দুই সন্তানৰ সৈতে নৈশ বাছত মহানগৰী অভিমুখে গৈ আছিল এগৰাকী মহিলা। অভিযোগ অনুসৰি বাকী যাত্ৰীসকল নামি যোৱাৰ পিছতে খালী বাছখনত দুই নাবালক সন্তানৰ সন্মুখতে মহিলাগৰাকীক দলবদ্ধ ধৰ্ষণ কৰে বাছখনৰ চালক, কণ্ডাক্টৰ আৰু হেণ্ডিমেনে। কৰ্ণাটকৰ বিজয়নগৰত সংঘটিত হৈছে এই ঘটনা।
যদিও ঘটনাৰ পিছত স্থানীয় লোকে তিনিওজন অভিযুক্তক ধৰি আৰক্ষীক গতাই দিয়ে, তথাপিও স্থানীয় আৰক্ষী থানাই ব্যৱস্থা গ্ৰহণ কৰাৰ পৰিৱৰ্তে ঘটনাটো গাপ দিবলৈ চেষ্টা কৰা বুলি অভিযোগ উঠিছে।
আনকি আৰক্ষীয়ে মহিলাগৰাকীক ২০০০ টকা দি নতুন শাৰী কিনিবলৈও পৰামৰ্শ দি গোচৰটোৰ পৰা আঁতৰত থাকিবলৈ পৰামৰ্শ দিয়ে।
কিন্তু স্থানীয় দলিত নেতাসকলে বিষয়টোৰ সম্পৰ্কে সৰৱ হৈ পৰাৰ ফলত এই কথা পোহৰলৈ আহিছে। স্থানীয় লোক আৰু দলিত সংগঠন সমূহে প্ৰতিবাদ কৰাৰে পিছতহে উপায়ন্ত হৈ বিজয়নগৰৰ আৰক্ষী অধীক্ষক শ্ৰীহৰি বাবুৱে অভিযুক্তক গ্ৰেপ্তাৰৰ নিৰ্দেশ দিয়ে।
তেওঁৰ নিৰ্দেশত আৰক্ষীয়ে তিনিজন অভিযুক্তক গ্ৰেপ্তাৰ কৰে। জানিব পৰা মতে স্থানীয় আৰক্ষী থানাৰ বিৰুদ্ধেও তদন্ত আৰম্ভ কৰা হৈছে।
উল্লেখ্য যে যোৱা ৩১ মাৰ্চত দুই নাবালক সন্তানৰ সৈতে দেৱানগিৰি জিলাৰ উচংগীদুৰ্গা মন্দিৰলৈ যোৱা মহিলাগৰাকীয়ে নিশাৰ শেষৰখন বাছত ঘৰলৈ উভতি আহিছিল। অভিযোগ অনুসৰি, বাকী যাত্ৰীসকল নামি যোৱাৰ পিছত অভিযুক্তই বাছখনত নাবালক শিশু দুটাৰ হাত-মুখ বান্ধি মহিলাগৰাকীক ধৰ্ষণ কৰে।
পিছত স্থানীয় ৰাইজে মহিলাগৰাকীক উদ্ধাৰ কৰি অভিযুক্তক আৰক্ষীক গতাই দিয়ে। আৰক্ষীয়ে ধনৰ বিনিময়ত অভিযুক্তক মুকলি কৰি দিয়াৰ অভিযোগ উত্থাপন কৰিছে মহিলাগৰাকীয়ে। ইয়াৰ পিছত দলিত নেতাসকলে আৰক্ষী অধীক্ষকক গৰহণা দি তৎক্ষণাত আন্দোলন আৰম্ভ কৰে। সমগ্ৰ ঘটনাক কেন্দ্ৰ কৰি অঞ্চলটোত হুলস্থুলৰ সৃষ্টি হয়। ইয়াৰ পিছতহে অভিযুক্তক গ্ৰেপ্তাৰ কৰা হয়।
