মছজিদত লাউডস্পীকাৰ ব্যৱহাৰ লৈ হিন্দুত্ববাদী নেতাই সৃষ্টি কৰা ৰাজনৈতিক বিতৰ্কই এইবাৰ নতুন মূৰ লৈছে। এইবাৰ বিজেপি নেতা মোহিত কম্বোজে হনুমান চালিচা বজাবলৈ মন্দিৰে-মন্দিৰে বিনামূলীয়াকৈ বিতৰণ কৰিছে লাউডস্পীকাৰ।
১৪ এপ্ৰিলত বিজেপি নেতাজনে মন্দিৰন্যাস আৰু স্বতন্ত্ৰ মন্দিৰসমূহলৈ এখন পত্ৰ প্ৰেৰণ কৰি কয় যে তেওঁ বিনামূলীয়া লাউডস্পীকাৰ ছেট বিতৰণ কৰিছে আৰু ন্যাসসমূহে হনুমান চালিচা আৰু দেৱ-দেৱীৰ অন্যান্য ভক্তিমূলক গীত বজাব লাগে।
“হিন্দুসকলৰ বিৰুদ্ধে বৈষম্যমূলক আচৰণ কৰা হৈছে আৰু আক্ৰমণ এতিয়াও চলি আছে। হিন্দু ধৰ্মৰ ওপৰত মানুহৰ বিশ্বাস বৃদ্ধি কৰাৰ বাবে মই সকলো মন্দিৰত লাউডস্পীকাৰ বিতৰণ কৰাৰ সিদ্ধান্ত লৈছো।”— বিজেপি নেতা কম্বোজে কয়।
“মন্দিৰৰ চৌহদত লাউডস্পীকাৰ স্থাপন কৰক আৰু দৈনিক ভিত্তিত হনুমান চালিচা আৰু দেৱ-দেৱীৰ ভক্তিমূলক গীত বজাওক।”- কম্বোজে লগতে কয়।
উল্লেখ্য যে কিছুদিন পূৰ্বে মছজিদসমূহত লাউডস্পীকাৰ ব্যৱহাৰ বন্ধ কৰিবলৈ দাবী জনাইছিল মহাৰাষ্ট্ৰ নৱনিৰ্মাণ সেনাৰ মুৰব্বী ৰাজ ঠাকৰেই।
ৰাজ ঠাকৰেৰ এই দাবীৰ পিছতে মছজিদত লাউডস্পীকাৰৰ ব্যৱহাৰৰ সমান্তৰালভাৱে মন্দিৰতো লাউডস্পীকাৰ ব্যৱহাৰৰ প্ৰস্তাৱ আগবঢ়াই এই বিনামূলীয়া বিতৰণৰ ব্যৱস্থা কৰিছে বিজেপি নেতাজনে।
ইফালে লাউডস্পীকাৰ বিতৰ্কৰ ৰাজনীতিৰ মাজতে ৰাজ্যখনৰ শান্তি আৰু স্বাভাৱিকতা ব্যাহত কৰিবলৈ কাকো অনুমতি দিয়া নহ’ব বুলি সকীয়াই দিছে মহাৰাষ্ট্ৰ চৰকাৰে।
মহাৰাষ্ট্ৰৰ গৃহ মন্ত্ৰী দিলীপ ৱালছে পাটিলে কয় যে আৰক্ষীয়ে এই সন্দৰ্ভত কঠোৰ নিৰীক্ষণ কৰি আছে।
“আমি বিষয়টো গুৰুত্বসহকাৰে লৈছো আৰু তীক্ষ্ণভাৱে চাই আছো। আৰক্ষী সতৰ্ক হৈ আছে। হনুমান জয়ন্তীৰ লগতে আন এটা উৎসৱৰো আয়োজন হ’বলৈ গৈ আছে। কাকো স্বাভাৱিক অৱস্থাৰ ব্যাঘাত জন্মাবলৈ অনুমতি দিয়া নহ’ব।”— পাটিলে কয়।
