অখিলৰ বিৰুদ্ধে দিয়া উচ্চ ন্যায়ালয়ৰ ৰায়ক লৈ প্ৰশ্ন তুলিলে ৰাইজৰ দলে

আজি গীতানগৰস্থিত ৰাইজৰ দলৰ মুখ্য কাৰ্যালয়ত এক সংবাদমেল অনুষ্ঠিত কৰি কৃষক নেতা অখিল গগৈৰ বিৰুদ্ধে দিয়া উচ্চ ন্যায়ালয়ৰ ৰায়ক লৈ প্ৰশ্ন তুলিলে ৰাইজৰ দলে।

ৰাইজৰ দলৰ কাৰ্যকৰী সভাপতি ভাস্ক’ ডি শইকীয়াই উচ্চ ন্যায়ালয়ৰ ন্যায়াধীশ অজিত বৰঠাকুৰ আৰু কল্যাণ ৰায় চুড়ানা বিচাৰপীঠে দিয়া ৰায়ৰ ওপৰত অস্তুষ্টি ব্যক্ত কৰে।

‘অখিল গগৈক লৈ দুজনীয়া বিচাৰপীঠে দিয়া ৰায় ত্ৰুটিপূৰ্ণ, বিলম্বিত আৰু পক্ষপাতদুষ্ট ৰায়। এই ৰায়ে আমাৰ লগতে অসমবাসীক অসন্তুষ্ট আৰু হতাশ কৰিছে।‘ শইকীয়াই এইদৰে সংবাদমেলত কয়।

ইপিনে, অখিল গগৈৰ গোচৰটোত গুৱাহাটীৰ NIA আদালতে অখিল গগৈসহ চাৰি মূল অভিযুক্তক ১৭ মাৰ্চ ২০২০ ত ‘ডিফল্ট’ জামিন প্ৰদান কৰিছিল বুলি উল্লেখ কৰি শইকীয়াই লগতে কয় ‘কিন্তু সেই জামিনৰ স্থগিতাদেশ বিচাৰি NIAই গুৱাহাটী উচ্চ ন্যায়ালয়ৰ দ্বাৰস্থ হৈছিল আৰু ৭ এপ্ৰিল ২০২০ত ন্যায়ালয়ে NIAৰ সপক্ষে জামিনত স্থগিতাদেশ জাৰি কৰিছিল। তদানীন্তন গুৱাহাটী উচ্চ ন্যায়ালয়ৰ মুখ্য ন্যায়াধীশ অজয় লাম্বাই গোচৰটোত স্থগিতাদেশ দি ৰায় দিয়ে যে দহ দিনৰ ভিতৰত গোচৰটো সন্দৰ্ভত উচ্চ ন্যায়ালয়ৰ সাংবিধানিক বিচাৰপীঠ নিযুক্তি দি তাৎক্ষণিক ৰায় দিব, কিয়নো বিষয়টোৰ লগত ব্যক্তি স্বাধীনতাৰ প্ৰশ্ন জড়িত হৈ আছে।‘

‘পিছে মুখ্য ন্যায়াধীশজনে যোৱা ২০ ছেপ্তেম্বৰ ২০২০ত অৱসৰ গ্ৰহণ কৰে আৰু অৱসৰ গ্ৰহণৰ পূৰ্বে ১৬৪ দিন বা ৫ মাহ ১৪ দিনৰ পাছত ১৭ ছেপ্তেম্বৰতহে সাংবিধানিক বিচাৰপীঠ গঠন কৰি গোচৰটো অভূতপূৰ্বভাৱে বিলম্ব কৰে। এইদৰে অখিল গগৈক দীঘলীয়াকৈ বন্দী কৰি ৰাখে। অখিল গগৈৰ অধিবক্তাই বাৰম্বা গোচৰটো ‘মেঞ্চন’ কৰাৰ পাছতো গোচৰটো ন্যায়ালয়ত উঠিবলৈ দিয়া নহ’ল।‘ শইকীয়াই সংবাদমেলত এইদৰে কয়।

