ে তাইক গালি-গালাজ কৰিবলৈ ধৰিলে। মংগীবাই প্ৰতিবাদ কৰাৰ সময়ত তেওঁ বাহিৰলৈ ওলাই গছৰ ডাল কাটি লাঠি বনালে। ইয়াৰ পৰাই আৰম্ভ হ’ল নৃশংস প্ৰহাৰ।
নিৰ্যাতিতা মংগীবাই তানোৱাৰে আৰক্ষীক জনায় যে যোৱা ১০ জুনত তেওঁৰ স্বামী মাতাল অৱস্থাত ঘৰলৈ অহাৰ পিছৰে পৰা অত্যাচাৰ আৰম্ভ হয়। নিশা আহাৰা খোৱাৰ পিছত স্বামীয়ে তেওঁক গালি-গালাজ কৰিবলৈ আৰম্ভ কৰে। মংগীবাইয়ে প্ৰতিবাদ কৰাৰ পিছত স্বামীয়ে ঘৰৰ বাহিৰলৈ গৈ গছৰ এডাল ডাল কাটি আনি লাঠী তৈয়াৰ কৰে। তাৰ পিছতে আৰম্ভ হয় নিৰ্মম প্ৰহাৰ।
লাঠিৰে মংগীবাইক কোবায়। বাৰে বাৰে তেওঁক চৰিয়ায় আৰু ভাবুকি দিয়া হয়। এই অত্যাচাৰ সহ্য কৰিব নোৱাৰি মংগীবাই আৰক্ষীৰ কাষ চাপিবলৈ সিদ্ধান্ত ল’লে। ৰাতিৰ আন্ধাৰত তেওঁ মনে মনে নিজৰ ঘৰৰ পৰা ওলাই আহিল। ঘণ্টাৰ পিছত ঘণ্টা খোজ কাঢ়ি গৈ থাকিল খিলচিপুৰ থানাৰ ফালে। কিন্তু তাত পোৱাৰ আগতেই স্বামীয়ে এটা মন্দিৰৰ ওচৰত তেওঁক ধৰিলে। তেওঁক আকৌ মাৰপিট কৰি জোৰকৈ গাঁৱলৈ লৈ গ’ল।
ঘৰলৈ উভতি অহাৰ পিছত তেওঁ আৰু অধিক অকথ্য অত্যাচাৰৰ বলি হ’ল। মংগীবাইয়ে অভিযোগ কৰে যে তেওঁৰ স্বামীয়ে তেওঁৰ ডিঙিত লোহাৰ শিকলি বান্ধি তাৰ আনটো মূৰ খুঁটাত বান্ধি ৰাখিছিল। অভিযোগ অনুসৰি স্বামীয়ে তাৰ পিছত তেওঁক কয়, “এতিয়া চাওঁচোন তুমি কেনেকৈ থানালৈ গৈ মোৰ বিৰুদ্ধে অভিযোগ দাখিল কৰা।”
ইয়াৰ পিছতে স্বামীয়ে গেছ ষ্ট’ভত লোহাৰ ৰড গৰম কৰি শৰীৰত চেপি ধৰাৰ অভিযোগ কৰিছে মহিলাগৰাকীয়ে। তেওঁ কয় যে গৰম ৰডটো তেওঁৰ কঁকাল, নিতম্ব আৰু সোঁ উৰুত চেপি ধৰিছিল। তেওঁ বিষত চিঞৰি উঠিছিল, কিন্তু কোনো সহায় কৰিবলৈ নাহিল।
পিছৰ ২৪ ঘণ্টা মংগীবাইক ঘৰৰ ভিতৰতে ৰখা হৈছিল। তেওঁক বাহিৰলৈ ওলাই যাবলৈ বা কাৰো লগত কথা পাতিবলৈ দিয়া হোৱা নাছিল।
অভিযোগ অনুসৰি মংগীবাইৰ স্বামীয়ে একেসময়তে গাঁৱৰ মানুহক গোটাই পঞ্চায়ত মাতিবলৈ চেষ্টা কৰিছিল আৰু আৰক্ষীৰ কাষ চপাৰ পৰিকল্পনা পৰিত্যাগ কৰিবলৈ হেঁচা প্ৰয়োগ কৰিছিল। তাৰ পিছত আৰু অধিক হিংসা আৰু নিৰ্যাতনৰ আশংকাত মহিলাগৰাকীয়ে সন্মতি দিয়াৰ অভিনয় কৰে। আচলতে তেওঁ পলায়নৰ সুযোগ বিচাৰি আছিল।
তেওঁৰ স্বামীয়ে প্ৰস্তাৱিত পঞ্চায়তখনৰ বাবে গাঁৱৰ মানুহক মাতিবলৈ ঘৰৰ পৰা ওলাই গৈছিল। মহিলাগৰাকীয়ে এই সুযোগ গ্ৰহণ কৰিলে। এটা শিল মংগীবাইৰ চকুত পৰিল। তাৰপাছত শিলটো তুলি লৈ শিকলিৰে বান্ধি থোৱা তলাটোত আঘাত কৰিবলৈ ধৰিলে। বহু চেষ্টাৰ পিছতো তলাটো ভাঙি যোৱা নাছিল।
