অনুপ্ৰৱেশকাৰীৰ আতংকই সমগ্ৰ আমেৰিকাক খেদি ফুৰিছে। তাৰেই বলি হ’ল আমেৰিকাৰ মহিলা উদীয়মান কবি ৰেনী নিকোল গুড। শেহতীয়াকৈ আমেৰিকাৰ ইমিগ্ৰেচন এণ্ড কাষ্টমছ এনফৰ্চমেণ্টে (ICE) দক্ষিণ মিনিয়োপলিছত অনুপ্ৰৱেশকাৰীৰ বিৰুদ্ধে অভিযান আৰম্ভ কৰিছে। সেই আইচিই এজেণ্টসকলৰ গুলীচালনাত উদীয়মান কবি ৰেনীয়ে নিজৰ প্ৰাণ হেৰুৱালে।
এই ঘটনাৰ ভিডিঅ’ ইণ্টাৰনেটত বিয়পি পৰিছে। ইয়াত দেখা গৈছে এখন ক’লা ৰঙৰ এছ ইউ ভি লেহেমীয়া গতিৰে আগবাঢ়িছে। আৰু আইচিইৰ এজেণ্টে গাড়ীৰ চালকক নামিবলৈ নিৰ্দেশ দিছে। অৱশ্যে গাড়ীখন ৰৈ নাথাকিল। এজন এজেণ্টে গাড়ীৰ গেট খুলিবলৈ চেষ্টা কৰিছে।
এনে পৰিস্থিতিত এজন এজেণ্টে চালকজনৰ ওপৰত তিনিটা গুলীচালনা কৰে। ইয়াৰ পিছত SUV খন অলপ আগুৱাই গৈ ৰখাই থোৱা গাড়ী এখনত খুন্দা মাৰিলে।
আৰক্ষীয়ে জনোৱা মতে, গুলীবিদ্ধ ৰেনীক তাৰ পিছত গাড়ীৰ পৰা উলিয়াই হেনেপিন কাউন্টি মেডিকেল চেণ্টাৰলৈ লৈ যোৱা হয়। তাতে চিকিৎসকে তেওঁক মৃত ঘোষণা কৰে।
এই ঘটনাৰ ৰেশ বহু দূৰলৈ বিয়পি পৰিছে। এই ঘটনাক পাঁচ বছৰ পূৰ্বে জৰ্জ ফ্লয়ড নামৰ কৃষ্ণাংগ লোকৰ শ্বাসৰুদ্ধ কৰি হত্যা কৰাৰ সৈতেও তুলনা কৰা হৈছে। কিন্তু আইচিইয়ে দাবী কৰিছে যে ৰেনে তেওঁলোকৰ এজন এজেণ্টক গাড়ীৰে চেপি পলায়ন কৰিবলৈ চেষ্টা কৰিছিল। সেয়ে বাধ্য হৈ গুলীচালনা কৰে।
কিন্তু মহানগৰীৰ বুদ্ধিজীৱী আৰু মানৱ অধিকাৰ কৰ্মীসকলে আইচিইৰ দাবী মানি ল’বলৈ অনিচ্ছুক। সমগ্ৰ মিনিয়োপলিছত এই কাণ্ডৰ নিৰপেক্ষ তদন্তৰ দাবীত প্ৰতিবাদ আৰম্ভ হৈছে। আইচিইৰ এজেণ্টসকলক চহৰখন এৰি যাবলৈ অনুৰোধ জনাইছে মেয়ৰ জেকব ফ্ৰেই। তেওঁৰ মতে তেওঁলোকৰ উপস্থিতিয়ে পৰিস্থিতি আৰু জটিল কৰি তুলিব।
৩৭ বছৰীয়া ৰেনেৰ ঘৰ সেই স্থানৰ পৰা মাত্ৰ কেইমিটাৰমান দূৰত। তেওঁৰ মাতৃ ডনা গ্যাঞ্জাৰে কয়, “তেওঁ হয়তো ভয় খাই গাড়ীখন ৰখাব পৰা নাছিল। কিন্তু আইচিইয়ে তেওঁক হত্যা কৰি মূৰ্খতাৰ পৰিচয় দিছে।”
আমেৰিকাৰ সংবাদ মাধ্যমৰ সূত্ৰ অনুসৰি ৰেনে টিমি ৰে মেকলিন জুনিয়ৰৰ সৈতে বিবাহপাশত আবদ্ধ হৈছিল। ২০২৩ চনত তেওঁৰ মৃত্যু হৈছিল। তেওঁলোকৰ এটা ছয় বছৰীয়া সন্তান আছে। বৰ্তমান ৰেনে এজন ব্যক্তিৰ সৈতে টুইন চিটিত লিভ ইনত আছিল।