আনহাতে, CRL.A./186/202 গোচৰটো একেটা ‘নিয়া’ গোচৰৰ জামিন বিচাৰি গুৱাহাটীৰ NIA আদালতত অখিল গগৈয়ে কৰা আবেদন নাকচ হোৱাৰ কাৰণে তৰা গোচৰ আছিল বুলি উল্লেখ কৰি শইকীয়াই লগতে কয় ‘যোৱা ১৩ জুলাই, ২০২০ত NIA আদালতে অখিল গগৈৰ জামিন নাকচ কৰিছিল। সেই বাবে গগৈৰ অধিবক্তাই গুৱাহাটী উচ্চ, ন্যায়ালয়ত আপীল আবেদন জনায়। এই আবেদনো সময়মতে বিচাৰ কৰা হোৱা নাছিল যাৰ বাবে আইন অনুসৰি যোৱা ২৬ ডিচেম্বৰতে গোচৰটোৰ ৰায় প্ৰদান কৰিব লাগিছিল যদিও ৭ জানুৱাৰীতহে ৰায় প্ৰদান কৰে আৰু অখিল গগৈৰ জামিন আবেদন নাকচ কৰে।

ইপিনে, এনে বহু কিছু আঁসোৱাহ অখিল গগৈৰ ৰায়দানত ৰৈ যোৱা বুলি দাবী কৰি শইকীয়াই লগতে কয় ‘আদালতত অখিল গগৈৰ অধিবক্তাই যুক্তি প্ৰদৰ্শন কৰিছিল যে অভিযুক্ত ধৈৰ্য কোঁৱৰ, বিতু সোণোৱাল, মানস কোঁৱৰক যিহেতু একে কেইটা গোচৰৰ ধাৰাত বা একেই অভিযোগত জামিন প্ৰদান কৰা হৈছে সেয়েহে ‘সাদৃশ্যতাৰ ভিত্তিত’ অখিল গগৈকো আদালতে জামিন দিব লাগে। কিন্তু আশ্বৰ্যজনকভাৱে আদালতৰ ৰায়টোত সেই ক্ষেত্ৰত পেৰাগ্ৰাফ চাৰিত(পৃষ্ঠা ৪)ত কোৱা হৈছে যে আন তিনিজন অভিযুক্তও এতিয়া পৰ্যন্ত গুৱাহাটী কেন্দ্ৰীয় কাৰাগাৰত ন্যায়িক জিম্মাত আছে। ব্যক্তিগত স্বাধীনতাৰ এটা বিষয়ত উচ্চ ন্যায়ালয়ৰ দুজন ন্যায়াধীশৰ এনে দৃষ্টিকটু ত্ৰুটি সঁচাকৈয়ে অতি তাৎপৰ্যপূৰ্ণ।‘

ইপিনে, অখিল গগৈৰ ক্ষেত্ৰত দেখুওৱা দুজন ৰাজসাক্ষী বৰ্তমানো ৰহস্যজনকভাৱে গোপনীয়কৈ ৰখা হৈছে বুলি শইকীয়াই দাবী কৰি লগতে কয় ‘প্ৰথমজন ৰাজসাক্ষীয়ে দিল্লীৰ আদালতত কৈছে যে তেওঁক অখিল গগৈয়ে মাওবাদী শিবিৰলৈ পঠিয়াইছিল কিন্তু শিবিৰৰ পৰা ঘুৰি আহি অখিলক সাক্ষাৎ কৰাত গগৈয়ে কয় যে অসমত মাওবাদী পদ্ধতিৰে কাম নহ’ব। দুয়োজন গুপ্ত ৰাজসাক্ষী যেতিয়া ‘মাওবাদী শিবিৰলৈ গৈছিল’’ বুলি উল্লেখ কৰিছিল সেই সময়খিনিত চিপিআই(মাওবাগদী) দল ভাৰত চৰকাৰৰ নিষিদ্ধ সংগঠনেই নাছিল। ২০০৯ চনৰ ২৬ জুনতহে এই সশস্ত্ৰ সংগঠনক নিষিদ্ধ ঘোষণা কৰা হৈছিল।‘

‘আটাইতকৈ ডাঙৰ কথা, এই গুপ্তসাক্ষী দুজনৰ বক্তব্যৰ বাহিৰে অখিল গগৈৰ বিৰুদ্ধে মাওবাদীৰ লগত প্ৰত্যক্ষ বা পৰোক্ষভাৱে যোগাযোগ থকাৰ সামান্যতম তথ্য প্ৰমাণো NIAৰ চাৰ্জশ্বীটত নাই।‘ শইকীয়াই লগতে কয়।

আনহাতে, উক্ত সংবাদমেলৰ জৰিয়তে শইকীয়াই ‘সাহস আছে যদি বিজেপি চৰকাৰে অখিল গগৈক মুকলি কৰি দি নিৰ্বাচন খেলিবলৈ’ প্ৰত্যাহ্বান জনায়।