কিন্তু তেওঁ কোবাই থাকিল। কেইবাবাৰো চেষ্টা কৰাৰ অন্তত অৱশেষত তলাটো ভাঙি গ’ল। শিকলিডাল খুলি গ’ল। ফলত তেওঁৰ বন্দীত্বৰ অন্ত পৰিল। এক মুহূৰ্তও নষ্ট নকৰাকৈ মংগীবাই তানোৱাৰে খৰধৰকৈ ঘৰৰ পৰা ওলাই আহি খিলচিপুৰৰ ফালে খোজ দিবলৈ ধৰিলে।
তেতিয়ালৈকে নিশা নামি আহিছিল। মংগীবাইয়ে নিৰ্জন অঞ্চল, পথাৰ আৰু ৰুক্ষ পথৰ মাজেৰে খোজ কাঢ়ি গৈ থাকিল। অৱশ্যে ভঙা শিকলি আৰু তলাটো তেতিয়াও তেওঁৰ ডিঙিত ওলমি আছিল। কাঁইটে তেওঁৰ ভৰি দুখন বিন্ধি আছিল। যাত্ৰাত তেওঁৰ ভৰি দুখনত ঘাঁ হৈ ৰক্তাক্ত হৈ পৰিছিল। তথাপিও তেওঁ আগবাঢ়িল।
তেওঁৰ ডিঙিত থকা শিকলিডাল দেখি ৰাস্তাৰ কাষৰ মানুহবোৰে ভাবিলে যে মংগীবাই তানোৱাৰ হয়তো মানসিকভাৱে ভাৰসাম্যহীন। খুব কম সংখ্যক লোকে প্ৰশ্ন কৰিবলৈ ৰৈছিল। আৰু তাতোকৈ কম মানুহেই বুজি পাইছিল যে শিকলিটো আচলতে কিহৰ প্ৰতীক। অৱশ্যে তেওঁৰ দুৰ্দশা লক্ষ্য কৰি এজন পথচাৰীয়ে তেওঁক কিবা এটা খাবলৈ আগবঢ়াই দিলে। অৱশ্যে তেওঁ থানাৰ ফালে খোজ কাঢ়ি যোৱাটো বন্ধ নকৰিলে।
নিশা প্ৰায় ১০ বজাত যেতিয়া মংগীবাই খিলচিপুৰ থানাত প্ৰৱেশ কৰে তেতিয়া অভিজ্ঞ আৰক্ষী জোৱানসকলো হতভম্ব হৈ পৰে। তেওঁৰ ডিঙিত তেতিয়াও ওলমি আছিল লোহাৰ শিকলি। মহিলাগৰাকীৰ শৰীৰত পোৰাৰ চিন স্পষ্টকৈ দেখা গৈছিল। তেওঁ যেন মানসিকভাৱে ভাগি পৰিছিল।
থানা পোৱাৰ কিছু মুহূৰ্তৰ ভিতৰতে তেওঁ কান্দোনত ভাঙি পৰিল আৰু সমগ্ৰ ঘটনাটো বৰ্ণনা কৰিলে। আৰক্ষীয়ে শিকলিটো আঁতৰাই তেওঁক চিকিৎসা পৰীক্ষাৰ বাবে প্ৰেৰণ কৰে।
আৰক্ষীয়ে জনোৱা মতে, পৰীক্ষাত মংগীবাইৰ শৰীৰত ঘাঁ আৰু পোৰাৰ চিন পোৱা গৈছে। লগে লগে গাঁওখনলৈ এটা দল পঠিয়াই অভিযুক্ত স্বামীক গ্ৰেপ্তাৰ কৰে।
খিলচিপুৰ থানাৰ ভাৰপ্ৰাপ্ত বিষয়া কমল সিং গেহলটে কয় যে মহিলাগৰাকীয়ে আৰক্ষীৰ ওচৰলৈ গৈ তেওঁৰ স্বামীয়ে তেওঁক প্ৰহাৰ কৰি অবৈধভাৱে আটক কৰি ৰখাৰ অভিযোগ উত্থাপন কৰে। “মহিলাগৰাকীৰ অভিযোগৰ ভিত্তিত সংশ্লিষ্ট ধাৰাত গোচৰ ৰুজু কৰা হৈছে। অভিযুক্তক গ্ৰেপ্তাৰ কৰি আদালতত হাজিৰ কৰা হৈছে।”
আৰক্ষীৰ মতে, ঘৰত তৰ্ক-বিতৰ্কৰ পিছতে এই বিবাদ আৰম্ভ হৈছিল আৰু পিছত হিংসাত্মক ৰূপ লৈছিল। ঘটনাৰ সকলো দিশৰ তদন্ত অব্যাহত ৰাখিছে তদন্তকাৰীয়ে।
এসময়ত যি শিকলিৰে তেওঁৰ মাত স্তব্ধ কৰিবলৈ চেষ্টা কৰা হৈছিল, সেই শিকলিটোৱেই শেষত তেওঁক থানালৈ লৈ গৈছিল, আৰু সেইটোৱেই হৈ পৰিছে তেওঁক নিৰ্যাতন চলোৱাৰ অভিযোগত অভিযুক্ত ব্যক্তিজনৰ বিৰুদ্ধে আটাইতকৈ শক্তিশালী প্ৰমাণ।
