ছত্তীশগড়ৰ অম্বিকাপুৰৰ অতি গুৰুত্বপূৰ্ণ এলেকা গান্ধী চকত অৱস্থিত কংগ্ৰেছৰ জিলা কাৰ্যালয় ৰাজীৱ ভৱনত এক আচৰিত আৰু চাঞ্চল্যকাৰী চুৰি কাৰ্য সংঘটিত হৈছে। কাৰ্যালয়টোৰ বাথৰুমৰ পৰা অতি নিখুঁতভাৱে প্ৰায় ৭২টা দামী পানীৰ কল বা টেপ খুলি লৈ উধাও হৈছে চোৰৰ দল। কিন্তু আটাইতকৈ আচৰিত কথাটো হ’ল, কেৱল চুৰি কৰিয়েই চোৰ শান্ত থকা নাই, যোৱাৰ আগতে অফিচৰ মজিয়াত এটা ‘লাভ ইউ’ বুলি প্ৰেমৰ বাৰ্তাও লিখি থৈ গৈছে।
এই অদ্ভুত ঘটনাটো পোহৰলৈ অহাৰ পিছতে চহৰখনৰ আইন-শৃংখলা পৰিস্থিতিক লৈ তীব্ৰ ক্ষোভ প্ৰকাশ কৰিছে স্থানীয় কংগ্ৰেছ নেতৃত্বই। জানিব পৰা মতে, ৰাজীৱ ভৱনত এই লৈ একেৰাহে তিনিবাৰকৈ চুৰিৰ ঘটনা সংঘটিত হ’ল। ইয়াৰ ফলত এই হাই প্ৰফাইল এলেকাটোৰ নিৰাপত্তা ব্যৱস্থাক লৈ এতিয়া ডাঙৰ প্ৰশ্ন উত্থাপন হৈছে। কংগ্ৰেছ নেতাসকলৰ দাবী যে চোৰবোৰ ইমানেই নিৰ্ভীক আৰু নিশ্চিন্ত আছিল যে কোনো ধৰণৰ ভয় নোহোৱাকৈ অতি শান্তিপূৰ্ণভাৱে বাথৰুমৰ প্ৰতিটো দামী পানীৰ কল খুলি লৈ যাবলৈ সক্ষম হ’ল।
ঘটনাৰ খবৰ পাই কংগ্ৰেছৰ জিলা সভাপতি বালকৃষ্ণ পাঠক লগে লগে ৰাজীৱ ভৱনত উপস্থিত হয় আৰু খঙত ফাটি পৰে। এই চুৰি কাৰ্যৰ আঁহত চহৰখনৰ সক্ৰিয় ড্ৰাগছ আসক্ত আৰু সমাজবিৰোধী লোক জড়িত থকাৰ পূৰ্ণ সন্দেহ প্ৰকাশ কৰিছে জিলা সভাপতিগৰাকীয়ে।
বালকৃষ্ণ পাঠকে সংবাদ মাধ্যমৰ আগত কয় যে এই কাৰ্যালয়ত এইয়া তৃতীয়টো চুৰিৰ ঘটনা। চোৰৰ এই দুঃসাহসে প্ৰমাণ কৰে যে চহৰখনত আইন-শৃংখলা পৰিস্থিতিৰ কিমান অৱনতি ঘটিছে। তেওঁ লগতে কয় যে আটাইতকৈ ডাঙৰ কথাটো হ’ল চোৰ কেইটাই যোৱাৰ আগতে মজিয়াত এটা বাৰ্তা লিখি থৈ গৈছে, যিটোৱে পোনপটীয়াকৈ আৰক্ষী আৰু প্ৰশাসনক মুকলিকৈ উপহাস কৰা বুজাইছে।
ইতিমধ্যে আৰক্ষীয়ে ঘটনাৰ খবৰ পাই তদন্ত আৰম্ভ কৰিছে। চিচিটিভি ফুটেজ পৰীক্ষা কৰাৰ লগতে মজিয়াত লিখা শব্দৰ সূত্ৰ ধৰি অপৰাধী কৰায়ত্ত কৰাৰ চেষ্টা চলাই থকা হৈছে। কিন্তু এটা প্ৰভাৱশালী ৰাজনৈতিক দলৰ কাৰ্যালয়ত সোমাই চোৰে কৰা এনে ধেমালি আৰু চুৰিৰ ঘটনাই এতিয়া সমগ্ৰ অঞ্চলটোতে ব্যাপক চৰ্চাৰ বিষয় হৈ পৰিছে।
