নতুন সমিতিয়ে দায়িত্বভাৰ গ্ৰহণ কৰাৰ পিছতো বিড়ম্বনাই লগ এৰা নাই অসম ক্ৰিকেট সন্থাত। সন্থাৰ দায়িত্বজ্ঞানহীনতাৰ বাবেই ২৩ জানুৱাৰিত তেনে এক বিড়ম্বনাৰ সন্মুখীন হ’ল অসমৰ অনূৰ্ধ্ব ২৩ মহিলা ক্ৰিকেট দলটো।
অসমৰ মহিলা দলটোৱে জয়পুৰত বি চি চি আইৰ অনূৰ্ধ্ব টি-২০ টুৰ্নামেণ্টত অংশগ্ৰহণ কৰি অসমলৈ উভতি অহাৰ সময়তে জয়পুৰৰ বিমানবন্দৰত সংঘটিত হয় এক অবাঞ্চিত ঘটনা। যাত্ৰাৰ সময়ত অতিৰিক্ত বয়বস্তুৰ বাবদ বিমান কৰ্তৃপক্ষক ধন আদায় নিদিয়াৰ বাবেই দলটোৱে নিজ ৰাজ্যলৈ উভতি আহিব নোৱাৰিলে।
উল্লেখ্য যে অতিৰিক্ত বয়বস্তু কঢ়িওৱাৰ বাবদ বিমান কৰ্তৃপক্ষই দলটোক ৭৬ হাজাৰ টকা আদায় দিবলৈ কৈছিল। বিমান কৰ্তৃপক্ষৰ এই কথাত লগে লগে বিমোৰত পৰা দেখা যায় অসমৰ ১৮ জনীয়া দলটোক। যাৰ ফলত উপায়ন্তৰ হৈ দলটোৱে অতিৰিক্ত এটা দিন জয়পুৰতে কটাবলগীয়া হয়।
উল্লেখনীয় বিষয় যে অসমৰ এই মহিলা দলটোৰ বিমান সেৱাৰ দায়িত্ব শুভযাত্ৰা নামৰ এটা ট্ৰেভেল এজেন্সীক প্ৰদান কৰিছিল। কিন্তু অসম ক্ৰিকেট সন্থাৰ অব্যৱস্থাপনা আৰু ট্ৰেভেল এজেন্সীৰ গাফিলতিৰ বাবে এনেদৰে অসমৰ মহিলা দলটো বহিঃৰাজ্যৰ বিমানবন্দৰত লজ্জানত হ’ব লগীয়া হয়। এই ঘটনাক লৈ এতিয়া বিভিন্ন জনে বিভিন্ন প্ৰশ্ন উত্থাপন কৰিছে।
অসম ক্ৰিকেট সন্থাৰ সভাপতি, সম্পাদককে ধৰি বিভিন্ন পদসমূহ সলনি হ’ল ঠিকেই কিন্তু সলনি নহ’ল কাম-কাজৰ ধৰণ। শেহতীয়াকৈ সংঘটিত এই ঘটনাটোৱেই পুনৰ প্ৰমাণ কৰি দিলে এ চি এৰ নিৰ্লজ্জ ৰূপ।