ডিব্ৰুগড়ৰ মিলন নগৰ অঞ্চলৰ ভাড়াঘৰত বৃহস্পতিবাৰে এগৰাকী ২৯ বছৰীয়া মহিলাক ৰহস্যজনক পৰিস্থিতিত মৃত অৱস্থাত উদ্ধাৰ কৰা হয়।
মৃত মহিলাগৰাকী শিৱসাগৰ জিলাৰ বাসিন্দা ববিতা দাস বুলি জানিব পৰা গৈছে।
পৰিয়ালৰ লোকে জনোৱা মতে, ববিতাক তেওঁৰ কোঠাৰ ভিতৰত বিচনাত অচেতন অৱস্থাত পৰি থকা অৱস্থাত উদ্ধাৰ কৰা হয়। লগে লগে তেওঁক চিকিৎসালয়লৈ লৈ যোৱা হয়, য’ত চিকিৎসকে তেওঁক মৃত বুলি ঘোষণা কৰে।
মহিলাগৰাকীৰ ডাঙৰ ভনীয়েকে কয়, “আমি তাইক বিচনাত পৰি থকা দেখি ততাতৈয়াকৈ চিকিৎসালয়লৈ লৈ গ’লোঁ।চিকিৎসকে তাইক মৃত বুলি ঘোষণা কৰিলে। তাই দুই পুত্ৰৰ সৈতে ঘৰটোত বাস কৰিছিল। তাইৰ স্বামীয়ে নাইট-ছুপাৰৰ ড্ৰাইভাৰ হিচাপে কাম কৰে।আচলতে কি হৈছিল আমি নাজানো।”
ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।
বিষয়াসকলে কয় যে এই মৃত্যু স্বাভাৱিক কাৰণত হৈছে নে ঘটনাৰ সৈতে ৰহস্য জড়িত আছে সেয়া এতিয়াও নিৰ্ণয় হোৱা নাই। তদন্তকাৰীয়ে হত্যাৰ অভিযোগকে ধৰি সকলো সম্ভাৱ্য কোণ পৰীক্ষা কৰি আছে।
এই গোচৰৰ সবিশেষ তদন্ত বিচাৰি মহিলাগৰাকীৰ ভাতৃয়ে মিলন নগৰ আৰক্ষী চকীত এজাহাৰ দাখিল কৰিছে।
মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে। আৰক্ষীয়ে জনোৱা মতে, মৃত্যুৰ সঠিক কাৰণ জানিবলৈ প্ৰতিবেদনৰ বাবে অপেক্ষা কৰা হৈছে।
