দেশত ক্ৰমান্বয়ে বৃদ্ধি পোৱা ইন্ধনৰ খৰচ নিয়ন্ত্ৰণ কৰিবলৈ আৰু বৈদেশিক মুদ্ৰাৰ ভাণ্ডাৰৰ ওপৰত পৰা চাপ হ্ৰাস কৰিবলৈ দিল্লী চৰকাৰে এক বিশেষ পদক্ষেপ গ্ৰহণ কৰিছে। চৰকাৰৰ নতুন নিৰ্দেশনা অনুসৰি এতিয়াৰে পৰা কৰ্মচাৰীসকলে সপ্তাহত দুদিনকৈ ঘৰৰ পৰা অফিচৰ কাম কৰিব পাৰিব। ইয়াৰ উপৰিও যাতায়তৰ নামত হোৱা ইন্ধনৰ অপচয় ৰোধ কৰিবলৈ চৰকাৰী বিভাগসমূহৰ ৫০ শতাংশ বৈঠক অনলাইন মাধ্যমেৰে সম্পন্ন কৰিবলৈ নিৰ্দেশ দিয়া হৈছে। চৰকাৰী বিভাগসমূহৰ লগতে দিল্লী পৌৰ নিগমৰ কাৰ্যালয়ৰ সময়সূচীতো পৰিৱৰ্তন অনা হ’ব যাতে যান-জঁটৰ সমস্যা কম হয়। ইন্ধনৰ সঠিক ব্যৱহাৰৰ বাবে জনসাধাৰণৰ মাজত সজাগতা সৃষ্টিৰ উদ্দেশ্যে চৰকাৰে এক বিশেষ প্ৰচাৰ অভিযান চলোৱাৰো পৰিকল্পনা কৰিছে।
চৰকাৰী কামত ব্যৱহাৰ হোৱা বাহনৰ ইন্ধনৰ খৰচ কমাবলৈও কঠোৰ ব্যৱস্থা লোৱা হৈছে। চৰকাৰী বিষয়াসকলৰ বাবে নিৰ্ধাৰিত পেট্ৰ’লৰ পৰিমাণ ২০ শতাংশলৈ হ্ৰাস কৰা হৈছে যাৰ ফলত এতিয়াৰে পৰা মাহিলী সৰ্বোচ্চ সীমা ২০০ লিটাৰৰ পৰা কমি আহিব। ইয়াৰ লগতে অহা ছয় মাহলৈ দিল্লী চৰকাৰে কোনো নতুন বাহন ক্ৰয় নকৰাৰ সিদ্ধান্ত লৈছে। চৰকাৰী কৰ্মচাৰীসকলক ৰাজহুৱা পৰিবহন ব্যৱহাৰ কৰিবলৈ উৎসাহিত কৰিবলৈ ২৯টা চৰকাৰী আৱাসিক এলেকাত ৫৮খন বিশেষ বাছৰ ব্যৱস্থা কৰা হ’ব। জনসাধাৰণক সপ্তাহত এদিন ব্যক্তিগত বাহন পৰিহাৰ কৰি নো কাৰ ডে পালন কৰিবলৈও চৰকাৰে আহ্বান জনাইছে।
প্ৰধানমন্ত্ৰী নৰেন্দ্ৰ মোদীয়ে দেশত ইন্ধনৰ খৰচ কমাবলৈ যি আহ্বান জনাইছিল তাৰ সৈতে সংগতি ৰাখিয়েই এই পদক্ষেপসমূহ গ্ৰহণ কৰা হৈছে। প্ৰধানমন্ত্ৰীয়ে নিজেই নিজৰ নিৰাপত্তা বাহিনীৰ বাহনৰ সংখ্যা কমোৱাৰ সিদ্ধান্ত লৈছে আৰু দেশবাসীক ভোজ্য তেলৰ ব্যৱহাৰ হ্ৰাস কৰা তথা থলুৱা পৰ্যটনক গুৰুত্ব দিবলৈ পৰামৰ্শ দিছে। দিল্লী চৰকাৰৰ এই পদক্ষেপৰ সমান্তৰালকৈ আন বহুতো বিজেপি শাসিত ৰাজ্যয়ো একে ধৰণৰ নীতি গ্ৰহণ কৰিছে। এই নতুন ব্যৱস্থাৰ অধীনত চৰকাৰী কাৰ্যালয়ৰ গ্ৰুপ চি আৰু গ্ৰুপ ডি কৰ্মচাৰীসকলৰ ৫০ শতাংশই প্ৰতিদিনে কাৰ্যালয়ত উপস্থিত থাকিব আৰু বাকী ৫০ শতাংশই ঘৰৰ পৰা কাম কৰিব। ইয়াৰ বাবে এটা সাপ্তাহিক ডিউটি ৰষ্টাৰ প্ৰস্তুত কৰিবলৈ বিভাগীয় মুৰব্বীসকলক নিৰ্দেশ দিয়া হৈছে যাতে পাল পাতি সকলোৱে অফিচ আৰু ঘৰৰ পৰা কাম কৰাৰ সুযোগ পায়।
